यूहन्ना को पहलो कागद
1 यूहन्ना
1
1 bम्हे उं जन्दगी का बचनa का बारा मं बतार्या छा, ज्यो सब चीजान्अ बणाबा सुं पेलीसुंई छो, आपा उन्अ सुण्या छा अर चत लगार आपणी आंख्या सुं देख्या छा, अर जिक्अ आपा खुद आपणा हाथ अड़ाया छा। 2 cउंई जन्दगी को ज्ञान मान्अ दियो गियो छ। म्हे उन्अ देख्या छा अर म्हे उंका गुवा छा, अर अब थान्अ सदामेस की जन्दगी को समचार सुणावा छा क ज्यो पिता परमेसर की लार छो अर म्हाप्अ परगट होयो छ। 3 म्हे उन्अ देख्या अर सुण्या छा। अब थान्अ बी उंकाई परबचन देर्या छा जिसुं थे बी म्हाकी लार हो जावो। आपणो यो साथ परम-पिता अर उंका छोरा ईसु मसी की लार छ। 4 म्हे ये बाता थान्अ जिसुं माण्ढ़र्या छा क आपणो आण्द पूरो हो जाव्अ।परमेसर उजाळो छ
5 म्हे ईसु मसी सुं ज्यो चोखो समचार सुण्या छा, वो'ई थान्अ सुणारया छा अर वो यो छ क परमेसर उजाळो छ अर उम्अ चन्योक बी अन्धेरो कोन्अ। 6 अर ज्यो आपा खेवां क आपा उंकी लार चाला छा अर हालताणी बी पाप का अन्धेरा मं जन्दगी जीर्या छा तो आपा झूंटला छा अर सांच प कोन चालर्या। 7 पण अब आपा उजाळा मं चालर्या छा क्युं क उजाळा मंई परमेसर छ जिसुं आपा बस्वास्या का रुप मं एकलार छा, अर परमेसर का छोरा ईसु को लोई आपान्अ सबळा पापा सुं साफ कर देव्अ छ।
8 अर आपा खेवां क म्हाम्अ कोई पाप कोन्अ तो आपा खुदन्अ छळर्या छा अर आपा मं सांच कोन्अ। 9 अर ज्यो आपा परमेसर क साम्अ खुदका पापा न्अ मान लेवां छा तो आपणा पापा न्अ माफ अर आपणा सबळा बरा करमा न्अ साफ करबा बेई परमेसर बस्वासहाळो अर न्याय करबाळो छ। 10 अर आपा खेवां क म्हे कोई पाप कोन्अ कर्या तो आपा परमेसर न्अ झूंटो खेवां छा अर उंको बचन आपाम्अ कोन्अ।