झूंटा परबचन देबाळा सुं बचो
4
1 ह म्हारा प्यारा भायलाओ, हरेक आत्मा को बस्वास मत करो पण सदाई वान्अ परखर देखो क वे परमेसर का छ क कोन्अ। या म थान्अ जिसुं खेर्यो छु क्युं क घणा परमेसर की ओड़ी सुं झूंटमाट बोलबाळा संसार मं भरया छ। 2 परमेसर का आत्मा न्अ थे अस्यान पेचाण सको छो, उं हरेक मनख की आत्मा परमेसर की ओड़ी सुं छ ज्यो या मान्अ क, “ईसु मसी मनख का रुप मं परमेसर की ओड़ी सुंई धरती प आयो छ।” 3 अर हरेक वा आत्मा ज्यो ईसु का बारा मं ई बात न्अ कोन मान्अ वा परमेसर की ओड़ी सुं कोन्अ। वा तो मसी का बेरी की आत्मा छ, जिका बारा मं थे सुण्या छ क वो आर्यो छ, अर अबार बी संसार मेई छ।4 म्हारा प्यारा छोरा-छोरीओ, थे परमेसर का छो। जिसुं थे मसी का बेरी न्अ जीत लिया। क्युं क वो परमेसर ज्यो थाम्अ छ, संसार मं रेबाळा सेतान सुं बड़ो छ। 5 वे मसी का बिरोधी लोगबाग संसार का छ। जिसुं वे ज्योबी बोल्अ छ वे संसार की बाता छ अर संसार ई वांकी सुण्अ छ। 6 पण आपा परमेसर का छा जिसुं ज्यो परमेसर को छ वो आपणी सुण्अ छ। पण ज्यो परमेसर को कोन्अ वो आपणी कोन सुण्अ। अस्यान आपा सांच का आत्मा न्अ अर लोगबागा न्अ भरमाबाळी आत्मा न्अ पेचाण सकां छा।
परमेसर परेम छ
7 प्यारा भायलाओ, आपा आमा-सामा परेम रांखा। क्युं क परेम परमेसर सुं मल्अ छ अर हरेक ज्यो परेम करअ छ, वो परमेसर की ओलाद बणजाव्अ छ अर परमेसर न्अ जाण्अ छ। 8 ज्यो मनख परेम कोन करअ, वो परमेसर न्अ कोन जाण्अ सक्यो। क्युं क परमेसर'ई परेम छ। 9 परमेसर खुदका परेम न्अ अस्यान दखायो छ क वो खुदका एकलोता छोरा न्अ संसार मं खन्दायो क आपा उंका छोरा सुं जन्दगी पावां। 10 सांचो परेम इम्अ कोन्अ क आपा परमेसर सुं परेम कर्या छा, पण इम्अ छ क वो आपसुं परेम कर्यो छ अर आपणा पापा का परास्चित बेई खुदका छोरा न्अ बली बेई खन्दायो छ।
11 हे प्यारा भायाओ, ज्यो परमेसर आपसुं अस्यान परेम कर्यो छ तो आपान्अ बी एक-दूसरा सुं परेम करणी चायजे। 12 aपरमेसर न्अ कोई बी कद्या बी कोन देख्यो पण ज्यो आपा एक-दूसरा सुं परेम करां तो परमेसर आपा मं वास करअ छ अर उंको परेम आपा मं पूरो हो जाव्अ छ।
13 अस्यान आपा जाणा छा क आपा परमेसर का गठजोड़ मं जीवां छा अर वो आपा मं वास करअ छ। क्युं क वो आपान्अ खुदकी आत्मा दियो छ। 14 परमेसर खुदका छोरा न्अ ई संसार का उद्धार क ताणी खन्दायो छ अर म्हे उन्अ देख्या छा अर उंका गुवा बी छा। 15 अर ज्यो कोई या मान्अ क, “ईसु परमेसर को छोरो छ” तो परमेसर उम्अ वास करअ छ अर वो परमेसर मं रेबा लागजाव्अ छ। 16 परमेसर जस्यान को परेम आपसुं रांख्यो छ उन्अ आपा जाणा छा अर आपणो बस्वास उं परेम मं छ ज्यो परमेसर आपसुं कर्यो छ।
परमेसर परेम छ अर ज्यो परेम मं बण्यो रेव्अ छ, वो परमेसर मं बण्यो रेव्अ छ अर परमेसर उम्अ बण्यो रेव्अ छ। 17 आपणा बारा मं अस्यान'ई परेम साबित होयो छ क न्याय क दन आपा मं बस्वास बण्यो रेव्अ। आपणो यो बस्वास जिसुं बण मेल्यो छ क आपा ई संसार मं ज्यो जन्दगी जीर्या छा वा मसी की जन्दगी जस्यानकी छ। 18 ज्यो मनख परेम करअ छ वो ड़रप्अ कोन्अ क्युं क परेम ड़र न्अ भगा देव्अ छ। ड़र को रिस्तो तो सजा सुं होव्अ छ। जिसुं ज्यो हालताणी ड़रप्अ छ उंको परेम पक्को कोन होयो।
19 आपा जिसुं परेम करां छा क्युं क परमेसर पेली आपसुं परेम कर्यो छ। 20 अर ज्यो आपा खेवां क परमेसर सुं परेम करां छा पण दूसरा सुं नफरत करां तो आपा झूंटा छा। क्युं क खुदका उं भाई न्अ जिन्अ देख्या छा उं सुंई परेम कोन कर सकां तो उं परमेसर सुं जिन्अ कद्या देख्या ही कोन्अ उसुं कस्यान परेम कर सकां छा? 21 मसी सुं आपान्अ यो आदेस मल्यो छ। ज्यो परमेसरb सुं परेम कर छ, उन्अ खुदका भाई सुं बी परेम करणी चायजे।