मत्ती 5

वा जेरगेलाइहेङ तिङ्तेङ तिकारभारि ताङ्लाहि,कालाउ वा इन्ता योम्हि कालाउ वाको दोफा चात्यागेलाइ हानिहि | 2 कालाउ वा नुइ धुल्ली तेङ्हि कालाउ इम्बालाइहेङ धिरपालि तेङ्हि : 3 'धन्य आत्माता बलियाकागेलाइ, हाइपालिदोनु स्वर्गको सारभि नेलाइको भाअ्सिङ या | 4 धन्य सोक पाकालाइ, हाइपालिदोनु नेलाइदोङ् सान्तावना निङ्स्वाना | 5 धन्य सोझाकागेलाइ, हाइपालिदोनु नेलाइ पृथ्वीको खावारा निङ्स्वाना | 6 धन्य धार्मिकताको भाअ्सिङ म्हुतुकालाइ कालाउ 'चि' आम्लि किकालाइ, हाइपालिदोनु नेलाइ हेलाउबुङ 'चि, आम्लि माकिस्वाना | 7 धन्य दायापाकालाइ, हाइपालिदोनु इम्बालाइदोङ दाया निनावा | 8 धन्य सुद्द हृदय हिकालाइ, हाइपालिदोनु इम्बालाइदोङ परमेस्वरहेङ तिनावा | 9 धन्य मिलिपाकागेलाइ, हाइपालिदोनु इम्बालाइदोङ परमेस्वरको चान,चामिन्दी जेनावा | 10 धन्य दार्मिकताको भाअ्सिङ साताइनाकागेलाइ,हाइपालिदोनु स्वर्गको सारभि इम्बालाइकोदोङ | 11 ''धन्यको हिसुना नेलाइ, जेलाउ द्याङ्गेलाइ काङ्को भाअ्सिङ नेलाइहेङ निन्दा पावा | कालाउ साताइयावा, कालाउ माजेङ्का काथागेलाइ दोअ्तेङ नेलाइको बिरुदता गोताङ खालको आखेका काथा दोअ्तावा | 12 कालाउ नेलाइ लेङ्चासु, मारफाङ मायारु पासु, हाइपालिदोनु स्वर्गता नेलाइको बार्का इनाम जेनावा | हाइपालिदोनु नेलाइ खान्तेङ लाम्फाको अगमबक्ता गेलाइहेङ्बुङ ओबालाइ एसाङ सताइधाखे | 13 '' 'नेलाइ पृथ्वीको देसे, देसे ताइकादोङ मान्थुनु,कालाउ हाइहोइ ता:का बानाइलि रो? इङ्कोते बाहार थाइगिललावा, कालाउ द्याङ्गेलाइ याङगिलयावा हाइपालिदोनु हिदोइबुङ काम मालागि जेनावा | 14 'नेलाइ सुमिङ्को फाइसालामका तिकारता ता:का सहर हेलाउबुङ म्होलि मादावा | 15 द्याङ्गेलाइ गेसा जोलाइतेङ पाथि लिता माताखे, वाते चेरादानि हुता ताअ्खे, कालाउ साता हिका झाराङ्हेङ फाइसालामाका पिखे | 16 नेलाइको फाइसालामका द्याङ्गेलाइको आगाता एसा ठाठाइताको, कालाउ ओबालाइ नेलाइको सु:ख तिनाको, कालाउ स्वर्गता हिका नेलाइको आबाको महिमा जेनाको | 17 'व्यावस्था कालाउ अगमबक्तागेलाइहेङ का माअ्पालि लोघा दोअ्तेङ मासोचिसु ,भरु का मापालि माको पुरा पालि लोघा | 18 जातिङ्को का नेलाइहेङ दोअ्खा, जेलाउ थेकापा स्वर्ग कालाउ पृथ्वी मातेङ मान्हावा इन्सालाउ थेकापा गोताङ काथा पुरा माजेङ्सा हिदोइबुङ व्यवस्थासो एलोङ्बुङ आनेमाने मामातावा | 19 एसापाहा ज्याइदोङ इदोइ आग्या गेलाइसो झाराङ खान्तेङ म्हुइका