ईसु आपणी सायता करबाळो छ
2
1 म्हारा प्यारा छोरा-छोर्याओ, म थान्अ ये बाता जिसुं माण्ढ़र्यो छु क थे पाप कोन्अ करो। अर कोई पाप करअ, तो परमेसर क साम्अ वां पापा सुं बचाबाळो एक छ अर वो धरमी ईसु मसी छ। 2 वो एक बली छ ज्यो आपणा पापा न्अ धोव्अ छ वो खाली आपणा पापा न्अ नही पण सबळा जगत का पाप न्अ धोव्अ छ।3 अर आपा परमेसर को खियो करां छा तो यो वोई गेलो छ जिसुं आपा पक्का हो जावां छा क आपा सांच्याई उन्अ जाण लिया। 4 पण ज्यो कोई मनख अस्यान खेव्अ क “म परमेसर न्अ जाणू छु” पण उंका खिया न्अ कोन मान्अ तो वो मनख झूंटो छ अर उंका हीया मं सांच कोन्अ। 5 पण ज्योबी मनख परमेसर का खिया न्अ मान्अ छ तो उंक्अ माईन्अ परमेसर को परेम वास करअ छ। क्युं क योई एक गेलो छ जिसुं आपा परमेसर मं बण्या रे सका छा 6 अर ज्योबी मनख या खेव्अ क वो परमेसर मं मजबुत छ, तो उन्अ ईसु की जस्यान जन्दगी जिणी चायजे।
सबळा सुं परेम करज्यो
7 aह म्हारा प्यारा छोराओ, म थान्अ कोई नयो आदेस कोन माण्ढ़र्यो छु, पण ज्यो म थान्अ बताऊ छु वो सरूवात सुंई थान्अ सुणायो गियो छ। यो वो चोखो समचार छ जिन्अ थे सुणमेल्या छो। 8 म थान्अ एक ओर नयो आदेस मांडु छु। ईकी सच्चाई मसी की जन्दगी मं अर थांकी जन्दगी मं परकट हुई छ। क्युं क अंधेरो छटग्यो अर परबु को सांचो उजाळो चमकबो सरू होयो छ।
9 अर ज्योबी मनख अस्यान खेव्अ छ क वो परबु का उजाळा मं चाल्अ छ पण खुदका मसी बस्वासी भाई-बेणा सुं बेर रांख्अ छ तो वो अब बी अंधेरा मं ई चालर्यो छ। 10 अर ज्योबी मनख खुदका मसी बस्वासी भाई-बेणा सुं परेम करअ छ वो परबु का उजाळा मं चाल्अ छ। अर उंकी जन्दगी मं अस्यान की कोई बी बात कोन होव्अली जिसुं वो पाप करअ। 11 पण ज्योबी मनख खुदका मसी बस्वासी भाई-बेणा सुं नफरत करअ छ वो अब बी अंधेरा मं ही टटोळतो रेव्अ छ अर अंधेरा मं ही जन्दगी जीव्अ छ। अर वो योबी कोन जाण्अ क ई अंधेरा मं कढ्अ जार्यो छ। क्युं क अंधेरो उन्अ आंधो कर दियो।
12 पण ह म्हारा प्यारा छोराओ म थान्अ जिसुं माण्ढ़र्यो छु, क्युं क ईसु मसी का अधिकार की बजेसुं थांका पाप धोया गिया छ। 13 ह बुढ़ा-ठेराओ म थान्अ ई बजेसुं माण्ढ़र्यो छु, क्युं क थे उं परमेसर न्अ जाणो छो ज्यो सरूवात सुंई छ। ह मोट्यारओ म थान्अ ई बजेसुं माण्ढ़र्यो छु क्युं क थे दुष्ट न्अ हराया छो।
