मत्ती 21

जेलाउ येसु:कालाउ वाको चात्यागेलाइ यरुसलेम भेरपाको जैतुन तिकारको बेथफागेता थुकालि लोहि , कालाउ येसु:न्हेमि चात्यागेलाइहेङ इसिका दोअ्तेङ दिङ गिल्हि | 2 'नेलाइ भेरपाको देराभारि हानेसु | इन्ता थुकातेसाङ नेलाइ एलोङ गधा कालाउ वाको चान धेउका निङ्सुवाना , इङ्कोहेङ खाइतेङ काङ्कोता चुमासु | 3 हासुबुङ नेलाइहेङ हाइदोङ दोनु,'प्रभुहेङ माको खाचो हि,दोअ्सु | कालाउ वा तुरुन्तै इङ्को वा पिगिल्लावा |'' 4 अगमबक्ता पाहासो दोअ्का बचन पुरा जेनाको दोअ्तेङ या जेङ्का हि, 5 'सियोनको चामिन्दिगेलाइ दोसु, खाङ्सु ,नेलाइको राजा नेलाइकोता लोधोङ्खे, बिनम्र जेङ्तेङ गधा हुता सवार जेङ्तेङ, गधाको चान,एलोङ गधाको चानहुता धोल्तेङ |'' 6 कालाउ चात्यागेलाइ हानिहि,कालाउ येसु:ओबालाइ आराइका भाइपाङ पाहि | 7 ओबालाइ गधाको चानहेङ चुम्तेङ येसु:कोता घुरेतेङ चुम्तेङ ल्होहि | ओबालाइ गधाहेङ ताइको धावा गुअ्पाहि,कालाउ येसु:ओङ्को हुता धोल्हि | 8 येसु:यरुसलेम भारि हानिका दामा गधाता धोल्तेङ हानिहि | हेन्जाङ द्याङगेलाइ येसु:को भासिङ दामाता धावागेलाइ दा:पिका हिघाहि | आरू द्याङ्गेलाइ चाहि सिङ्को दालेङ पाल्तेङ ल्हाफा गेलाइ दामाता दा:पिहि, दा:पिका हिघाहि | 9 आधिमि द्याङगेलाइ येसु:को आगा-आगाता तेघाहि | आधिमि द्याङगेलाइ येसु:को न्हु-न्हु तेगिल्घाखे |कालाउ द्याङ्गेलाइ इसिका दोअ्तेङ र्-हिकाइलि तेङ्हि, दाउदको चान होसन्ना!'प्रभुको मिङ लोका धन्यका हि!' स्वर्गको परमेस्वरको बाखाइ पासु |'' 10 जेलाउ येसु:यरुसलेम लिता धुल्हि | गोताङ सहरको द्याङगेलाइ भाङ्भाङ्का जेङ्हि | इम्बालाइ हिअ्हि,''या सासु को ?'' 11 येसु:दोअ्फाङ लोका द्याङ जोबाफ पिहि,''वाते येसु: | कालाउ गालिल सहरको नासरत्त आगमबक्ता वा दोङ |'' 12 येसु:थानभारि हानिहि, कालाउ वा चोल्का कालाउ पिका झाराङहेङ इन्तासो दिगिल्हि | वा ताका पिका हुता चाङ्चौकिगेलाइ उन्धिपाहि | कालाउ वा कुरजा पिकालाइको चाङ्चौकिगेलाइबुङ उल्तिपाहि | 13 येसु:इनता हिका द्याङ्गेलाइहेङ दोअ्हि,''धर्मसास्त्रता इसिका लेखिका हि,'काङ्को 'सा दोम्चाकाको सा दोनाङ | कालाउ नेलाइ चाहि परमेस्वरको साहेङ डाकागेलाइको अड़ा बनाइसुना |'' 14 आधे कान्हा कालाउ आधे लेङ्ग्रा द्याङगेलाइ थानता येसु:कोता लोहि |येसु:इङ्को द्याङगेलाइहेङ एल पापिहि | 15 मुख्य धामिगेलाइ कालाउ सास्तिरिगेलाइ इदोइ द्स्य तिङ्हि | इम्बालाइ येसु:को अचम्मको कामगेलाइ कालाउ इस्वरको साता जामालाइ येसु:हेङ बाखानाइ पातेङ हिका तिङ्हि |जामालाइ दोअ्घाखे,''दाउदको चान,होसन्ना!''एदोइता धामिगेलाइ कालाउ सास्तिरिगेलाइ मारफाङ थिचोल्हि | 16 मुख्य धामिगेलाइ कालाउ सास्तिरिगेलाइ येसु:हेङ हिअ्हि,''जामालगेलाइ हाइ दोअ्तेङ हि, हाइ ना हिङ्ना?' 'येसु:जोबाफ पिहि,''एइ | हाइ नेलाइ हेलाबुङ धर्मसास्तरगेलाइता पढेका मान्थुसुना ? ''येसु:जामालगेलाइहेङ स्तुति पालि धिर्पाहि ?'' 17 कालाउ न्हुसो येसु:इङ्को थामहेङ लाअ्तेङ नगरसो बाहार बेथानिता हानिहि | इङ्को दिना इङ्सोङ बासा हि | 18 न्हुदिनाको र्-हिमाङ, येसु:नगरभारि घुरिकाताङ पालाउ वा म्हुतुहि | 19 वा दामाको काम्भे भेरपा कोसेको सिङ तिङ्हि | येसु:कोसेको सिङ भेरपा हानितेङ सेका चालि मन पाघाखे | इङ्को सिङ्ताते सेका कालाउ चाका हाइबुङ मान्थुघाखे |इङ्ताते ल्हाफा खिनिङ हिघाहि, कालाउ येसु:इङ्को सिङ्हेङ दोअ्हि,''एला उप्रान्त नाङ्कोता सेका हेलाउबुङ माजेनावा |''आचानक इङ्को सिङ चुहि कालाउ सिहि | 20 चात्यागेलाइ इङ्को तिङ्हि,ओबालाइ भारबुसाइहि | ओबालाइ हिअ्हि,''हेसापा कोसेको सिङ सेङ्हि,कालाउ उघुरु सि:सि?'' 21 येसु:दोअ्हि,''का नेलाइहेङ जातिङ्को दोअ्खा |एदि नेलाइता खान्धुरि हिअ्नु कालाउ इङ्कोता साङ्खा मानथुनु,का भाइपाङ नेलाइबुङ पालि दोअ्सुवाना | नेलाइ इङ्को खान्तेङ हेन्जा पालि दोअ्सुवाना | ना इङ्कोहेङ दोअ्लि द्वाना,''ए लाख हाने कालाउ समुन्द्राता हुल | एदि नेलाइता खान्धुरि हिअ्नु,नेलाइ दोअ्का भाइपाङ दोङ जेनावा | 22 खान्धुरि पातेङ र्-हेसुवाना पानु,नेलाइ दोम्चाकाइकाता र्-हेसुवाना,हिदोइबुङ आनेमानेबुङ निङ्स्वाना | 23 येसु:थानको सा भारि हानिहि | कालाउ वा धिरपाकाताङ पालाउ, मुख्य धामिगेलाइ कालाउ द्याङ्गेलाइ येसु:कोता लोहि | इम्बालाइ येसु:हेङ दोअ्हि,''केलाइहेङ दोअ्सु | इदोइ कामगेलाइपालि नासिहेङ हाइ खाबारा हि ? इसिका खाबरा नासिहेङ हासु पिहि ? '' 24 येसु:जोबाफ पिहि,''काबुङ नेलाइहेङ एलोङ काथा हिअ्हि मन पाखा | एदि नेलाइ कासिहेङ जोबाफ पिहेपानु, का हिदोइ खाबारा सो इदोइ कामगेलाइ पादोङ्खा दोअ्तेङ दोअ्ताङका | 25 'कासिहेङ दोअ्सु:यु:हान्नाको: बपतिस्ता परमेस्वरसो ना द्याङ हासुपाहासो जेङ्हि ? मुख्य धामिगेलाइ कालाउ यहुदि नेतागेलाइ येसु:को इङ्को प्रस्नको बारेता काथा दुसुलि तेङ्हि | इम्बालाइ ताइ-ताइमि काथा पालि तेङ्हि,''एदि केलाइ यु:हान्नाको: बपतिस्ता परमेस्वरसोङ जेङ्काहिदोनु वा दावा,'एन्सापानु नेलाइ हाइ पालि यु:हान्नहेङ: खान्धुरि मापासुना ?' 