मत्ती 13

कोकोङ दिना येसु :सासो उल्हितेङ समुन्द्राको काम्भेता योमलाहि | 2 कालाउ हेन्जाङ बारका जेरगेलाइ वाको भेरमा लोतेङ जोमहि,:कालाउ वा नाउता घोल्तेङ योमहि,कालाउ झाराङ द्याङगेलाइ समुन्द्रको काम्भेता जाअ्हि: | 3 वा इम्बालाइहेङ निङ्पिकासो हेन्साङ काथा दोअ्पिहि | वा दोअ्हि,''एमि चालाइ बिका चालाइ बिलि उल्लि हि | 4 कालाउ बि:लाउ आधे चालाइ धामाभारि बिन्हाहि,कालाउ जिन्हा लोतेङ चापिहि | 5 आधे चालाइ आतुन्सा भोनोइहिका उन्थुइ भारि बिन्हाहि | इङ्को चालाइ मारफा योलि तेङहि: | 6 जेलाउ सान्हे धेल्हि हि, इङ्को योका चालाइ चुअ्हि:जारि मान्थुनाङ चालाइ इघुरिताङ सेङ्हि: | 7 आधे चालाइ चुइको झुन्जि भारिको माझाता बिन्हाहि,कालाउ आधेसो एकुरि ते,आधेसो सुमकुरि,आधेसो नाकुरि,दुना सेका पिहि: | 8 आधे चालाइ नोमका भोनोइता परिहि,कालाउ आधे एसाइ,आधे सुमकुरि,आधे ए कुरि तेगुना सेका फल पिहि | 9 जाइको न्हातो हि,वा हिनाको |'' 10 कालाउ चात्यागेलाइ लोतेङ वासेहेङ दोअ्हि, ''ना इम्बालाइदोफा हाइपालि निङ्पिकासो खिनिङ दोखेना ?'' 11 वा इम्बालाइहेङ जोबाफ पिहि, ''नेलाइहेङते स्वर्ग सारभिको रहस्य पिकाहि |कालाउ ओबालाइहेङ चाहि पिका मान्थु |'' 12 हाइपालिपानु ज्याइ दोफा हि:वासेहेङ्दोङ प्याङ,कालाउ वाको दोफा हेन्जाङ जेनावा | ज्याइदोफा मान्थुवा,वाको दोफा हिकाबुङ वाकोसो घिङ्प्यावा |' 13 'ओदोङ भाअ्सिङका इम्बालाइदोफा निङ्पिुकासो दोअ्पिखा,हाइपानु इम्बालाइ खाङ्नुते खाङ्खे म्हामा तिङ्खे, हिङ्नुते हिङ्खे ,म्हामा गिखे |'' 14 यसैयाको अगमबानि इम्बालाइता पुरा जेङ्का हि:| हिङनुते नेलाइ हिङसुखेना,कालाउ हेलाङबुङ मागिसुखेना | खाङ्नुते खाङसुखेना,कालाउ हेलाङबुङ मातिङसुखेना | 15 हाइपालिपानु इदोइ द्याङ्गेलाइको मन थुम्नाकाहि: कालाउ इम्बालाइ ताइको मिसिया थुम्तेङ ताअ्काहि: माकुनु इम्बालाइ मिसियाहोइ तिन्दावा, न्हातोहेङ हिन्दावा,मनसो बुझिदावा, कालाउ घुरिदावा,कालाउ का इम्बालाइहेङ एल्पा पिदाङ्का | 16 नेलाइको मिङ धन्यको हि, हाइपालिपानु वा तिङ्खे, नेलाइको न्हातोङ धन्यको हि,हाइपालिपानु वा हिङ्खे | 17 जातिङ्को, का नेलाइहेङ दोअ्खा, नेलाइ तिङ्का काथा हेन्साङ अगमबक्तागेलाइ,कालाउ धर्मिगेलाइ खाङ्लि मन पाघाखे,कालाउबुङ मातिङ्हि:,कालाउ इम्बालाइ हिङ्का काथा हिङ्लि खाङ्घाखे,कालाउबुङ माहिङ्हि: | 18 चालाइ बिकाको निङ्पिका काथा हिङ्सु | 19 जेलाउ हासुबुङ सारभिको बानाल हिनावा,कालाउबुङ माबुझियावा,कालाउ दुस्त लावा,कालाउ वाको मनता जेदोङ बिन्हाकासो घिन्तेङ चुम्पुवा | दामाभारि बिन्हाका चालाइचाहि इङ्कोदोङ | 20 आतुइसा भोनइहिका उन्थुइगेलाइता बिन्हाका चाहि इङ्कोदोङ, ज्याइ बचन हिङ्खे,कालाउ हिन्तासोङ हाउसाइतेङ वा खान्धुरि पाखे | 21 कालाउ इङ्कोको ताइकोङ जारि मान्थुनाङ इङको आतुङ्सा दिना खिनिङ बान्चिखे,कालाउ बचनको कारन होइ कस्त,सताइनाका लोतेङ्साङ इङ्को लाअ्खे | 22 चुइको माझाता बिन्हाका चालाइ इङ्कोदोङ,वा बचन हिङ्खे,सुमिङको(संसारको) सुरताहोइ,धनको मायारुहोइ रेम-रेम्का आनेमाने तिङ्तेङ बचनहेङ लाअ्पिगिल्खे | कालाउ वा सेका सेफालि माद्वावा | 23 कालाउ रेम्का मिलिङता बिन्हाका चालाइ इङ्कोदोङ,वा बचन हिङ्खे,कालाउ ताइ मनता ताअ्खे,कालाउ नाकुरि, सुमकुरि कालाउ ए-कुरिते दुना पातेङ सेफाके | 24 कालाउ न्हुसो येसु:इम्बालाइहेङ धिरपालि आरूङ भेनेङ निङ्का हिङ्पाहि | येसु:दोअ्हि,”स्वर्गको सारभि एलोङ द्याङ भाइका | जाइताइको मिलिङ्ता रेम्का चालाइ बि:हि | 25 इङ्कोङ दिनासो,न्हिसिङ्ता झाराङ द्याङगेलाइ जिमलाउ, सतुर लोतेङ गहमको माझामाझाता सामा बि:पितेङ हानेहि | 26 कालाउ बिकाको न्हेनि सुम्निता गहम योहि,कालाउ बारालि तेङ्हि,एन्सालाउ दोङ सामाबुङ बारालि तेङहि 27 वाको चाकारियागेलाइ लोहि कालाउ दाइनियाहेङ हि:हि,नेउ,ना ताइको मिलिङता रेम्का चालाइ थिङका माकोरो? कालाउ इन्को सामाको सिङ चाहि हिसोसो लोहि ? 28 इङको द्याङ जोबाफ पिहि,'हिदोइबुङ सतुरगेलाइ इङको बि:का हिघाहि '| 29 वा दोअ्हि,इङसा मापासु,माकुनुते नेलाइ सामा उ:लाउ गहमबुङ उ:न्हावा | 30 सिसा मिङका पहर थेकापा इङको न्हेमिहेङ दोफाङ बारालि पिसु | सिसा मिङका बेला का चेकालाइहेङ दोताङका लाम्फा सामा उ:तेङ मेता दुलिको भासिङ बोझा जिङसु ,कालाउ गहमचाहि काङको भाकारता ता:पिसु | 31 वा आरूङ इम्बालाइहेङ दोअ्हि,स्वर्गको सारभि एलोङ पासाइको दाना भइका,एमि द्याङ इङको चुम्पुतेङ ताइ बारिता थिङहि | 32 गोताङ खान्तेङ म्हुइका दाना,जेलाउवा योतेङ बाराखे गोताङ सार्सिङ खान्तेङ बाराखे, कालाउ एलोङ सिङदोङभाइखे,कालाउ बादेलहुता उराइका जिहारोलाइ इन्ता बासा हिखे | 33 "वा इम्बालाइहेङ आरूङ भेनेङ निङपिकासो दो:हि,""स्वर्गको सारभि खमिर भाइका हि,एमि बेबाल एकुरि ना किलो ग्राम तोलेता मिसिलाइहि,कालाउ इङको गोताङ खमिर फुलितेङ दिक माजेम्पा धाउ इङकोहेङ एपाहा ता:हि ""|" 34 एदोइ काथा येसु:जेरगेलाइहेङ दो:हि | वा इम्बालाइहेङ निङपिकासो बाहेक भेनेङ हाइदोङ मा दोहि | 35 """का ताइको नुइ निङकागेलाइसो खिनिङ दोताङका, सुमिङ(संसार)को सुरुसङ म्होतेङ ताअ्का काथा का बानाल पाङका | अगमबक्तासो एसा दोका बानाल पुरा जेङहि |”" 36 "वा कालाउ जेरगेलाइहेङ ला:घितेङ साअ्ता हानिहि,कालाउ वाको चात्यागेलाइ वाको ता लोतेङ,''मिलिङ्को सामाको निङ्काको माने केलाइहेङबुङ दोपिनि""दोअ्हि |" 37 वा इम्बालाइहेङ जोबाफ पितिङ दोअ्हि,''रेम्का चालाइ बि:काचाहि द्याङको चान'' | 38 वा इम्बालाइहेङ जोबाफ पितिङ दोअ्हि,''रेम्का चालाइ बि:काचाहि द्याङको चान'' | 39 सामा बि:काचाहि साइतान(भुत) सतुर | चेका पहरचाहि सुमिङको दोका दिना, (अन्तको)खेतालागेलाइ चाहि स्वर्गदुतगेलाइ |'' 40 'जेसाङ सामा उ:तेङ मेता दुप्यावा,सुमिङ (संसार)को