मत्ती 18

एन्सालाउदोङ चात्यागेलाइ येसु:दोफा लोतेङ कालाउ हिअ्हि,''स्वर्गको सारभिता झाराङ खान्तेङ बार्का माहान हासु वाला ?'' 2 येसु:एलोङ म्हुइका जाम्बालहेङ ताइ दोअ्फा काइहि | कालाउ चात्यागेलाइको आगाता इङ्को जाम्बालहेङ जापाहि | 3 कालाउ दोअ्हि,''का नेलाइहेङ जातिङ्को दोअ्खा | एदि नेलाइ आतुइका जामालगेलाइ भाइपा माफेरिसुना पानु नेलाइ हेलाउबुङ स्वर्गको सारभिता दुल्लि मादोअ्सुवाना | 4 ताइमिहेङ इदोइ आतुइका जामालाइ भाइपाङ नम्र बनाइलि दोअ्खे वा दोङ स्वर्गको सारभिता माहान जेनावा | 5 'जेदोङ द्याङ्गेलाइ इदोइ म्हुइका जाम्बालाइहेङ काङ्को मिता ग्रहन पानु,वा कासिहेङ बुङ ग्रहन पाका हायावा |'' 6 एदि एलोङ म्हुइका जामाल काङ्को हुता खाङ्धुरि पानु | कालाउ हासुबुङ इङ्को म्हुइका जाम्बालहेङ पाप पालि लगाइहे पानु,इङ्को द्याङ्को भाअ्सिङ मेनाङ मारेम्का जेनावा | वाको भाअ्सिङ ते निर्-घाता एलोङ बारका (जान्ता)जातो तोइपितेङ वासिहेङ्दोङ वाङ्खाराका समुन्द्रता ह्वालि रेम्काङ जेनाङ | 7 जेदोङ कारनसो द्याङ्गेलाइ पाप पापाखे या सुमिङ्ता का इङ्को द्याङ्गेलाइको भाअ्सिङ दु:ख जेङ्खा | इसिका घाटाना जेङ्लि गोयाङ | कालाउ इसिका काम पाकालाइहेङ हेलाउबुङ रेम्का माजेनावा | 8 एदि नाङ्को खुरखोकोइ नासिहेङ पाप पालि लागाइनु इङ्को पाल्तेङ थाइगिल्पि | न्हेनोङ खुर कालाउ न्हेनोङ हेलाबुङ मासिका अनन्तको नरकको मेता थाइगिल्लि खान्तेङ भरु लुला कालाउ लेङग्रा जेन्तेङ हिलि नाङ्को भाअ्सिङ रेम्का जेनावा | 9 एदि नाङ्को मिसियाँ नासिहेङ पाप पालि लगाए पानि इङ्कोहेङ उल्लापातेङ थाइगिल्पि | न्हेनोङ मिसियाँ जेन्तेङबुङ जेलाउबुङ नरकको मेता थाइगिल्लि खान्तेङ ते भुरु काना जेतेङ जिवनभरि हिअ्लि नाङ्को भासिङ रेम्का जेनावा | 10 'होसियार हिसु | नेलाइ इदोइ म्हुकाइसो एअ्मिहेङबुङ हेला मापासु | हाइपालि दोनुका नेलाइहेङ दोअ्का,इदोइ जामालगेलाइको स्वर्गता दुतगेलाइ हि | कालाउ इम्बालाइ नाङ्को आबाको दर्सन दिनाङ पातेङ ह्यावा | 11 हाइपालिपानु परमेस्वरको चान राम्कालाइहेङ बान्चिपालि लोका हि | 12 'नेलाइ हाइ बिचार पासुखेना ? एदि हिदोइबुङ द्याङ्को नाकुरि भेडा मेसा हि, कालाउ हिदोइबुङ एलोङ राम्नु,आरूङ भेनेङ द्याकुरि ते-क्वाहा भेडा मेसाहेङ तिकारता ताअ्तेङ कालाउ वा राम्का भेडा मेसाहेङ भोलि मान्हावारो ? हाइ या ठिक माकोरो ? 13 जेलाउ वा राम्का भेडा मेसाहेङ निङ्हेपानु,जातिङ्को का नेलाइहेङ दोअ्खा | इङको द्याकुरि ते-क्वाहा भेडा मेसा खान्तेङ वा इङको एलोङको भाअ्सिङ वा हेन्जा लेङ्चावा | 14 एसाङदोङ स्वर्गता हिका नेलाइको आबाको इसिका इच्सा हि,कि इदोइ आतुइका जामालगेलाइसो एमिबुङ मारामाको | 15 'जेलाउ नाङ्को ओने कालाउ बेजान ओने नाङ्को बिरूद्ता अपराध पानु जेलाउ वा एअ् कुन्हाता ह्यावा ना वाकोता हाने | कालाउ वा हाइ गल्ति पाका हि वासिहेङ सम्झाइ | एदि वा नाङ्को काथा हिङ्पिहिपानु, नाङ्को ओने नाङ्को जेनावा | 16 एदि वा हिङ्लि माकिपिनु,ताइ दोफा आरुभेनेङ सानाइति एमि न्हेमिहेङ चुम्तेङ हाने कालाउ न्हेमि सो सुमि गवाहिसो गोताङ काथागेलाइ पक्का जेनाको | 17 एदि वा नेलाइको काथाबुङ हिङ्लि माकिनु,वासिहेङ मण्डलिको आगाता चुमासु | मण्डलिको द्याङ्गेलाइ दोअ्काबुङ मासानु वासिहेङ परमेस्वरता खान्धुरि मापाका कालाउ पोत ल्होपाका भाइपाङ ब्याभाहार पासु | 18 जातिङ्को,का नेलाइहेङ दोअ्खा ,नेलाइ पृथ्विता जेदोङ धेउस्वाना, इङ्को स्वर्गता धेउनावा | कालाउ नेलाइ पृथ्विता जेदोङ खाइस्वाना इङ्को स्वर्गता खाइप्यावा | 19 'का नेलाइहेङ दोअ्खा,''इदोइ पृथ्विता हिदोइबुङ कथाकोबारेता नेलाइसो न्हेमि मिलितेङ सहमति जेङ्सुवाना पानु कालाउ इङ्को भासिङ दोमचाकाइनु | कालाउ नेलाइ हिदोइ आमेनेको भासिङ दोमचाकाइसुवाना इङ्को काङ्को स्वर्गिय आबासो निङ्सुवाना | 20 इङ्को जातिङको,हाइपालिदोनु न्हेमि वा सुमिका दोफा खान्धुरि पातेङ जोम्हे पानि,का नेलाइको इन्ता नेलाइको दोफा ह्याङका |'' 21 जेलाउ पतरुस येसु:कोता लोतेङ हिअ्हि,''प्रभु काङ्को ओने काङ्को बिरोधता घुरि घुरि गल्ति पाखे,का हेअ् पल्ट थेकापा वासिहेङ माफ पिली? हाइ न्हि पल्ट थेकापा ? 22 येसु:जोबाफ पिहि,''का नेलाइ झाराङ्हेङ दोअ्खा ,एदि वा गल्ति पातेङ हिअ्लाबुङ ना न्हि गुना सुमकुरि ते पटक स्यामा पिलि गोइखे |'' 23 'इङ्को भाअ्सिङ स्वर्गको सारभि एलोङ राजा भाइका हि,ज्याइदोङ ताइको नोकर गेलाइसो हिसाब मिलिपालि निश्चय पाहि, 24 राजा हिसाब मिलिपालितेङ हि | वाको एलोङ नोकर ते हाजार चांदिको सिक्काको रिनि हिघाहि | 25 इङ्को नोकर रिन तिरिलि मादोका जेङ्हि | कालाउ राजा वासिहेङ दोअ्हि,नाङ्को बे,कालाउ चान चामिन्दि कालाउ ना दोफा हिका गोताङ आनेमाने पितेङ रिन चुक्ता पालि आदेस पिहि | 26 कालाउ इङ्को चाकारिया माझनको खोकोइ तुघुरतेङ चाहि कालाउ सेउपाहि ,''काङ्को भाअ्सिङ आतुइसा र्-हुम्पि | कालाउ कासिहेङ लागेका जेथे रिन हि का तिरियाङका | 27 इङ्को कथा हिङ्तेङ राजाहेङ चाकारिया हुता द्याङ जेङ्हि | कालाउ वा वासिहेङ रिन तिरिलि मागोयाङ दोअ्हि कालाउ वासिहेङ रिन मुक्त जेन्तेङ हानिलि पिहि | 28 न्हुसो,इङ्को नोकर भेनेङ चाकरियाहेङ दुसुहि,ज्याइदोङ वाकोसो एसाइ चांदिको सिक्का रिन र्-हुका हिघाहि | वाको निरघा एरितेङ दोअ्हि,''नाङ्को रिन एलाउदोङ तिरिलि दोपा |'' 29 कालाउ इङ्को नोकर तिरुथोतेङ सेउपालि तेङ्हि,''कासिहेङ दाया पा का नाङ्को गोताङ रिन चुक्ता पाउका |'' 30 इङ्को लाम्फाको चाकारिया र्-म्हिलि मादोहि | वा भेनेङ चाकरियाको बिरुद्ता उजिरि ह्वाहि कालाउ वासिहेङ जेल्ता चुम्पु पिहि | रिन तिरिलि मादोपा भरि वा जेल्ता हिलि गोइहि |'' 31 आरू भेनेङ चाकरियागेलाइ इङ्को घाताना तिङ्हि | इम्बालाइ दु:खि जेङ्हि,कालाउ इम्बालाइ ताइको माझनहेङ इङ्को गोताङ घाटानाको बिसोयता हिम्पा पिहि | 32 'जेलाउ माझन चाकरियाहेङ काइहि कालाउ वासिहेङ दोअ्हि,'ए नाते दुस्त चाकरिया | ना काङ्कोसो हेन्जा रिन चुम्पुका हिघाखेना | ना का दोफा सेउपाना कालाउ का नासिहेङ माफ पापिघा | ना चाहि नाङ्को रिनिहेङ दाया तिङ्पालि मादोना | 33 का नासिहेङ दाया पाका भाइपाङ नाबुङ वासिहेङ दायालि गोइका माकरो ? 34 माझन मारफाङ चेर ताङ्पाहि कालाउ दण्ड पिलिको भाअ्सिङ इङ्को चाकरियाहेङ झयालखानाता हवा पिहि | गोताङ रिन मातिरिपा भरि वा जेलतादोङ हिलि गोइहि | 35 'राजाबुङ स्वर्गता हिका काङ्को आबा हाइ पाखे इङ्कोङ पाहि | एदि नेलाइ झाराङ ताइको दादा ओनेगेलाइहेङ ताइको हृद्यसो माफ मापाना पानु,काङ्को स्वर्गको आबा बुङ नासिहेङ माफ माप्यावा |''