14 म्हारा प्यारा छोराओ म थान्अ ई बजेसुं माण्ढ़र्यो छु क्युं क थे पिता परमेसर न्अ जाण्या छो। ह बुढ़ा-ठेराओ म थान्अ ई बजेसुं माण्ढ़र्यो छु क्युं क थे परमेसर न्अ जाण्या छो ज्यो सरूवात सुंई छ। अर ह मोट्याराओ म थान्अ ई बजेसुं माण्ढ़र्यो छु क्युं क थे तागतहाळा छो अर परमेसर को बचन थाम्अ छ अर थे दुष्ट न्अ हराया छो।
15 थे न्अ तो ई दुनिया सुं अर न्अ ई दुनिया की चीजा सुं परेम करज्यो। क्युं क ज्योबी ई दनीया सुं परेम करअ छ उंका हीया मं पिता परमेसर को परेम कोन्अ। 16 क्युं क ई दनीया मं बुरी मन्सा, जन्दगी को घमण्ड, काया की बुरी मन्सा छ ये एकबी पिता परमेसर की ओड़ी सुं कोन्अ पण ई दनीया की ओड़ी सुं आव्अ छ। 17 या दनीयादारी अर ईकी मोज मस्ती की चीजा को नास होव्अलो, पण ज्योबी मनख परमेसर की मन्सा प चाल्अ छ उंको कद्या बी नास कोन होव्अ।
मसी का बेरी
18 हे म्हारा प्यारा छोराओ, आखरी बगत आगी अर जस्यान थे सुण्या छो क मसी को बेरी आबाळो छ। अर जिसुं उंकी जस्यानका घणासारा मसी का बेरी साम्अ आर्या छ अर ई बात सुंई आपा जाण सका छा क वा आखरी बगत आ पूंची। 19 मसी का बेरी आपण्अ बीच मं सुंई नखळ्या छ पण वे आपणी लार कोन्अ। क्युं क ज्यो वे आपणी लारका होता तो आपणो साथ कोन छोड़ता पण वे आपणो साथ छोड़ दिया जिसुं वे या दखा सक्अ क वे सांच्याई आपा मं सुं कोन्अ।
20 पण थान्अ तो परमेसर की ओड़ी सुं पवितर मसी को अभिषेक कर्यो गियो छ। जिसुं थे सांच न्अ जाण लिया। 21 म थान्अ यो कागद ई बजेसुं कोन माण्ढ्यो क थे सांच न्अ कोन जाणो, पण थे तो सांच न्अ जाणो छो अर याबी जाणो छो क सांच मं सुं झूंट कोन नखळ्अ।
22 अर वो झूंटो छ, ज्यो मनख ईसु का बारा या खेव्अ क वो मसी कोन्अ तो वो मनख मसी को बेरी छ। वो बाप अर छोरा दोन्या बेई नट्अ छ। 23 ज्यो छोरा बेई नट्अ छ उंक्अ कन्अ बाप बी कोन रेव्अ, अर ज्यो कोई छोरा न्अ अपणाव्अ छ वो बाप न्अ बी अपणाव्अ छ।
24 थे ज्यो बाता सरूवात मं सुण्या छो वान्अ मानता रिज्यो जद्याई छोरो अर बाप थाम्अ बण्या रेव्अला। 25 मसी खुद आपान्अ सदामेस की जन्दगी देबा को वादो कर्यो छ।
26 म ये बाता वा मनखा बेई थान्अ माण्ढ्यो छु ज्यो थान्अ भरमाबा की जोरी करअ छ। 27 अर जण्ढ्अ ताणी थांकी बात छ, थांक्अ माईन्अ तो मसी की पवितर-आत्मा को वास छ। ई बजेसुं थान्अ या जरूत ई कोन्अ क कोई उपदेस देव्अ, पण थान्अ तो ज्यो आत्मा दी गई छ वा सबकुछ सखाव्अ छ। वो सांचो छ, अर वो झूंटो कोन्अ वो थान्अ जस्यान सखायो छ वस्यान मसी मं बण्यारेवो।