परमेसर का बेटा-बेटी
3
1 aबच्यार'र देखो क पिता परमेसर आपसुं कतरो परेम कर्यो छ, जिसुं क आपा उंका छोरा-छोरी खुवा सकां अर सांच्याई मं छा बी सणी। पण या दनीया आपान्अ कोन जाण्अ क्युं क वे परमेसर न्अ बी कोन जाण्अ। 2 हे म्हारा प्यारा भायलाओ, अब आपा परमेसर की ओलाद छा पण आबाळी बगत मं आपा कांई होव्अला, हालताणी ईका बारा मं आपान्अ कोन बताया। पण छाव्अ ज्योबी होव्अ आपा या जाणा छा क जद्या मसी फेरू परगट होव्अलो तो आपा उंक्अ जस्यानका हो जाव्अला, क्युं क वो जस्यान को छ वस्यान ई आपा उन्अ देख्अला। 3 अर हरेक मनख ज्यो मसी मं आस राख्अ छ, वो खुदन्अ वस्यान ई पवितर रांख्अ छ, जस्यान मसी पवितर छ।4 पण ज्योबी मनख पाप करअ छ, वो परमेसर का नियम तोड़्अ छ, क्युं क निम तोड़बो ई पाप छ। 5 bथे या तो जाणोई छो क लोगबागा का पाप न्अ मेटबा बेई मसी परगट होयो छो, अर याबी क उंक्अ माईन्अ कोई पाप कोन्अ। 6 जिसुं ज्योबी मसी का गठजोड़ मं रेव्अ छ, वो पाप मं कोन जीव्अ। पण ज्यो लगातार पाप करतो रेव्अ छ वो मसी न्अ कोन देख्यो अर न्अ वो मसी न्अ जाण्यो।
7 ओ म्हारा प्यारा छोराओ, थे उंका छळबा मं मत आज्यो। क्युं क ज्यो सांचा धरम का काम करअ छ वो धरमी छ एकधम वस्यान ई जस्यान मसी धरमी छ। 8 ज्यो मनख पाप करतो रेव्अ छ वो सेतान को छ, क्युं क सेतान सरूवात सुंई पाप करतो आयो छ। जिसुंई तो परमेसर को छोरो परगट होयो छ क वो सेतान का काम न्अ नास करदे।
9 ज्यो परमेसर की ओलाद बणग्या वाम्अ परमेसर को सुभाव छ, जिसुं वे पाप कोन करता रेव्अ। क्युं क परमेसर वांको बाप छ, जिसुं वे पाप करता कोन रे सक्अ। 10 अण्डअ साफ अंतर छ परमेसर का छोरा अर सेतान का छोरा मं। वे मनख ज्यो चोखा काम कोन करअ अर दूसरा बस्वास्या सुं परेम कोन करअ वे परमेसर का छोरा कोन्अ।
एक-दूसरा सुं परेम करो
11 cथे सरूवात सुंई यो संदेस सुणमेल्या छो क आपान्अ आमा-सामा परेम रांखणो चायजे। 12 आपान्अ कैनd जस्यानका कोन बणणो चायजे ज्यो उं सेतान को छ अर वो खुदका भाई न्अ मार दियो छो। केन खुदका भाई न्अ क्युं मार्यो छो? क्युं क कैन का काम बरा छा अर उंका भाई का काम धरम का छा।
13 ह भायाओ, ई दनीया का लोगबाग थासुं नफरत करअ छ, तो थे ई बात सुं अचम्बो मत करो। 14 eआपा जाणा छा क आपा मौत सुं नखळर जन्दगी मं आपुच्या। आपा या जाणा छा क्युं क आपा दूसरा बस्वासी भाया सुं परेम करां छा। अर ज्यो दूसरा सुं परेम कोन करअ वो हालताणी बी मोत मं फस मेल्यो छ। 15 वे सबळा मनख ज्यो खुदका भाई सुं नफरत करअ छ वे हत्यारा छ अर थे तो जाणोई छो क कोई बी हत्यारा मनख कन्अ सदामेस की जन्दगी की आस कोन्अ। 16 ईसु मसी आपा बेई खुदकी जन्दगी देदियो, ई बात सुंई आपा जाणां छा क परेम कांई छ। आपान्अ बी खुदका भाया बेई जान देबा बेई तियार रेणो चायजे। 17 अर ज्यो थाम्अ सुं कोई भाई न्अ संसार मं रेताहोया कोई चीज की जरूत होव्अ अर वा चीज थां कन्अ होता होया बी थे उसुं मूंडो पेरल्यो, तो आपा या कस्यान खे सका छा आपा परमेसर सुं परेम करां छा? 18 ह म्हारा प्यारा छोरा-छोरीओ, आपणो परेम खाली बाता को अर बोलबा को कोन्अ, पण यो आपणा काम मं अर सांचो होणी चायजे।
परमेसर क आग्अ हिम्मत दखावो
19 ई सुंई आपा जाण सका छा क आपा सच्चाई का छा अर परमेसर क साम्अ आपणा हीया न्अ पक्को कर सका छा। 20 पण ज्यो ईक्अ पाछ्अ बी आपणो मन आपान्अ आपणा बरा कामा सुं सरमाव्अ छ तो आपान्अ या जाणणी चायजे क परमेसर हालताणी बी आपणा मन सुं बड़ो छ अर वो सब जाण्अ छ।
21 ह प्यारा भाई-बेणो, ज्यो आपणो मन आपान्अ बरा काम करती बगत दोषी ठेराव्अ, तो परमेसर क साम्अ आपणो बस्वास बण्यो रेव्अ छ। 22 अर ज्योबी आपा उसुं मांगा छा तो पावां बी छा। क्युं क आपा उंका आदेसा प चाला बी छा अर वाईं बाता न्अ करां बी छा ज्यो उन्अ भाव्अ छ। 23 fउंको आदेस छ आपा उंका छोरा ईसु मसी का सामर्थी नांऊ मं बस्वास रखाणा अर जस्यान ईसु आपान्अ आदेस दियो छ वस्यान आपा एक-दूसरा सुं परेम बी करां। 24 ज्यो परमेसर का आदेसा न्अ मान्अ छ वो उम्अ बण्यो रेव्अ छ। अर उम्अ परमेसर को वास रेव्अ छ। अस्यान आपा उं आत्मा क जरीय ज्यो आपान्अ परमेसर दियो छ, आपा या जाणा छा क आपण्अ माईन्अ परमेसर वास करअ छ।