मत्ती 17

कालाउ येसु:तुनि न्हुसो ताइदोअ्फा पतरुस,याकुब कालाउ यु:हान्ना हेङ चुम्तेङ एलोङ झाउका लाख भारि चुम्पुहि | इम्बालाइ चाकामान्दा थामेता हिघाहि | 2 इम्बालाइको मिसिया आगाता,येसु:को जिउ भाङगिन्हाहि | कालाउ वाको होङका लोखोन तालि भारपाङ जेका जेङहि | 3 कालाउ इम्बालाइ न्हेमि द्याङ दोफा येसु:नुइ धुइतेङ हिका तिङ्हि | ओबालाइ मोसा कालाउ एलिया हिघाहि | 4 पतरुस येसु:हेङ दोअ्हि,''प्रभु,इदोइ केलाइ इता हिका एल्काङ जेङ्हि | इदोइ एल्काङ हि,एदि ना मन पानु का इता सुम्लोङ खोपारा धामाङका,एलोङ नाङको भाअ्सिङ,भेनेङ मोसाको भाअ्सिङ कालाउ एलोङ चाहि एलियाको भाअ्सिङ | 5 जेलाउ पतरुस काथा पाकानाङ हिघाहि,एन्साउदोङ एक्कासि एलोङ फाइसालामका बादेलहोइ इम्बालाइहेङ ठुम्ही | बादेललितासो एलोङ गाला उल्हिहि | गाला इसिका हिघाहि,या काङ्को चान कालाउ का यासिहेङ मायारू पाखा | का वाको दोफा हेन्जाङ लेङचाखा | याको काथा दोअ्का किसु |'' 6 चात्यागेलाइ इङ्को गाला हिङ्हि | इम्बालाइ मेनाङ थिहि,कालाउ ओबालाइ पोम्भेलेहि | 7 येसु:ताइ चात्यागेलाइ दोफा लोहि | कालाउ ओबालाइहेङ साइहि | कालाउ वा दोअ्हि,''ल्होसु | नेलाइ थिलि मागोइसुवाना |'' 8 चात्यागेलाइ पुलुक्क खाङ्हि,हासुहेङबुङ मातिङ्हि | इन्ता येसु:खिनिङ हिघाहि | 9 येसु:कालाउ वाको चात्यागेलाइ लाखसो लेता खुअ्दोङ्धाखे | वा चात्यागेलाइ हेङ आग्या पिहि,रा ता नेलाइ तिङका इङको घाटाना गेलाइको बारेता द्याङको चान सिका सो सिन्हुतेङ माल्होपा थेकापा हासुहेङ बुङ हाइदोङ मादोसु |कालाउ न्हुसो खिनिङ नेलाइ तिङ्का काथागेलाइ द्याङगेलाइहेङ दोअ्सु |'' 10 चात्यागेलाइ येसु:हेङ हिअ्हि,''हाइपालि ब्यबस्थाका सास्तिरिगेलाइ ख्रिस्त लोका खान्तेङ लाम्फा एलिया लोलि गोयाङ दोखे ?'' 11 कालाउ येसु:दोअ्हि,''एलिया लोधोदोङ खे दोअ्तेङ ओबालाइ थिकोङ दोअ्का हि | कालाउ या जातिङभारि ना एलिया दोङ ल्वाङ कालाउ गोताङ काथाको थिकसो ब्यबस्थापाङ | 12 का नेलाइहेङ दोअ्खा,एलिया लाम्फाङ लोलिदोअ्होइ,कालाउबुङ इम्बालाइ वासिहेङ मानाल्खे | वासिहेङ ओबालाइ जेदोङपालि खाङधाखे एन्साङ पाहि | एन्साङ द्याङको चानहेङबुङ ओबालाइको खुरसो दान्हाइ निन्चावा |'' 13 कालाउ खिनिङ चात्यागेलाइ इम्बालाइहेङ बपतिस्ता पिका युहन्ना:को बिसोयता दोअ्का रैइसो दोअ्तेङ बुझिहि | 14 येसु:कालाउ वाको चात्यागेलाइ आरुङ द्याङ्गेलाइ हिका थामेता हानिहि | एलोङ द्याङ येसु:को आगाता हानितेङ तुघुरहि | 15 इङ्को द्याङ दोअ्हि,''परमप्रभु, काङ्को चानहेङ दायापापि | वासिहेङ झाका लोङ्का बेथा खोअ्का हि | इदोइ बेथासो वा साताइन्हाका हि | काङ्को चान धुरिधुरि मेता कालाउ चि:ता लोङखे | 16 का काङ्को चानहेङ नाङ्को चात्यागेलाइकोता