मत्ती 12

इङ्को बेला येसु:माइसाका दिना सेकामिङका मिलिङ भारिसो हानिघाखे कालाउ वाको चात्यागेलाइ म्हितुतेङ मिङका सिसा पेतेङ कालाउ चाकाताङ हानिहि | 2 कालाउ फारिसिगेलाइ इङ्को तिन्तेङ वासेहेङ दोअ्हि,''खाङ्तो,नाङ्को चात्यागेलाइ माइसाका दिनाता,जेदोङ मापालि गोइका ओदोङ पाखे |'' 3 कालाउ वा इम्बालाइहेङ दोअ्हि,''दाउद, वा कालाउ वाको दोफा हिकालाइ, म्हितुलाउ हाइ पाका हिघाहि:, हाइ नेलाइ पढेका (पोर्हेका) मान्थुघा सुखेना ?'' 4 हेसापातेङ वा परमेस्वरको सा लि:ता दुल्तेङ परमेस्वरहेङ चारहाइका तोले चाहि ? इ्ङ्को तोलेचाहि नाते वासिहेङ नाते वाकोदोफा हिकालाइहेङ, इङ्को तोलेचाहि धामिगेलाइहेङ खिनिङ खाबारा हिघाहि |'' 5 हाइ ब्यवास्थाता लेखिका पढेका (पोरि्हिका) मान्थुघासुखेना, हेसा पातेङ माइसाका दिनता धामिगेलाइ परमेस्वरको साता (मन्दिरता) माइसाका दिनाहेङ असुद (आखेका )बानाइखे,कालाउबुङ ओबालाइ हाइदोङ थाहामागिका (निर्दोस)जेङखे |'' 6 'कालाउ का नेलाइहेङ दोअ्खा,चाउघारा खान्तेङ बार्का एअ्मि हि'' | 7 'धरमसास्तरता इसिका दोका हि, का जिहा,जुङलेङको भोक माको,का द्याङगेलाइको मापारु भोखा |'' 8 हाइपालिदोनु द्याङको चान माइसाका दिनाको प्रभु |'' 9 येसु:इन्तासो उल्हितेङ,ओबालाइको चाउघाराता हानिहि | 10 इन्ता एअ्मि खुर सेङ्का द्याङ हिघाखे | इम्बालाइ येसु:हेङ मारेम्का बनाइलि दाउ भोघाहि ओदोङ भाअ्सिङ वासिहेङ हिअ्हि, ''हाइ माइसाका दिनाता हासुहेङ्बुङ एल्पालि ठिक हि ?'' 11 वा इम्बालाहेङ दोअ्हि,''नेलाइको सो एमिको एलोङ भेड़ा,मेसा हि, कालाउ माइसाका दिनाता इङ्को वाङखाराकाता वाल्लानु ,हाइ वा इङ्कोहेङ चातेङ बाहार माउल्लि पावा रो ?'' 12 एअ्मि द्याङ भेड़ा,मेसा खान्तेङ हेन्जा दामको (ताको) हिखे | ओदोङ भाअ्सिङ माइसाका दिनाता रेम्का पालि एल्का हि |'' 13 कालाउ वा इङ्को द्याङहेङ दोअ्हि,''नाङको खुर फेनापा|'' वा ताइको खुर फेनापाहि,कालाउ इङ्को खुर भेनेङ्पाहाको खुर भाइपाङ एल्का जेङहि | 14 कालाउ फारिसिगेलाइ बाहार हानेतेङ वासिहेङ हेसापातेङ नासापालि द्वाङ दोतेङसा वाको बिरोधता सालाउपालि तेङहि | 15 इङ्को काथा गीतेङ येसु:इन्तासो हानिहि:, कालाउ हेन्साङ द्याङ वाको लेसारा पिताइहि,कालाउ वा इम्बालाइ झाराङहेङ एल्पाहि:| 16 हिदोइबुङ द्याङ वा हासु दोअ्तेङ हिलाउबुङ मादोपिसु दोअ्तेङ इम्बाइलाहेङ थिपाहि | 17 यसैया अगमबक्तासो दोअ्का, काथा पुरा जेनाको दोअ्तेङ एसा जेङहि | 18 'काङ्को बान्धाइति (दास) का वासेहेङ साल्का हिघा,काङको मायारु वाकोसो का हाउसाइघा,का काङ्को मन वाकोता ताअ्पियाङ्का, कालाउ वा जाति जातीगेलाइको