मत्ती 20

'स्वर्गको सारभि मिलिङ्को एलोङ माझन भाइका हि,ज्याइदोङ र्-हिमाङ ताइको दाखबारिता खेतालागेलाइहेङ ताका पितेङ काम लगाइलि बाहार उल्लिहि | 2 खेतालागेलाइ दोफा ए दिनाको निङ्का ज्याला इदोइ झोको दोतेङ वा ओबालाइहेङ ताइको दाखबारिता दिङ्गिल्हि | 3 जेलाउ वा क्वा बजेको पहर बाहार उल्लिहि, वा आरूगेलाइहेङ हातेता मेनाङ जागिल्का तिङ्हि, 4 कालाउ वा इम्बालाइहेङ दोअ्हि, नेलाइबुङ दाखबारिता हानेसु,कालाउ नेलाइहेङ जेदोङ थिक हि का नेलाइहेङ प्याङका |'' 5 कालाउ इम्बालाइ इन्ता हानेहि | आरूङ वा तेन्हे बजेको पहर कालाउ सुम बजेको पहर बाहार उल्लितेङ एनसाङ पाहि | 6 वा ना बजेको पहर बाहर उल्लिहि आरूङ भेनाङ्गेलाइहेङ मेनाङ जा गिल्तेङ हिका निङ्हि, कालाउ ओबालाइहेङ दोअ्हि | 'नेलाइ हाइपालि इता लिपाङ मेनाङ जातेङ हिसुखेना ?' 7 'कालाउ ओबालाइ वासिहेङ दोअ्हि,'केलाइहेङ हासुबुङ ज्यालाता काम लागाइका मान्थु | कालाउ वा ओबालाइहेङ दोअ्हि,'नेलाइबुङ दाखबारिता हानेसु | 8 'जेलाउ बेल्लाका पहर जेङ्हि, दाखबारिको माझन ताइको काम पाकालाइहेङ दोअ्हि, खेतालागेलाइ काइतेङ न्हुसो थेकापा लोकागेलाइ कालाउ लाम्फा लोकालाइ थेकापा सो ओबालाइहेङ कामको ज्याला पिसु |' 9 'ना बजेको पहरता कामता लागेकालाइ लोहि,कालाउ इम्बालाइ झाराङ पुरा दिनाको ज्याला निङ्हि | 10 जेलाउ लाम्फा ज्यालाता लागेकागेलाइ लोहि | कालाउ इम्बालाइ आसा हेन्जादोङ निनाङ दोअ्तेङ बिचार पाहि,कालाउबुङ इम्बालाइ झाराङ ए दिनाको ज्याला निङ्हि | 11 कालाउ ज्याला निङ्लि दोतेङ मिलिङको माझनको बिरुद्ता इम्बालाइ गन-गन पालि तेङहि | 12 ओबालाइ दोअ्लि तेङहि,'इदोइ न्हुसो लोकालाइ ए पहर खिनिङ कामपाहि, कालाउबुङ ना इम्बालाइहेङ केलाइ लिपाङ काम पाका हिका फुका कालाउ चेराका भेम्का सहिकागेलाइ भाइपाङ बानाइका पाना | 13 'कालाउ वा ओबालाइ सो एमिहेङ जोबाफ पिहि |''सानाइति का नासिहेङ हाइदोङ अन्याय पाका मान्थुघा | हाइ ना कादोफा पुरा एनिको ज्यालाता काम पालि राजि जेङ्का माकोरो ? 14 नाङ्को निङ्का ज्याला चुम्तेङ हाने | या न्हुसोको हेङ्बुङ नासिहेङ हेथे पिघा ओदोङ झोकोका प्याङ्का | 15 काङ्को दोफा हेथे हि,इङ्को का ताइमिङ्दोङ चाहिका जति पालि माद्वाङ्का रो ? काङ्को उदारता ता नाङ्को मिसिया हाइपालि तुखे ? 