मत्ती 11

येसु:ताइको तेन्हे चात्यागेलाइहेङ धिरपाकाताङ कालाउ ताइको काथागेलाइ दोअ्लि दोअ्तेङ वा गालिलको सहर भारि ये:बानाल पालि कालाउ धिरपालि हानिहि | 2 बप्तिस्ता पिका यु:हान्ना जेल खानाता हिघाहि,| ख्रिस्त पाका गोताङ काथागेलाइ वा हिङ्हि | कालाउ यु:हान्ना ताइको चात्यागेलाइहेङ येसु: कोता दिङगिल्हि | 3 यु:ह्न्नाको चात्यागेलाइ येसु:हेङ हिअ्हि,''यु:हन्ना लोदोङ्खे दोअ्का द्याङ नादोङ ना, माकुनु ते केलाइ आरूङ भेनेङ द्याङ्हेङ र्-म्लि गोइका कि ? 4 येसु:दोअ्हि,''यु:हन्ना कोता हानेसु, हिङ्का कालाउ तिङ्का काथागेलाइ दोअ्सु | 5 कान्हा गेलाइ आरूङ मिसिया तिङ्लि दवाङ, न्हातोङ माहिङ्का बहिरा गेलाइ हिङ्लि द्वाङ | सि:कालाइ सिन्हुतेङ ल्होकाङ | लेङ्ग्रागेलाइ तेलि द्वाङ, कालाउ गरिब द्याङ्गेलाइहेङ ये:बानाल हिङपादोङखे | 6 एदि हिदोइबुङ द्याङ कासिहेङ रेम्फा पानु इङ्का द्याङ धन्यको हि: | 7 जेलाउ यु:हन्नाको चात्यागेलाइ ताइको दामाता हानिकाताङ पालाउ,येसु:इङ्को द्याङ्गेलाइहेङ यु:हान्ना बारेता काथा दोअ्लि तेङ्हि, वा दोअ्हि नेलाइ मारालाका थामेता हाइपाली उल्लिसुना ? हाइ भेरमा होइ हेङ्गालाइन्हापाका कोसेको सिङ्हेङ खाङ्लि ? 8 हाइपालिपानु नेलाइ हाइको भाअ्सिङ मारालाका थामे भारि हानेसुना ? आखेका उखेका धावा होङ्का द्याङहेङ खाङ्लि ? इङ्को रेम -रेम्का धावा होङ्तेङ राजाको साता हिका द्याङगेलाइ | 9 एसा माकुनु हाइ खाङलि नेलालाइ बाहार उल्लिसुना ह:? हिदोइबुङ एलोङ अगमबक्ता हेङ ? एइ:,का नेलाइहेङ दोअ्खा, एलोङ अगमबक्ता खान्तेङ माहान यु:हन्ना दोङ | 10 यु:हान्ना वादोङ एलोङ जाइको बिसोयता धर्मसास्तरता लेखेका हि: 'हिङ्सु, का काङ्को दुतहेङ नाङ्को लाङ -लाङ दिङगिल्प्याङका, वादोङ नाङको भाअ्सिङ दामा बनाइ प्यावा | ' 11 का नेलाइहेङ जातिङ्को, दोअ्खा: बप्तिस्मा पिका यु:हान्ना पृथ्वीता जोलोम जेङका गोताङ द्याङ्गेलाइ खान्तेङ माहान हि: | कालाउ स्वर्गको सारभिता वा झाराङ खान्तेङ आतुइका हि:,कालाउ बुङ वा यु:हान्ना खान्तेङ बारका हि:| 12 बप्तिस्मा पिका यु:हन्नाको सोमोय सोङ एला थेकापा स्वर्गको सारभि दिनाङ दिनाङ हेन्जा जेन्तेङ हानिका हि, कालाउ सारबुङसाइका द्याङगेलाइ जबरजस्ति इङ्कोहेङ रि्म्खे | 13 गोताङ अगमबक्तागेलाइ कालाउ मोसाको ब्यबस्था सो यु:हान्ना सुधाङ्को सोमोय मालोपा भरि न्हुसो लोलि खाङ्का काथागेलाइको बिसोयोता अगमबानि पाका हि: | 14 इदोइ अगमबक्ता कालाउ ब्यबस्था सो दोअ्का काथाता नेलाइ खानधुरि पासुना पानु,यु:हान्नादोङ एलिया दोतेङ नेलाइ खान्धुरि पासुवाना | ब्यवस्था कालाउ अगमबक्तागेलाइ वा ल्वाङ दोअ्का हि: | 15 काङ्को काथा हिङ्लि दोनु नेलाइ इङ्को काथागेलाइ हिङसु | 16 'एलाको द्याङगेलाइको बिसोयता का हाइ दोअ्लि ? इम्बालाइ हाइ खाल्को हि: ? एलाको द्याङगेलाइ धा:ताइका आतुइ-आतुइका जामालालाइ भाइका हि | एलोङ हुदासो जामालाइ भेनेङ हुदा गेलाइहेङ काइखे | 17 नेलाइको भाअ्सिङ केलाइ बाजा धुइपानाहि,कालाउबुङ नेलाइ मान्हासुना; केलाइ मन तुका लेनाहि,कालाउबुङ नेलाइको मन मातुपासुना |' 18 द्याङगेलाइ इन्सिकाङ हि, दोअ्तेङ का हाइपालि दोअ्घा ? हाइपालिदोनु जेलाउ यु:हान्ना लोहि वा आरू भाइपा माचागिल्हि, माआमगिल्हि | कालाउ मेनाङ द्याङगेलाइ, वासिहेङ भु:त धेल्का हि दोअ्खे | 19 द्याङको चान,भेनेङ द्याङगेलाइ भाइपाङ चाकाताङ आ्म्काताङ लोहि, द्याङगेलाइ दोअ्हि वासिहेङ जिहुका हि दोअ्हि, कालाउ वा एलोङ आम्का द्याङ, कालाउ वा पोत ल्होपाकागेलाइ कालाउ पापिगेलाइको भाया(साथि) | कालाउ बुद्दि चाहि वाको काम पाकासोदोङ थाहा जेङखे |'' 20 येसु: इङ्को सहरगेलाइहेङ चेरहि इन्सो वा एस्तुङ सारबुङसाइका कामगेलाइ पाका हिघाहि | येसु:इङ्को सहरको द्याङगेलाइहेङ चेरहि | हाइपालिदोनु ओबालाइ ताइको हिगिल्का चागिल्का सो कालाउ मन पासताइतेङ घुरिलि माकिहि | 21 येसु:दोअ्हि,''ओइ कोराजिन! नासिहेङ धिक्कार हि |ओइ बेथसेदा,नासिहेङ धिक्कार हि | का नेलाइ कोता हेन्जा सारबुङ्साइका कामगेलाइ पापिघा | एदि इसिकाङ सारबुसाइका कामगेलाइ टायर कालाउ सोदोमता पानु भरू इन्सोको द्याङगेलाइ लाम्फादोङ भाङग्रा लोखोन होङ्तेङ कालाउ बुसिरि उतेङ पासताइधावा कालाउ मारेम्का काम लाअ्धावा | 22 कालाउ का दोअ्खा,न्यायको दिनाता टायर कालाउ सदोमको खान्तेङ ओबालाइको दासा झन मारेम्का जेनावा | 23 ए:कर्फनहुम,हाइ ना स्वर्ग थेकापा हुता तोलिह्यानारो? आह:नासिहेङ ते लेता सिका थामे थेकापा हुल्पाङ | नाङ्को हुता का हेन्जा सारबुङसाइका कामगेलाइ पाका हिघा | एदि इदोइ इसिकाङ कामगेलाइ सोदोमता जेङनु,इन्ताको द्याङगेलाइ झाराङ ताइको पापगेलाइ पालि लाका हिदावा |कालाउ इङ्को सहर एला थेकापा हिदावा | 24 का नेलाइहेङ दोअ्खा, कि न्यायको दिनाता सदोमको खान्तेङ नाङ्को दासा झन मारेम्का जेनावा | 25 इङ्को पहर येसु:दोअ्हि,''हे आबा,स्वर्ग कालाउ पृथ्वीको परमप्रभु, का नासिहेङ सेउपाखा | का नाङ्को बाखानाइ पाङ्का | हाइपालिदोनु ना इङ्को काथागेलाइ बुद्दिमान कालाउ सिधा द्याङगेलाइसो म्होना | कालाउबुङ ना ओबालाइहेङ तिङपापिसुना जाइदोङ म्हुइ-म्हुइका जामालाइगेलाइ भाइका हि | 26 एइ, काङ्को आबा,ना इसिका पाना जेदोङ ना पालि खाङघाखेना | 27 'काङ्को आबा कासिहेङ गोताङ बेबास्था पापिका हि |आबा बाहेक आरू हासुबुङ चानहेङ मानाल्खे | चान बाहेक आरू हासुबुङ आबाहेङ मानाल्खे | कालाउ चान जेदोङ द्याङगेलाइहेङ आबाकोता तिम्पालि मन पाखे ओबालाइ खिनिङ आबाहेङ नालावा | 28 काङ्को दोफा लोउ, जाइ माइका हिसुना, कालाउ ल्हिकासो एरिन्हाका नेलाइहेङ आत्माको भाअ्सिङ माइसा चापाङ्का | 29 काङ्को काम कालाउ काथा सा:सु, कालाउ काङ्को सो धिरसु, का बिनम्र कालाउ नमका हृदयको हिघा, कालाउ नेलाइ ताइको आत्माता माइसा निङचासुवाना | 30 जातिङको काङको काम पालि सजिलो हि, कालाउ नेलाइहेङ पिका कामबुङ होम्का हि | ''