मत्ती 4

कालाउ भुतसो जाचिलिको भासिङ पबित्तरो आत्मासो येसु:हेङ मारालाका थामेता चुम्पुहि | 2 वा न्हेकुरि दिना न्हेकुरि न्हिसिन थेकापा हाइबुङ माचासिङ हिलाउ म्हीतुहि | 3 जेलाउ वासिहेङ जाचिका वाको दोफा लोतेङ दोअ्हि, एदि ''ना परमेस्वरको चान नु या उन्थुइ गेलाइहेङ तोले जेनाको दोअ्तेङ आग्या पि |'' 4 कालाउ येसु: वासिहेङ दोअ्हि, ''एसा लेखेका हि, तोलेहोइ खिनिङ ''द्याङ्गेलाइ माको, भरू नुइसो ओल्हेका परमेस्वरको गोताङ वचनहोइ बान्चिखे' | '' 5 आरूङ भुत वासिहेङ् पबित्तरो सहरता चुम्पुतेङ मुन्दिरको तुप्पाता ताहि, 6 कालाउ वासिहेङ् दोअ्हि, ''ना परमेस्वरको चान हिनु, इतासो लेता धाअ्से ,(तोङ,) हाइपालिदोनु इसिका लेखेका हि, 'वा दोङ् ताइको दुत गेलाइहेङ जिम्मा नासिहेङ प्यावा कालाउ ओबालाइदोङ नासिहेङ ताइको खुर-खुरता हुता दोङ खोतावा, माकुनेते नाङ्को खोकोइ उन्थुइता थुन्हावा' |'' 7 येसु:वासिहेङ दोअ्हि, ''एसा लेखिका हि, 'ना: परमप्रभु ताइको परमेस्वरहेङ माजाचे' |'' 8 आरूङ् न्हुसो वासिहेङ भुत एलोङ झाउका राता चुम्पुही, सुमिङ्को गोताङ सारभि कालाउ इङ्को बैभब वासिहेङ तिङ्पाहि , 9 कालाउ वासिहेङ दोअ्हि, कासिहेङ ''ना पोम्भेलेतेङ सेउपानु, इदोइ गोताङ आनेमाने का नासिहेङ पियाङ्का |'' 10 येसु:वासिहेङ दोअ्हि, ए ''भुत, ना कासो दुरे जेङग ! हाइपालिदोनु लेखिकाहि, 'ना दोङ परमप्रभु ताइको परमेस्वर हेङ खिनिङ् सेउपालि, कालाउ वाको खिनीङ सेवा पालि' |'' 11 कालाउ न्हुसो भुत येसु:हेङ लाअ्हि , कालाउ न्हुसो आधे स्वर्गद्त्गेलाइ येसु:कोता लोहि वाको सेवा पातेङ हि | 12 येसु: हिङ्हि यु:हान्ना थुनाता परिका हि दोअ्तेङ कालाउ वा गालिलभारि हानिहि, 13 कालाउ वा नासरत लाअ्तेङ कर्फनहुमता हानितेङ इन्ताङ वासा हिलि तेङहि, इङ्को सहर जाबुलुन कालाउ नाप्तालिको थामेता, परिका समुन्द्रको काम्भेता परिखे | 14 येसु:अगमब्कता यासाइयाको दोअ्का काथा इदोइदोङ पाहासो एसापा पुरा पालिको भाअ्सि दोअ्हि | 15 'जबुलुन मुलुक कालाउ नाप्तालिको मुलुक, यर्दनपारि समुन्द्र भारि, ये:सु मानिङलाइको गालिल, 16 किति-कितिकाता हिका द्याङ्गेलाइ एलोङ बारर्का फाइसालामका तिङ्का हि , सि:का को स्यारेता हिका सारभिता हिका गेलाइ हुता फाइसालमका हि |'' 17 येसु:एनसालाउदोङ ये:बानाल पाकाताङ दोअ्हि, पासताइ पासु, हाइपालिदोनु स्वर्गको सारभि भेरपाङ लोदोङखे | '' 18 गालिल समुन्द्रको काम्भेता हानिकाताङ पालाउ वा पतुरुस दोअ्का सिमोन कालाउ ओने आन्दिरीयास, न्हेमि दाइ ओनेदोङ समुन्द्रताजाले आअ्काताङ पाका तिङहि| इम्बालाइ हाया माङकालाइ हिघाहि | 19 येसु:इम्बालाइहेङ दोअ्हि, ''काङ्को दोफा तिसु, नेलाइहेङ का द्याङ्गेलाइहेङ माङ्का बानायाङका |'' 20 कालाउ इम्बालाइ ओदोङ्घुरि जालेगेलाइ लाअ्तेङ येसु:दोफा हानिहि | 21 इन्तासो हानिकाताङ पालाउ वा जब्दियाको न्हेमी चान याकुब, कालाउ वाको ओने यु:हान्नाहेङ, ओबालाइको आबा जब्दिया, दोफाङ नाउ हुता ताइको जाले पुइकाताङ पाका तिङ्हि, कालाउ वा इम्बालाहेङ काइहि | 22 कालाउ ओदोङ्घुरि नाउता आबाहेङ सिअ्धितेङ ओबालाइ येसु:दोफा हानिलि तेङ्हि | 23 येसु:ओबलाइको चाउघारागेलाइता धिरपाकाताङ, कालाउ सारभिको ये:बानाल पाकाताङ ,कालाउ द्याङ्गेलाइको हिसिकाबुङ खालको मिसा कालाउ जिउ फिरकाहेङ एल्पाकाताङ सारा गालिलभारि हानिहि | 24 वाको काम तिङ्तेङ सिरियाभरि मारफाङ चारचाराइहि, कालाउ मासाधेकागेलाइ, कालाउ गोताङ खालको मिसालोका, गाइल्हि खोका,तुतेङहिका, कालाउ लोङ्का बेथा हिका, कालाउ भुत धेलका गोताङ द्याङ्गेलाइहेङ वाकोता चुमाहि , वा ओबालाइ झाराङ्हेङ एल्पाहि | 25 कालाउ गालिल डेकापोलिस, यरुसलेम,याहुदिया कालाउ यर्दन पारिसो बार्का जेर वासिहेङ पिताइहि |