16 'ओदोङ भाअ्सिङ न्हुसोको लाम्फा जेनावा कालाउ लाम्फाको न्हुसो जेनावा |'' 17 यरुसेलेमभारि हानिकाताङ पालाउ येसु:ताइको तेन्हे चात्यागेलाइहेङ भन्चापातेङ दामाता ओबालाइहेङ दोअ्हि | 18 'केलाइ यरुसेलेमभारि हानिनाखे | एला द्याङ्को चान मुख्य धामिगेलाइ कालाउ सास्तिरिगेलाइको खुरता ताअ्पिप्यावा, कालाउ इम्बालाइ वासिहेङ सिकाको दण्ड कालाउ दुसियावा | 19 वासिहेङ खुजालाइयावा, द्वाली लगाइयावा ,कालाउ क्रुस्ता तोइलि दोतेङ ओबालाइ वासिहेङ खान्धुरि मापाका गेलाइको खुरता ताअ्पिप्यावा, कालाउबुङ वा सुम्निता बान्चितेङ ल्होकावा |'' 20 जेलाउ जब्दियाको चानगेलाइको आमाइ ताइको चानगेलाइ हेङ दोफाङ चुमातेङ येसु:आगता तिरहु थोतेङ वाको दोफा बिन्ति पाहि (सेउपाहि )| 21 येसु:वासिहेङ हिअ्हि,''ना हाइ भोखेना ? ''वा,येसु:हेङ दोअ्हि,''आग्या पिसु कालाउ नाङ्को सारभिता, काङ्को इदोइ न्हेलोङ चानगेलाइ एमि नाङ्को दामपाहा खुरभारि, कालाउ भेनेङ चाहि नाङ्को केअ्पाहा खुरभारि योम्लि निनाको |'' 22 कालाउ येसु:जोबाफ पिहि | नेलाइ हाइ र्-हेते्ङ हिसुखेना इङ्को मागिसुखेना | जेदोङ कचौरा जामबातिता का आम्लि खाङ्का हिघा | हाइ नेलाइ इङ्को आम्लि दोअ्सुवाना | ओबालाइ दोअ्हि,''द्वाङ |'' 23 येसु:दोअ्हि,''काङको जामबाति नेलाइ आम्सुवाना | कालाउबुङ काङ्को दामापाहा कालाउ केपाहा योमलि पिका काङ्को खाबारा खुरता मान्थु | एदोइ थामे नेलाइकोदोङ, ज्याइको भाअ्सिङ काङ्को आबा तियार पालि दोअ्का हि |'' 24 इदोइ काथा हिङ्तेङ तेमि इङ्को न्हेमि दाइओने दोफा मेनाङ चेरताङपाहि | 25 येसु:ओबालाइहेङ ताइदोफा काइतेङ दोअ्हि | नेलाइहेङ थाहादोङ हि,येसु:हेङ मानिङ्का लाइको सासकगेलाइ नेलाइ दोफा निरङ्कुस सासन पावा | कालाउ बा -बारकागेलाइ नेलाइ दोफा खाबारा पावा | 26 नेलाइको माझाता इसिका माजेनाङ, कालाउबुङ ज्याइ नेलाइकोता बारका जेङ्लि मन पाखे |वा चाहि नेलाइको सेवापाका चारिया जेङ्लि गोयावा | 27 जेदोङ द्याङ नेलाइसो लाम्फा जेङ्लि मन पाखे | वा नेलाइको बान्धाइति जेनावा | 28 जेसाङ द्याङको चानबुङ सेवा निङ्लि माको भरु सेवा पालि कालाउ हेन्जाङ द्याङ्गेलाइको ताका तिरेतेङ लाअ्पालि कालाउ ताइको जिउ पिलि लोहि | 29 ओबालाइ यरिहोसो हानिकाताङ पालाउ, एलोङ बारका जेर वाको न्हु हानिहि | 30 दामाको आलि भारि योमतेङ हिका न्हेमि कान्हागेलाइ येसु:इदोइदोङ दामा हानिदोङ्खे दोअ्का हेङ्तेङ एसा दोअ्तेङ रहिकाहि, हे' प्रभु, दाउदको चान,केलाइहेङ दाया पासु |'' 31 इङ्को जेरगेलाइ ओबालाइहे सिकापा हिसु दोतेङ चेरहि | कालाउबुङ ओबालाइ झन इसिका दोतेअ्ङ बलपातेङ र्-हिकाइहि | '' हे' प्रभु, दाउदको चान,केलाइहेङ दाया पासु |'' 32 जेलाउ येसु:तक्क जाहि कालाउ ओबालाइहेङ काइतेङ दोअ्हि,''नेलाइ हाइ भोसुखेना ? का नेलाइको भाअ्सिङ हाइ पापिलि ?'' 33 ओबालाइ वासिहेङ दोअ्हि,''हे' प्रभु,केलाइको मिसियाँ हिअ्पि |'' 34 येसु:थिपातेङ ओबालाइको मिसियाँ साइपिहि,कालाउ ओदोङ घुरि ओबालाइ मिसियाँ तिङहि,कालाउ ओबालाइ वाको दोफा हानिहि |