26 एदि केलाइ 'इदोइ बपतिस्ता द्याङ्पाहा सो दोङ जेङ्का हिघाहि,दोअ्हे पानु गोताङ द्याङ्गेलाइ केलाइ दोफा चेरतापावा | केलाइ द्याङगेलाइसो थिलि गोयाङ हाइपालिदोनु, इम्बालाइ झाराङ यु:हान्नाहेङ: अगमबक्ता दोतेङ खान्धुरि पाखे |'' 27 कालाउ न्हुसो इम्बालाइ येसु:हेङ जोबाफ पिहि,''यु:हान्नाहेङ: हिसो सो इङ्को खाबारा पिहि, केलाइ मागिनाखे |''जेलाउ येसु:बुङ दोअ्हि,''एन्सापानु काबुङ माअ्दोङ्का कि.का हिदोइ खाबारा सो इदोङ गोताङ कामगेलाइ पादोङ्खा |'' 28 'नेलाइ याको बारेता हाइ दोसुखेना ? सोचिसुखेना ? एमि द्याङको न्हेमि चान हिघाहि | इङ्को द्याङ ताइको जेठा चानहेङ दोअ्हि,'चान हाने कालाउ हानेतेङ नानि दाखबारिता काम पा |' 29 चान जोबाफ पिहि, का मान्हाङ्का |'कालाउ वा न्हुसो ताइ मन बिचार घुरिहि,कालाउ हानेहि | 30 कालाउ न्हुसो आबा भेनेङ चानदोफा हानिहितेङ दोअ्हि,'चान,हाने कालाउ नानि काङ्को दाखबारिता काम पा |'चान जोबाफ पिहि,'ते,आबा,का हानितेङ काम पाङ्का | इङ्को चान ते मान्हेहि | 31 'एला इदोइ न्हेलोङ चानगेलाइसो हासु चाहि ताइको आबाको आग्या पालन पाहि | यहुदि नेतागेलाइ जोबाफ पिहि,''जेठा चाहि |''येसु:इम्बालाइहेङ दोअ्हि,''का जातिको काथा नेलाइहेङ दोअ्खा पोत ल्होपाकागेलाइ कालाउ कासिबिरि , मारेम्का द्याङगेलाइ दोअ्तेङ ठानिसुखेना | कालाउबुङ परमेस्वरको सारभिता नेलाइ खान्तेङ लाम्फा ओबालाइ दुल्लि निनावा | 32 यु:हान्ना थिक जिवन बान्चिपाका उपाय तिङ्पालि लोका हिघाहि | कालाउबुङ नेलाइ युहन्नाहेङ पटकै खान्धुरि मापासुना | भरु पोत ल्होपाकागेलाइ कालाउ कासिबिरिगेलाइ यु:हान्नाहुता खान्धुरि पाहि | कालाउ पोत ल्होपाका कालाउ कासिबिरि गेलाइ यु:हान्नाहेङ खान्धुरि पाका इम्बालाइ तिङ्का हिघाहि | कालाउबुङ इम्बालाइ वासिहेङ खान्धुरि पालि मन मापाहि | 33 'या निङ्का हिङ्सु: हिदोइबुङ द्याङको मिलिङ हिघाहि | वा इङ्को मिलिङ्ता दाख लगाइहि | वा दाख मिलिङ्को कोरपाहाङ बेरेम खोराइ हि | कालाउ इन्ता लिता दाख पेलेका कोल बनाइका हिघाहि | आरूङ इङ्को द्याङ एलोङ खोपारा बनाइहि | वा ताइ मिलिङ आधिमि आध्यागेलाइको जिम्माता लाअ्पितेङ वा इन्तासो हानिहि |दाम लोअ्हि | 34 जेलाउ फसल ल्होपाका सोमय लोहि ,कालाउ इङ्को द्याङ ताइ चाकारिया गेलाइहेङ सेकाको ताइ भाग चुमालि दिङ्गिल्हि | 35 'आध्यारागेलाइ इङ्को चाकारियागेलाइहेङ रिम्हि कालाउ एमिहेङ दानाइहि ,भेनेङ्हेङ सेअ्हि आरुङ भेनेङ्हेङ चाहि उन्थुइहोइ दानाइतेङ सेअ्पिहि |'' 36 आरुङ इङ्को मिलिङ्को माझन आध्यारागेलाइकोता आरु चाकारियागेलाइ दिङ्गिल्हि | वा लाम्फाको खान्तेङ हेन्जा चाकारियागेलाइ दिङ्गिल्का हिघाहि | कालाउबुङ आध्यारागेलाइ ओबालाइ दोफाबुङ इन्सिकाङ ब्याउरा पाहि | 37 ''कालाउ न्हुसो वा ताइकोङ चानहेङ आध्यागेलाइ कोता दिङगील्हि | वादोअ्हि, आध्यागेलाइ काङ्को चानहेङ आदारपावा |'' 38 ''किसानगेलाइ ता-ताइमिता सल्लापाहि,'या ते माझनको चान कि रो! | या मिलिङ वाको जेनावा | केलाइ यासिहेङ सेअ्हेपानि या मिलिङ केलाइकोङ जेनावा |'' 39 कालाउ किसानगेलाइ चानहेङ रिम्तेङ वासेहेङ मिलिङ बाहार सेअ्तेङ थाइ गिल्पि हि | 40 'एला इङ्को मिलिङ्को माझन लोतेङ इङ्को किसानगेलाइहेङ हाइ पावा ?'' 41 इङ्को यहुदिधामिगेलाइ कालाउ नेतागेलाइ दोअ्हि,''वा इङ्को दुष्टगेलाइहेङ वा हेसापालाउबुङ सेअ्तावा | कालाउ न्हुसो वाको मिलिङ आरु भेनेङ किसानगेलाइहेङ चौइलि प्यावा | ज्याइ सेकाको सोमयता माझनहेङ वाको भाग बुझाइलि चुमावा ओबालाइहेङ इङ्को मिलिङ कमाइलि प्यावा |'' 42 येसु:इम्बालाइहेङ दोअ्हि,''जातिङ्को नेलाइ इङ्को धर्मसास्तर पदेका हिसुना, जेदोङ उन्थुइहेङ डकर्मीगेलाइ रद पाहि,ओदोङ उन्थुइ मुख्य कुन्हाको उन्थुइ जेङ्हि, या परमप्रभु पाका भाङ्भाङ्का हि |'' 43 'ओदोङ भाअ्सिङ का नेलाइहेङ दोअ्खा ,परमेस्वरको सारभि नेलाइकोसो धिरप्यावा | कालाउ न्हुसो परमेस्वर इसिका गेलाइ द्याङगेलाइहेङ प्यावा,ज्याइ परमेस्वर ताइको सारभिता चाहेका जोसोङ काम पापिखे |'' 44 कालाउ हासुबुङ इङ्को उन्थुइ हुता हुल्लावा वा टुक्रा-टुक्रा जेन्तेङ पोङन्हावाका जेनावा | एदि इङ्को उन्थुइ हासुकोङ्बुङ हुता हुल्नु इङ्को वासिहेङ धुलाको तोले भाइपाङ बनायावा |'' 45 येसु:निङ्पिका को माने मुख्य धामिगेलाइ कालाउ फारिसिगेलाइ हिङ्हि | येसु:ओबालाइ को बिसोयता धुइदोङ्खे दोअ्का काथा इम्बालाइ बुझिहि | 46 इम्बालाइ येसु:हेङ रिम्लि दाउ भोगिल्तेङ हिघाहि | इम्बालाइ चाहि द्याङगेलाइसो थिघाहि | हाइपालिदोनु द्याङ्गेलाइता येसु:चाहि एलोङ अगमबक्ता दोअ्तेङ खानधुरि पाधाखे |