आग्या मापानु, कालाउ द्याङ्गेलाइहेङ इन्साङ पालि धिरपानु, कालाउ वा स्वर्गको सारभिता झाराङ्खान्तेङ म्हुइका जेनावा | | कालाउ ज्याइदोङ इङको आग्या कितावा कालाउ धिरपावा, वादोङ स्वर्गको सारभिता बारका जेनावा | 20 हाइपालिदोनु का नेलाइहेङ दोअ्खा, नेलाइको मन परमेस्वरता सास्तिरि कालाउ फारिसिगेलाइको खान्तेङ हेन्जा मान्थुनु नेलाइ हिदिबुङ पाहासोबुङ स्वर्गको सारभिता दुल्ली मादोस्वाना | 21 लाम्फाको द्याङ्गेलाइ एसा दोअ्घाखे ''नेलालाइ हिङ्का हिसुना, 'ना मासे',हासु से:तावा वा दण्डको योग्य जेनावा |' 22 का नेलाइहेङ दोअ्खा, हासुबुङ ताइको ओनेदोफा चेरताम्पाखे वा दण्डको योग्य जेनावा, कालाउ ज्याइ ताइको ओनेहङ अपमान पाखे, वा चाउघाराको साता गोताङ दोअ्लि गोयावा | कालाउ ज्याइदोङ ताइको ओनेहेङ 'ना मुर्ख' हिना दोअ्खे, वा नरकको मेता ह्यावा | 23 ना बेदिता ताइको ताका ताअ्लि खाङ्लाउ लाम्फादोङ,नाङ्को ओनेको जिउता कालाउ नाङ्को बिरुद्ता याद हिनु थाहापा, 24 कालाउ नाङ्को ताका बेदीको भेरपा ताअ्तेङ,कालाउ हाने | लाम्फा ताइको ओने दोफा मिले, कालाउ न्हुसो लोतेङ ताका बेदिता ताअ् | 25 आदालतता हानिलाउ दामा ताङ ''नाङ्को सतुरु दोफा मिलिसु, माकुनेते नाङ्को सतुरु नासिहेङ न्यायाधिसको खुरता ताअ्प्यानाउ, कालाउ न्यायाधिस अफिसरको खुरता ताअ् प्यायानाउ कालाउ ना चाहि झ्यालखानाता परियाना | 26 'जातिङ्को, का नेलाइहेङ दोअ्खा, गोताङ ताका ना तिरिलि मादोपा भरि ना इन्तासो उल्हिलि मादोवाना | 27 'जातिङ्को, का नेलाइहेङ दोअ्खा, गोताङ ताका ना तिरिलि मादोपा भरि ना इन्तासो उल्हिलि मादोवाना | 28 का नेलाइहेङ दोअ्खा, हासुबुङ हिदोइबुङ वाजान कालाउ बेजान लाइहेङ लेसाइलिको भाअ्सिङ ताइको मनको इच्सा पाखे, वा लाम्फादोङ ताइको मनहोइ वादोफा लेसाइखे | 29 एदि नाङ्को दाङ्पाहा मिसिया नासिहेङ पाप पालि लागाइनु इङ्कोहेङ उल्हापातेङ थाइगिलपि, हाइपालिदोनु गोताङ जिउ नगरकता थाइगिल्लि खान्तेङ, भरू जिउको एलोङ आमेने राम्लि नाङ्को भासिङ रेम्का जेनावा | 30 नाङ्को दामपाहा खुर नासिहेङ पाप पालि लगाइनु इङ्को खुर पाल्तेङ थाइगिल | हाइपालिदोनु नाङ्को गोताङ जिउ नरकता हानावा भरू नाङ्को एनोङ भाग थाइगिलनु नाङ्को भासिङ रेमका जेनावा| 31 'एसाबुङ दोहोन्हाका हि, हासुबुङ ताइको 'बे' हेङ लाखे, वा वासिहेङ खाति पोका पातारा लेखि प्याको | '' 32 का नेलाइहेङ दोखा, जाइ ताइको बे, हेङ कासिबेरि बाहेक