दोका दिनाबुङ एन्साङ जेनावा |'' 41 द्याङ्को चान ताइको स्वर्गदुतगेलाइहेङ दिङ्गिलावा,कालाउ ज्याइ पाप पालि लगाइकागेलाइहेङ,कालाउ झाराङ दुस्त काम पाका लाइहेङ स्वर्गदुत वाको सारभिता जम्पावा कालाउ वाको सार्भसो उल्लापावा | 42 कालाउ इम्बालाइहेङ मेताको दालदाल्ला पोखरिता थालप्यावा | कालाउ इन्ता द्याङगेलाइ खारावा,कालाउ तासिङ जि:तावा | 43 'कालाउ रेम्का कामपाका धर्मि गेलाइ ताइ परमेस्वर आबाको सारभिता बेला भाइपा चम्केका जेनावा | ज्याको न्हातोङ हि वा हिनाको |'' 44 'स्वर्गको सारभि एलोङ मिलिङता लि:तेङ ताअ्का गाडधन भाइका,एमि |हिदोइबुङ द्याङ इङ्को निङ्हि कालाउ वा मेनाङ लेङ्चाहि वा इङकोहेङ,आरोङ मिलिङ्ता म्होहि |कालाउ हानेतेङ ताइको गोताङ आनेमाने पितेङ इङको मिलिङ चोल्हि |'' 45 'कालाउ आरूङ एलोङ सारभि रेम्का मोतिगेलाइ भोका एमि ब्यापारि भाइका |'' 46 ' वा एलोङ बहुमुल्य (हेन्जा जाङ्का) मोति निङ्हि,कालाउ हानेतेङ ताइको गोताङ आनेमाने पितेङ इङको मोति चोल्हि |'' 47 स्वर्गको सारभि समुन्द्रता आअ्का एलोङ गुतिजाले भाइका,इन्ता गोताङ जातको हायागेलाङ देखे |'' 48 'कालाउ हेन्साङ (हेन्जाङ) हायागेलाइ जालेता देहि,ओबालाइ जाले तान्हेतेङ बाहार समुन्द्रको काम्भेता उल्हिपाहि,कालाउ रेम-रेम्का हायाहेङ दुङग्रिगेलाइता ह् वाहि,कालाउ मारेम्का गेलाइहेङ थाहगिल्हि |'' 49 सुमिङको न्हुसोको दिना इन्साङ जेनावा,स्वर्गदुतगेलाइ लोतेङ दुष्टगेलाइहेङ धर्मिगेलाइको माझासो खेनावा |'' 50 'कालाउ इम्बालाइहेङ मेको वाङ्खाराका खाराता थालप्यावा | इन्ता द्याङगेलाइ खारावा,कालाउ तासिङ जि:तावा |'' 51 येसु:इम्बालाइहेङ हिअ्हि:,''हाइ नेलाइ इदोइ काथा गोताङ बुझिसुना? ''कालाउ इम्बालाइ दोअ्हि:,''बुझिन्हाहि |'' 52 येसु:आरूङ इम्बालाइहेङ दोअ्हि,''ओदोइ भाअ्सिङ स्वर्गका सारभिको धिरपाका काथा गोताङ सास्तिरि ज्याइ एमि द्याङको साअ्को माजन भाइका,जाइ ताइको भाकारसो नावा कालाउ पुरना कालाउ रेम्का आनेमाने गेलाइ बाहार उल्हिपाखे | 53 इदोइ निङ्पिका काथागेलाइ दोअ्लि दोतेङ,येसु:इन्तासो हानिहि | 54 कालाउ ताइको साअ्ता लोतेङ वा इम्बालाइको चाउघाराता इम्बालाइहेङ इसिका धिरपाहि,इम्बालाइ वासेहेङ्तिङ्तेङ भाङभाङ्तेङ ता-ताइमिता दोअ्हि,''वासेहेङ बुदधि भारबुसाइका कामपालि,सारबुसाइगेलाइ हितासो निङहि ?'' 55 हाइ या मिस्त्रिको चान माकोरो? हाइ वाको आमाइको मिङ मरियम,कालाउ वाको ओनेगेलाइ याकुब, योसेफ,सिमोन र यहुदा माकोरो?'' 56 'हाइ वाको बेजान ओनेगेलाइ झाराङ केलाइकोङ देराता मान्थुरो? या इसिका काथागेलाइ निङहि? कालाउ इम्बालाइ येसु:दोफा चेरताङपाहि | 57 येसु:इम्बालाइहेङ दोअ्हि,''अगमबक्ताहेङ ताइको थामेता कालाउ ताइकोङ साअ्ता मान मानिङ्खे |भरू बो देराता मान निङ्खे |'' 58 कालाउ येसु:इम्बालाइको खान्धुरि मातिन्तेङ इन्ता सारभुसाइका काम मापाहि |