न्यायको ये:बानाल प्यावा | 19 वा नाते चेरस्वावा, ना हेन्साङ र्हिकायावा,ना ते हासुबुङ वाको गाला दामाभारि हिनावा | 20 कालाउ उन्हाका होन्ताला हेङ वा माथुरावा वा चिपा-चिपापा जोल्का गेसाहेङबुङ मासेतावा,कालाउ न्हुसो न्यायहेङ जितिपावा | 21 कालाउ वाको मिङ्ता जाति-जातिगेलाइ आसा पावा |'' 22 भुत धेल्का एअ्मि मिङ मातिङका कान्हा लाता द्वाङहेङ येसु:कोता चुमाहि |येसु:वासिहेङ एल्पाहि, इङ्को लाता नुइ धुइलि कालाउ तिङलि तेङहि | 23 कालाउ झाराङ जेरगेलाइ भारबुसाइतेङ दोअ्हि,''हाइ या दाउदको चान दोङ रो ?'' 24 इदोइ काथा हिङतेङ फारिसिगेलाइ दोअ्हि, ''इदोइ द्याङ भुतको माझन बालजिबुलसो भुतगेलाइहेङ उल्हिपाखे |'' 25 वा इम्बालाइको मारेम्का काथा थाहा गितेङ इम्बालाइहेङ दोअ्हि, ''एलोङ सारभिता ताइ-ताइमिता लाअ्सुन्हा पानु, तिकितेङ हिलि माद्दावा |जेदोङ साको जाहान ताइ-ताइमिता लाअ्सुन्हानु, इङ्को जाहानबुङ रेम्फा जेन्तेङ हिलिबुङ मादुवावा | '' 26 भुत कालाउ भुत हेङ उल्लिपानु, इङ्को ताइकोङ बिरोधता बाखार् न्हावा, कालाउ वाको सारभि हेसापातेङ तिक्यावा ? 27 एदि का बालबिजुलसो भुतगेलाइहेङ उल्लिपानु, नेलाइको चानगेलाइचाहि हासुपाहासो उल्लिपाखे ? ओदोङ भाअ्सिङ ओबालाइदोङ नेलाइको न्यायकर्ता जेनावा |'' 28 एदि का परमेस्वरको सरबुङ (सक्ति) सो भुतगेलाइहेङ उल्लिपानु परमेस्वरको सारभि नेलाइकोता लोहोइ दोतेङ गिसु |'' 29 'हाइपालिपानु लाम्फा बल्याका द्याङहेङ माजिम्सा, वाको सालि:ता दुल्तेङ हासुबुङ वाको धनगेलाइ चुम्पुलि दावारो ? इङ्को बल्याका द्याङहेङ जिमतेङखिनीङ वा सा लिताको धन खुलि दावा | 30 'ज्याइ काङ्को दोफा मान्थु, वा काङको बिरोधता हि, कालाउ जाइ का दोफा माजोम्पाखे,वा राइखे ''| 31 'ओदोङ भाअ्सिङ का नेलाइहेङ दोअ्खा, हिसिकालाउबुङ पाप पाका द्याङगेलाइ, कालाउ परमेस्वरहेङ मारेम्का दोकालाइहेङ माफ़ जेनाङ, कालाउ पबित्तरो आत्माको बिरोधता मारेम्का पाकालाइहेङ चाहि माफ माजेनाङ |'' 32 हासुबुङ, द्याङ्को चानको बिरोधता जेदोङ दोअ्लाबुङ वासेहेङ इदोइ युगता कालाउ न्हुसो लोका युगताबुङ माफ मानिनावा |'' 33 'ओदोङ भाअ्सिङ सिङ्हेङ रेम्फा बानाइसु, कालाउ वाको सेकाबुङ रेम्फा जेनावा |माकुनु सिङ्हेङ मारेम्का बानाइसु, कालाउ वाको सेकाबुङ मारेम्का जेनावा |हाइपानु सेकासोदोङ सिङ्हेङ नाल्खे | 34 ओइ पुह्याँको चानगेलाइ| नेलाइ ताइमिदोङ मारेम्का हिसुना,रेम्का काथा हिसापातेङ दोअ्लि दोसुवाना? हाइपालिपानु ताइ लि:ता पोङ्घातेङ हिका काथागेलाइदोङ नुइसो उल्हिखे |'' 35 कालाउ रेम्का द्याङ,ताइलि:ता भरितेङ(पोङ्घाका) हिका रेम्का