चुमाघा, ओबालाइ वासिहेङ एल्पालि मादोअ्हि |'' 17 येसु:जोबाफ पिहि,नेलाइदोफा खान्धुरि मान्ठु | नेलाइको जिवनदोङ भ्रष्ट हि | नेलाइदोफा हेलाउ थेकापा का ह्याङका ? नेलाइदोफा हेलाउ थेकापा का र्-हुमतेङ हिअ्लि ? इङ्को वाजानहेङ इसो चुमासु |'' 18 येसु:इङ्को वाजान लिता हिका भुतहेङ बाहार उल्लिपिहि दोअ्हि | कालाउ इङ्को वाजानसो भुत बाहार उल्लिहि,कालाउ एन्साउसोदोङ इङ्को वाजान एल्हि | 19 कालाउ चात्यागेलाइ एअ्-कुन्हाता लोहि | ओबालाइ दोअ्हि,''केलाइ इङ्को वाजानसो भुत खाअ्पालि गोताङ खालको पानाहि | कालाउबुङ केलाइ इङ्को मासानहेङ दिगिल्हि मादोअ्नाहि | हाइपालि केलाइ मासान हेङ खाअ्पालि मादोअ्नाहि ?'' 20 येसु:जोबाफ पिहि,''नेलाइ मासान उल्लिपालि मादोअ्सुना,हाइपालिदोनु नेलाइकोता खान्धुरि एकदम आतुइसा हि | का नेलाइहेङ जातिङको दोअ्खा | एदि नेलाइको खान्धुरि पासाइको चालाइ झोको खिनिङ हिलाउबुङ्ते इङ्को हेमा दाङग्राहेङ ( हिमाल,पर्बत) इतासो हाने दोअ्तेङ नेलाइ इङ्कोहेङ दोअ्लि दोसुधाना | ''कालाउ इङ्को इन्तासो हानिधावा | नेलाइको भाअ्सिङ या गोताङ काथा सम्भब हिघाहि | 21 कालाउबुङ इसिका भाइका दोमचाकालाउ चाहि भुत कालाउ उपबाससो बुङ माउलियावा |'' 22 कालाउ न्हुसो,चात्यागेलाइ गालिलता जोम्हि | येसु:इम्बालाइहेङ दोअ्हि,द्याङ्को चानहेङ द्याङ्गेलाइको काबुता तातावा | 23 इङ्को द्याङगेलाइ द्याङ्को चानहेङ सेअ्तावा,कालाउबुङ द्याङ्को चान सुम्निता सिन्हुतेङ ल्होकावा | ''येसु:हेङ सेअ्ताङ दोअ्का हिङ्तेङ चात्यागेलाइको हेन्जा मन तुहि | 24 येसु:चात्यागेलाइ चुम्पुतेङ कर्फनहुमता आधिमि द्याङ पतरुसकोता लोहि | एदोइ द्याङ्गेलाइ न्हे पल्ति पोत ल्होपापाकालाइ हिघाहि | ओबालाइ पतरुसहेङ हिअ्हि,''हाइ नेलाइको गुरु न्हे पल्ति पोत तिरेखे ?'' 25 पतरुस जोबाफ पिहि,''एइ येसु:इङ्को पोतगेलाइ तिरेखे |''कालाउ पतरुस येसु:हिका साअ्ता हानिहि | पतरुस नुइधुइलि खाङ्लाउ लाम्फाङ,येसु:दोअ्हि,''इदोइ सुमिङ्ता राजा द्याङ्गेलाइ पाहासो खालखालको किसिमको पोतगेलाइ निङ्खे | कालाउ पोत तिरिका द्याङ्गेलाइ चाहि हासु ? हाइ इम्बालाइ राजाको साको द्याङ्गेलाइ ? या त इङ्को भेनेङ द्याङगेलाइ ? भासिहेङ ना हाइ द्वाना ?'' 26 पतरस जोबाफ पिहि,भेनेङ द्याङ्गेलाइ पोत तिरेखे | येसु:दोअ्हि ''एन्सा पानु राजाको ताइको जाहान पोत तिरिलि मागोइखे | 27 केलाइ एदोइ पोत ल्होपाकालाइहेङ चेर माताङपाप्याङ इङ्को भाअ्सिङ पोत बुझाइसु | पोखारिता हानेसु कालाउ हाया बन्चिता रि्मसु | ना लाम्फा रि्मका हाया चुमा,वाको नुइ आ:कालाउ एलोङ चान्दिको सिक्का निनावा | इङ्को सिक्का पोत ल्होपाकालाइहेङ पिसु | इन्तासो नाङ्को कालाउ काङ्को पोत तिरिन्हावा कालाउ द्वा |''