आरुङ भेनेङ कारनसो लानु, वा वासिहेङ कासिबेरि बनाइयावा, जाइ इङ्को बेबालहेङ बिहुपावा, वाबुङ कासिबेरि जेनावा | 33 आरूङ नेलाइहेङ इदोइ काथा हिङ्का हिसुना, लाम्फाको द्याङ्गेलाइ एसा दोअ्का हिघाहि, ''ना धाताइका केरा माचा, भरू परमप्रभुता चाका केरा पुरा पा: |'' 34 का नेलाइहेङ जातिङ्को दोअ्खा, केरा मा-माचा, कालाउ स्वर्गको मिङ्ता केरा माचा, हाइपालिपानु इङ्को स्वर्ग ते परमेस्वरको सिहासन, 35 नाते पृथ्वीको, हाइपालिदोनु इङ्को ते वाको पाइताला खिनीङ, नाते यरुसलेमको, हाइपालिदोनु इङ्कोते माहाराजाको सहर | 36 ताइको पुरुङ्को केरा माचा, हाइपालिदोनु ना एलोङ पुसुङ्हेङ नाते जेका, नाते दाका बनाइ माद्वाना | 37 नेलाइको दोअ्का काथा जातिङ्कोनु जातिङ्को 'दोसु:, 'माकुनु माको 'दोसु, इङ्को खान्तेङ जेन्जा पापसो लोखे | 38 ''नेलाइ इसिका दोअ्का हिङ्का हिसुना, एसा दोअ्का हि, 'मिसियाँ को बद्लिता मिसियाँ, कालाउ तासिङ्को बद्लिता तासिङ|' 39 का नेलाइहेङ दोअ्खा, पापि दोफा माफेसुसु माचेरसेसु ,जाइ नाङ्को दाम्पाहाँ गाला चाउर्हिनु, भेनेङ गालाबुङ दोअ्पि | 40 एदि हिदोइबुङ द्याङ नासिहेङ मुद्दा चालाइतेङ नाङ्को दौरा सुरुवाल चुम्पुलि खाङ्नु, ना वासिहेङ नाङ्को नोसोइ बुङ पि | 41 एदि हिदोइबुङ द्याङ नासिहेङ ए कोस हानिलि दोहेपानु, ना न्हे कोस हानिपि | 42 नाङ्को दोफा र् -हेकालाइहेङ पि, कालाउ नाङ्को दोफा रिन र्-हेलि खाङ्कालाइहेङ हाइ दोङ मापि | 43 ''नेलाइ इसिका दोअ्का हिङ्का हिसुना, ''नाङ्को देरागेलाइहेङ मायारू पासु, कालाउ मन्दा माताहेङ खाङ्लि माकिसु |' 44 काते नेलाइहेङ दोअ्खा, ताइको सतुरुगेलाइहेङ मायारू पासु, कालाउ नेलाइहेङ साताइकागेलाइको भासिङ दोमचाकाइसु पासु, 45 कालाउ नेलाइ स्वर्गता हिका ताइको आबाको चान चामिन्दी ज़ेङ्स्वाना | कालाउ वा मारेम्का मन हिका कालाउ रेम्का मन हिका न्हेमिङ्दोङ सान्हेको धाङ्का पिखे, कालाउ धर्मी कालाउ पापि न्हेमिङ्दोङ दायाखे | 46 हाइपालिदोनु नेलाइदोफा मायारू पाकाहेङ खिनीङ मायारू पासुना पानु नेलाइहेङ हाइ इनाम हि रो? हाइ पोत ल्होपाकागेलाइबुङ एन्साङ दोङ मापाखे रो ? 47 ताइको दादा ओनेगेलाइहेङ खिनीङ नेलाइ सेउपासुना पानु हाइ भेनेङगेलाइ खान्तेङ हेन्जा हाइ पासुन्हा रो ? हाइ खान्धुरि मापाकालाइबुङ एन्साङ मापाखेरो ? 48 इङ्को भाअ्सिङ जेसाङ स्वर्गता हिका नेलाइको आबा सिद्द हि, नेलाइबुङ एन्साङ सिद्द हिलि गोइस्वाना | ''