परमेसर की ओलाद न्अ संसार क उपरअ जीत मली छ
5
1 ज्यो कोई ईसु बेई यो बस्वास करअ क वो मसी छ, तो वे परमेसर की ओलाद बणजाव्अ छ। अर ज्यो परम बाप सुं परेम करअ छ, वे उंकी ओलादा सुं बी परेम करअ छ। 2 अस्यान ज्यो आपा परमेसर सुं परेम करां छा तो उंका खिया न्अ बी मान्अ छा तो आपा जाण जावां छा क आपा परमेसर की ओलादा सुं बी परेम करां छा। 3 aउंका खिया न्अ मानता होया आपा या दखावा छा क आपा परमेसर सुं परेम करां छा। उंका आदेस साउटा कळ्डा कोन होव्अ। 4 क्युं क ज्योबी परमेसर की ओलाद बणजाव्अ छ वो संसार न्अ जीत लेव्अ छ। अर संसार क उपरअ आपान्अ जिसुं जीत मली छ, वो छ आपणो बस्वास। 5 ज्योबी यो बस्वास करअ छ क ईसु परमेसर को छोरो छ, उन्अई संसार प्अ जीत मल्अ छ।ईसु का बारा मं गुवाई
6 वो ईसु मसी ही छ ज्यो आपण्अ कन्अ उंका बतिस्मा का पाणी अर उंकी मोत का लोई की लारा आयो छ। वो खाली पाणी की लाराई कोन आयो पण पाणी अर लोई दोन्या की लारा आयो छ। अर उं सांच बेई वो परमेसर को आत्मा खुद गुवाई देव्अ छ क्युं क आत्मा ही सांचो छ। 7 गुवाई देबाळा तीन छ। 8 आत्मा, पाणी अर लोई अर ये तीनु गुवा एक'ई गुवाई देर आमा-सामा सेमत छ।
9 जद्या आपा मनखा की दी गुवाई न्अ माना छा तो परमेसर की गुवाई तो ओर बी साउटी पक्की छ। परमेसर की गुवाई या छ क वो खुदका छोरा का बारा मं गुवाई देव्अ छ। 10 वो ज्यो परमेसर का छोरा मं बस्वास करअ छ, वो खुदक्अ मायन्अ उंकी गुवाई न्अ रखाण्अ छ। परमेसर तो खियो छ क ज्यो उंप्अ बस्वास कोन करअ वो परमेसर न्अ झूंटो ठेराव्अ छ। क्युं क वो उं गुवाई को बस्वास कोन कर्यो, ज्यो परमेसर खुदका छोरा का बारा मं दियो छ। 11 bअर वा गुवाई यां छ क परमेसर आपान्अ सदामेस की जन्दगी दियो छ अर वा जन्दगी उंका छोरा सुं मल्अ छ। 12 ज्यो उंका छोरा न्अ मान्अ छ वो उं जन्दगी न्अ फेरलेव्अ छ। पण जिकन्अ परमेसर को छोरो कोन्अ, उकन्अ वा सदामेस की जन्दगी बी कोन्अ।
सदामेस की जन्दगी आपणी छ
13 परमेसर का छोरा मं बस्वास रखाणबाळाओ म थान्अ ये बाता जिसुं माण्ढ़र्यो छु क थे या जाणल्यो क सदामेस की जन्दगी थां कन्अ छ। 14 म्हाको परमेसर मं यो बस्वास छ क ज्यो आपा उंकी मन्सा की जस्यान उसुं अरदास करां तो आपणी सुण्अ छ। 15 अर जद्या आपा या जाणा छा क वो आपणी सुण्अ छ, तो ज्योबी आपा उसुं मांगा छा वो आपणो हो जाव्अ छ।
16 अर ज्यो कोई देख्अ क उंको बस्वासी भाई कोई अस्यानको पाप करर्यो छ जिको फळ सदामेस की मोत कोन्अ तो उन्अ खुदका भाई बेई परातना करणी चायजे। परमेसर उन्अ जन्दगी देव्अलो। म वाक्अ बेई जन्दगी का बारा मं बात करर्यो छु ज्यो अस्यान का पाप करबा मं लागमेल्या छ, ज्यो वान्अ सदामेस की मोत ताणी कोन पुंचाव्अ। अस्यानको पाप बी होव्अ छ जिको फळ सदामेस की मोत होव्अ छ। म थासुं अस्यान का पाप बेई परातना करबा बेई कोन खेर्यो छु। 17 सबळा बरा काम पाप छ। पण अस्यानको पाप बी होव्अ छ ज्यो सदामेस की मोत ओड़ी कोन लेर जाव्अ।
18 आपा जाणा छा क ज्योबी परमेसर को छोरो बणग्यो, वो पाप कोन करतो रेव्अ। पण परमेसर को छोरो वांकी रक्ष्या करअ छ। वो दुष्ट वांको कांई बी कोन बगाड़ पाव्अ। 19 आपा जाणा छा क सबळो संसार सेतान का बसम्अ छ, पण आपा परमेसर का छा। 20 पण आपान्अ तोल छ क परमेसर को छोरो आग्यो अर वो आपान्अ यो ज्ञान दियो छ क आपा उं परमेसर न्अ जाणल्या ज्यो सांचो छ। अर याबी क आपा उम्अ बण मेल्या छा ज्यो सांचो छ, क्युं क आपा उंका छोरा ईसु मसी मं पक्का छा। परम बाप ई सांचो परमेसर छ अर वोई सदामेस की जन्दगी छ।
21 हे म्हारा प्यारा छोरा-छोरीओ, खुदन्अ झूंटा देवता सुं आंतरअ राखो।