याकूब 5

अमीरा न्अ चेताबो

1 ह भागवानो, सुणो तो सणी, थां माळ्अ आबाळा कळेसा माळ्अ रोवो अर बार्रापाड़ो। 2 थांको धन सड़ग्यो, अर लत्ता न्अ दींऊ खागी। 3 थांका सोना-चांदी माळ्अ कांई लागगी, अर वा कांई थांका बिरोध मं गुवाई देव्अली, अर आग की जस्यान थांका मांस न्अ खा जाव्अली। थे आखरी बगत मं धन भेळो कर्या छो। 4 देखो थांका खेता मं ननाणी करबाळा मजुरा की ज्यो मजुरी थे धोखा सुं रांख लिया छा वा बळारी छ, अर लावणी करबाळा की पुकार सर्वसक्‍तिमान परमेसर का काना ताणी पूंचगी। 5 थे धरती प भोग-बिलास करता रिया, अर खूब मोज कर्या छ, नासका दन बेई थे खुदन्अ पाळ-पोसर मोटो-ताजो कर लिया। 6 थे धरमी न्अ दोषी ठेरार मार दिया, ज्यो थांको बिरोध कोन कर्यो।

दुखा मं थावस रांखबो

7 अस्यान ह भायाओ, परबु क आबा ताणी थावस रांखो। उं कसाण प्अ ध्यान द्‍यो जिबेई धरती की फसल घणी मायना राख्अ छ उंकी आस करता होया वो चौमासा की पेली बरखा सुं लेर स्याळा की मावठ ताणी थावस रांख्अ छ। 8 थे बी थावस रांखो, अर थांका हीया मं गाढ़ा हो जावो, क्युं क परबु का आबाकी बगत सांकड्अ छ। 9 ह भायाओ, एक-दूसरा की सिकायत मत करो, जिसुं थे दोषी कोन ठेरो। देखो, न्याय करबाळो बाण्णा मं ऊबो छ। 10 हे भायाओ, थे परमेसर की ओड़ी सुं बोलबाळा न्अ याद राखो ज्यो परबु का नांऊ सुं बोल्अ छा, बांका दुख उठाबा न्अ अर थावस रांखबा न्अ आपण्अ बेई नमुनो समझो। 11 देखो, आपा थावस रांखबाळा न्अ भागआळो खेवां छा। थे अय्यूब का थावस का बारा मं तो सुण्याई छो, अर परबु की ओड़ी सुं ज्यो बीको फळ होयो बीन्अ बी जाणज्ञा।

क्युं क परबु बड़ी दीया अर तरस करबाळो छ। 12 पण ह म्हारा भायाओ, सबसुं चोखी बात या छ, क सोगन मत खाज्यो, न्अ तो सरग की, न्अ धरती की, न्अ कोई ओर चीज की, पण थांकी बात हां की हां अर ना की ना होव्अ, जिसुं थे सजा क लायक कोन ठेरो।

बस्वास की परातना

13 थाम्अ सुं कोई दुखी होव्अ, तो परातना करअ। राजी होव्अ तो, वो बड़ाया का गीत गाव्अ। 14 थाम्अ सुं कोई बिमार होव्अ तो बस्वास्या की टोळी का सेवा करबाळा बढ़ा-बुढ़ा न्अ बुलाव्अ, अर वे परबु का नांऊ सुं तेल लगार बीक्अ ताणी परातना करअ, 15 अर बस्वास की परातना सुं बिमार नीका हो जाव्अलो, अर परबु बीन्अ नीका करर ऊबो कर देव्अलो, अर वो ज्यो पाप कर्यो होव्अ, तो वे छमा हो जाव्अला। 16 अस्यान थे एक-दूसरा क साम्अ खुदका पापा न्अ मानल्यो, अर एक-दूसरा क ताणी परातना करो, जिसुं नीका हो जावो, धरमी मनख की परातना घणी तागतहाळी अर असर करबाळी होव्अ छ। 17 एलिय्याह बी तो आपणी जस्यान को एक मनख छो, अर वो रोरोर परातना कर्यो क पाणी कोन बरस्अ, अर देस मं साढ़ी तीन बरस ताणी पाणी कोन बरस्यो। 18 वो फेरू परातना कर्यो, तो आम्बर सुं बरसात होई, अर धरती उपजबा लागगी। 19 ह म्हारा भायाओ, थाम्अ सुं कोई सांचा गेला मं सुं डुल जाव्अ अर कोई बीन्अ पाछो फेरल्याव्अ, 20 तो वो या समझले क वो उं पापी मनख की आत्मा न्अ सदामेस की मोत सुं बचाल्यावलो अर घणा पापा न्अ ढांक्अलो।