मत्ती 22

येसु:द्याङ्गेलाइहेङ बुझिपालिका भाअ्सिङ निङ्पितेङ दोअ्हि | 2 स्वर्गको सारभि एलोङ राजा भाइका हि,ज्याइ ताइको चानको बिहुता भातियार जुराइखे | 3 राजा आधेमि द्याङगेलाइहेङ भातियारता निम्ता पिका हिघाहि | जेलाउ भातियार तियार जेङ्हि,राजा ताइ चाकारियागेलाइहेङ इङ्को द्याङ्गेलाहेङ काइलि दिङगिल्हि | कालाउबुङ द्याङगेलाइ राजाको इदोइ भातियारता लोलि माकिहि | 4 कलाउ राजा आरुङ चाकारियागेलाइहेङ एसा दोअ्तेङ दिङ्गिल्हि | राजा चाकारियागेलाइहेङ एसा दोअ्का हिघाहि,'का नेउता पिका इङ्को द्याङगेलाइहेङ उम तिघार जेङ्हि दोअ्तेङ दोअ्सु | का काङ्को पियागेलाइ कालाउ तोइ-तोइका गपुसगेलाइ सेअ्का का हिघा | गोताङ आनेमाने तियार जेङकाहि | बिहुको भातिरता उमचालि लौउ | 5 चाकारियागेलाइ इङ्को द्याङ्गेलाइहेङ भातियारता लोलि अनुरोध पाहि | कालाउबुङ इम्बालाइ चाकारियागेलाइको काथा हिङ्लि माकिहि | इङ्को द्याङ्गेलाइ ताइ-ताइको कामता काम पालि तेङ्हि | एमि ताइको मिलिङ्ता हानेहि,कालाउ भेनेङ चाहि ताइको ब्यापार भारि हानेहि | 6 आधिमि नोकरगेलाइहेङ रिमतेङ सुताइहि,कालाउ ओबालाइहेङ सेअ्हि | 7 राजा इन्सिका हिङ्तेङ चेरताङ्पातेङ तासिङ जिहि | कालाउ राजा ताइको सेना दिङगिल्हि, इङ्को ह्त्यारागेलाइहेङ सेअ्हि कालाउ इम्बालाइको सहर मे चोटेङ दुपिहि कालाउ बुसिरि बानाइपिहि | 8 कालाउ न्हुसो राजा ताइको नोकरगेलाइ हेङ दोअ्हि,'बिहुको भतियार तियार हि | का इङ्को द्याङगेलाइहेङ काइघा, कालाउ इम्बालाइ या भातियारता लोलि योग्यको मान्थुघाखे (माजेङहि )| 9 ओदोङ भाअ्सिङ नेलाइ गल्लि-गल्लिको कुन्हा-कुन्हा भारि हानेसु कालाउ जेथे तिङ्कालाइहेङ भातियारता लोलिको भाअ्सिङ नेउता पितेङ चुमासु | कालाउ ओबालाइ हेङ काङ्को भातियारता लोसु दोअ्पिसु |' 10 कालाउ नोकरगेलाइ कुन्हा-कुन्हा भारि हानिहि | निङ्का थेकापा झाराङ्हेङ जोम्पाहि | इम्बालाइ रेम्का मारेम्का गोताङ द्याङगेलाइहेङ भातियार ता योम्लि चुम्पुहि | कालाउ इङ्को थामे द्याङ्दोङ द्याङ्होइ गुल्सु-मुल्सु जेङ्हि | 11 जेलाउ इङ्को द्याङ्गेलाइ चाकाताङ पालाउ राजा खाङ्लि दोतेङ इनता लोहि | हिदोइबुङ एमिहेङ बिहुको लोखोनता मालोका राजा निङ्हि | 12 राजा दोअ्हि 'सनाइति, ना इता लिता हेसा लोना ? बिहुको भाअ्सिङ होङ्का धावा ना होङ्का मान्थुना |'कालाउ इङ्को द्याङ हाइबुङ माधुहि | 13 कालाउ राजा ताइको नोकरगेलाइहेङ दोअ्हि 'याको खुरखोकोइ जिङ्तेङ यासिहेङ कितिकितिकाता थाइगिल्पि जेता द्याङ्गेलाइ दु:ख जेङ्तेङ खारतेङ पाकाताङ कालाउ तासिङ जितेङ ह्यावा | 14 'एइ हेन्जा द्याङगेलाइहेङ काइका हि | कालाउ साल्का चाहि आतुइसा हि |'' 15 कालाउ फारिसिगेलाइ इङ्को थामे लाअ्तेङ हानिहि इनता येसु:धिरपाकाताङ हिघाहि |ओबालाइ वाकोङ काथाता येसु:हेङ फसेपालि काथा मिलि पाहि | 16 फारिसिगेलाइ येसु:हेङ फसेपालि आधिमि ताइको द्याङ्गेलाइ कालाउ आधिमि हेरोदि दलको द्याङ्गेलाइ दिङगिल्लिहि | कालाउ इङ्को द्याङ्गेलाइ दोअ्हि,''गुरु ज्यु,ना मारफाङ इमान्दार हिना केलाइ गिनाखे | केलाइ गिनाखे ना परमेस्वरको दामा थिक थेकापा धिरपाखेना | ना हासुबुङ दोफा माथिखेना | नाङ्को आगाता झाराङद्याङ एलोङ्दोङ हि | ओदोङ भाअ्सिङ नाङको बिचार चाहि हाइ केलाइहेङ दोअ्पि | 17 सिजरहेङ पोत तिरिलि ठिक हि याते ठिक मान्थु ?'' 18 कालाउ येसु:थाहा गिहि इङ्को द्याङगेलाइ मारेम्का जालि पाहि खाङ्खे दोअ्तेङ | कालाउ येसु:इम्बालाइहेङ दोअ्हि ''नेलाइ चिचागेलाइ हिसुना | हाइदोङ माजेकका काथाता धाताइका निउपातेङ नेलाइ कासिहेङ फसिपालि खाङसुखेना ? 19 पोत तिरिका ताकाको सिक्का कासिङ तिङ्पासु | ''इङ्को द्याङ्गेलाइ येसु:एलोङ चादिको सिक्का तिङ्पाहि | 20 येसु:आरुङ दोअ्हि,''ताकोको सिक्काता हासुको चित्र हि ? कालाउ हासुको मिङ इन्ता तापिका हि |'' 21 इङ्को द्याङ्गेलाइ जोबाफ पिहि,''इदोइ सिजरको चित्र हि कालाउ इन्ता सिजरको मिङ हि |''येसु:आरुङ दोअ्हि,जेदोङ सिजरको हि इङ्को सिजरहेङ पिसु कालाउ जेदोङ परमेस्वरको परमेस्वरहेङ पिसु | 22 इङ्को द्याङगेलाइ येसु:को दोअ्का काथा हिङ्तेङ भारभुसाइ हि | कालाउ येसु:हेङ इन्ताङ लाअ्तेङ इम्बालाइ हानिहि | 23 ओदोङ दिना आधे सादुकिगेलाइ येसु:कोता लोहि |सादुकिगेलाइ खान्धुरि पाधाखे कि हिदोइबुङ द्याङ सिकासो सिनचाङ्लि जेङ्तेङ माल्होकाङ | सादुकि गेलाइ येसु:हेङ एलोङ प्रस्न हिअ्हि | 24 इम्बालाइ दोअ्हि,''गुरुज्यु,मोसाको दोअ्का भाइपाङ हिदोबुङ बिहुपाका वाबाल चानचामिन्दि माजेङ्सिङ सिहेपानु वाको दादाको भाअ्सिङ ओने बिहु पातेङ चानचामिन्दि जेङपालि इङ्को बेबालहेङ बिहु पालि द्वाङ ? 25 केलाइ न्हिन्जा झना दादाओनेगेलाइ हिघानाहि | जेठा बिहु पाहि कालाउ सि:हि,वाको हिदोइबुङ जामाल मान्थुघाखे | ओदोङ भाअ्सिङ वाको ओने राडि भाउजिहेङ बिहु पाहि | 26 कालाउ न्हुसो इङ्को न्हेदोङ ओनेबुङ सिहि | इन्सिकाङ घाटाना सुमदोङ ओनेदोअ्फाबुङ जेङ्हि | कालाउ इन्सिकाङ आरु भेनेङ दादाओनेगेलाइ दोफा जेङ्हि,एन्सा जेङ्काताङ न्हिलोङ दादाओने दोफाबुङ एनसाङ घाटाना जेङ्हि | 27 ओबालाइ झाराङ सि:हि इङ्को बेबालबुङ सि:हि | 28 कालाउ इङ्को बेबाल दोफा न्हिमि ओनेगेलाइ बिहु पाहि | एला सिन्चालाउ इङ्को बेबालको के चाहि हासु जेनावा ? 