बिचारसो रेम्काङ बिचार उल्हिपाखे, कालाउ मारेम्का द्याङ,ताइलि:ता मारेम्का बिचार भरिकासो मारेम्काङ बिचार उल्हिपाखे'' | 36 'का नेलाइहेङ दोअ्खा,माजेङका काथा जेदोङ द्याङगेलाइ दोअ्तावा न्यायको दिनता ओबालाइ वाको हिसाब पिलिगोयावा |'' 37 'हाइपालिपानु नाङको बचनगेलाइसो नादोङ धर्मी जेनाना,कालाउ नाङको बचन गेलाइसो नादोङ रेम्का जेङतेङ ह्याना |'' 38 कालाउ सास्तिगेलाइ कालाउ फारिसिगेलासो आधिमि वासेहेङ दोअ्हि,''गुरूज्यु ,केलाइ नाङकोसो एलोङ चिन्हा खाङ्लि खाङ्न्हाखे |'' 39 वा इम्बालाइहेङ दोअ्हि,''मारेम्का मन हिकालाइ, कालाउ कासिबिरिनिगेलाइ | खिनिङ चिन्ह दोप्याङका | 40 हाइपालिपानु जेसाङ योना बार्का हायाको हामुङ लि:ता सुम दिना कालाउ सुम न्हिसिङ हिघाहि, ओसाङदोङ द्याङको चानबुङ तोम लि:ता सुम दिना,कालाउ सुम न्हिसिङ ह्यावा | 41 निनवेको द्याङ्गेलाइ न्यायको दिनाता इदोइ पुस्तादोफा जाअ्लि:गोयावा,कालाउ वासिहेङ दुसिलि तेनावा,हाइपालिपानु इम्बालाइ योनाको ये: बानाल हिङ्तेङ पासताइ पासु :,( पसुताब) खाङसु,योना खान्तेङ एमि माहान एता हि | 42 माहेको माहारानि: न्यायको दिनाता इदोइ पुस्तादोफा जाअ्लि: गोयावा,कालाउ वासिहेङ दोसि प्यावा, हाइपालिपानु वा इस्तु दुरेसो सोलोमनको बुद्दिको काथा हिङ्लि: लोका हिघाहि खाङ्सु,| सोलोमन खान्तेङ गोताङ काथा गिका एमि द्याङ इता हि| 43 'जेलाउ दुस्त आत्मा द्याङ्सो उल्हितेङ वा थाइ-थाइका थामे भोलि हानिहि,:कालाउ बुङ वा हिसोबुङ मानिङहि: | 44 कालाउ वा दोअ्खे, ''जेदोङ थामेसो का उल्हितेङ लोघा,ओदोङ साता का घुरितेङ हानाङका|' घुरितेङ लोलाउ वा साहेङ रेम्फा साजाइका तिङहि |' 45 कालाउ वा हानेतेङ ताइसुधिङ न्हिमि भुतगेलाइ ताइदोफा चुमातेङ लि:ता दुलतेङ हिलितेङ्हि | कालाउ इङ्को द्याङको न्हुसोको दासा लाम्फोरतिको खान्तेङ रेम्फा जेङ हि | एदोइ मारेम्का पुस्ताहेङबुङ एन्साङ जेनावा | 46 येसु:जेरगेलाइ दोफा काथापाकाताङ पालाउ,वाको आमाइ कालाउ ओनेगेलाइ बाहार जा:तेङ हि,नाङ्को दोफा काथापालिखाङ्खे |'' 47 इंङ्को बेला एमि द्याङ येसु:हेङ दोअ्हि, '' हिङ्पि नाङ्को आमाइ कालाउ ओनेगेलाइ बाहार जा:तेङ हि, नाङ्को दोफा काथापालि खाङ्खे |'' 48 वाको दोफा काथापाकाहेङ येसु:दोअ्हि, ''काङ्को आमाइ हासु ? काङ्को ओनेगेलाइ हासु ?'' 49 कालाउ वा ताइको खुरहेङ,''द्याङ्गेलाइहेङ तिम्पातेङ ताइ चत्यागेलाइ दोअ्हि,''खाङ्सु काङ्को आमाइ कालाउ ओनेगेलाइ |'' 50 'हाइ पालिपालिपानु ज्याइ स्वर्गता हिका काङ्को आबाको दोअ्का साअ्तावा, वादोङ काङ्को ओनेगेलाइ; कालाउ काङ्को बेजान ओनेगेलाइ,कालाउ काङ्को आमाइ |''