29 येसु:जोबाफ पिहि,''नेलाइ या काथा माबुझिसुखेना हाइपालिपानु द धर्मंसास्तरता हाइ लेखिका हि, इङ्को नेलाइ मागिसुखेना | परमेस्वरको सरबुङ्को बिसोयताबुङ हाइदोङ मागिसुखेना | 30 इङ्को बेला जेलाउ द्याङ्गेलाइ सिकासो सिन्हुतावा इन्ता बिहुको बारेता प्रश्न दोङ मालावा | द्याङगेलाइ इन्ता एमिसो भेनेङदोफा बिहु मापाङ | गोताङ द्याङ्गेलाइ स्वर्गको स्वर्गदुतगेलाइ भाइपाङ जेनावा | 31 ओदोङ भाअ्सिङ सिन्चालाउको बिसोयता परमेस्वर नेलाइहेङ हाइ दोअ्का हि | इङ्को पढेका मान्थुसुना | 32 परमेस्वर दोअ्का हि,'का आब्राहामको परमेस्वर,इसाहाकको परमेस्वर, कालाउ याकुबको परमेस्वर सि:का द्याङगेलाइको परमेस्वर माको भरू बान्चिकागेलाइ दोअ्फा हिखे |'' 33 द्याङगेलाइ हिङ्हि कालाउ येसु:को धिरपाकाता ओबालाइ आबाइ तुअ्हि | 34 येसु:सादुकिगेलाइहेङ एसापा जोबाफ पितेङ इम्बालाइहेङ सिकापा बानाइ पिका हिन्तेङ फारिसिगेलाइ जोम्हि | 35 एअ्मि फारिसि मोसाको ब्यवस्थाता मेनाङ बुदि् हिका हिघाहि | ओदोङ द्याङ येसु:हेङ जाचिलि इच्सा पाहि | 36 ओदोङ द्याङ येसु:हेङ हिअ्हि,''गुरुज्यु, ब्यबस्थाता झाराङ खान्तेङ बारका आग्या हिदोइ हि ?'' 37 येसु:जोबाफ पिहि,''ना गोताङ हृदयसो, गोताङ आत्मासो कालाउ गोताङ मनसो प्रेम पालि गोइखे | 38 इदोइदोङ लाम्फा कालाउ झाराङ खान्तेङ माहान आग्या या | 39 न्हेतेङ आग्या चाहि लाम्फाको जुसोङ | भाङका हि:'ताइमिङ भाइपाङ आरु भेनेङ द्याङगेलाइहेङ बुङ प्रेम पालि गोइखे |'' 40 अगमबक्ता गेलाइको गोताङ ब्यवस्था कालाउ रचना गेलाइ इदोइदोङ /यादोङ/ न्हेलोङ आग्यागेलाइता आधारित हि |'' 41 जेलाउ इन्ता फारिसिगेलाइ जोम्तेङ हिघाहि,येसु:इम्बालाइहेङ एलोङ काथा हिअ्हि, 42 ख्रिस्तको बिसोयता नेलाइको हाइ बिचार हि कुनु ? वा हासुको चान कुनु |''कालाउ फारिसिगेलाइ दोअ्हि,''ख्रिस्तु दाउदको चान | 43 कालाउ न्हुसो येसु:फारिसिगेलाइ दोअ्हि,''एदि एन्सापानु दाउद हाइपालि वासिहेङ 'परमप्रभु' दोअ्हि ? दाउद पबित्तरो आत्माको सरबुङसो धुइतेङ हिघाहि | 44 दाउद दोअ्हि,'प्रभु काङ्को प्रभुहेङ दोअ्हि,काङ्को दाम्पाहा योम,कालाउ का नाङ्को सतुरगेलाइ हेङ खाबाराता ता-ताङका |' 45 दाउद ख्रिस्तहेङ 'परमप्रभु'दोअ्खे | एन्सा पानु हेसा वा दाउदको चान जेङ्हि रो ?'' 46 हिदोइबुङ फारिसिगेलाइ येसु:को इङ्को प्रस्नको जोबाफ पिलि मादोअ्हि | कालाउ ओदोङ दिना सो हासुबुङ येसु:हेङ आरुङ हेन्जा प्रस्नगेलाइ हिअ्लि साहस मापाहि |