ससांर न्अ बायलो बणाबो
4
1 थांक्अ बीच मं लड़ाई-झगड़ो होबा को कांई कारण छ? बां सुख-विळासा सुं कोन कांई ज्यो थांकी काया का अंगा न्अ लड़ाव्अ छ? 2 थे पाबा की मन्सा करो छो अर थान्अ मल्अ कोन, तो थे मारबा बेई त्यार रेवो छो। थे बळ्यामरो छो पण थान्अ मल्अ कोन्अ, तो थे लड़ाई झगड़ा करो छो। थान्अ जिसुं कोन मल्अ क्युं क थे परमेसर सुं मांगो कोन। 3 थे मांगो छो पण थान्अ मल्अ कोन, क्युं क बरी मनसा सुं मांगो छो। जिन्अ खुदका भोग-बिलास मं उड़ा देवो। 4 ह बेगड़ा काम करबाळाओ, थे कोन जाणो कांई, क संसार न्अ बायलो बणाबो परमेसर सुं बेर करबो छ? अस्यान ज्यो कोई ससांर को बायलो बणबो छाव्अ वो खुदन्अ परमेसर को बेरी बणाव्अ छ। 5 कांई थे समझो छो क पवितर सास्तर बनाकाम ई खेव्अ छ, “जी आत्मा न्अ म्हाक्अ मायन्अ बसायो छ उन्अ परमेसर घणु छाव्अ छ।” 6 पण वो तो ओर बी दीया करअ छ, जिसुं यो मण्ढ मेल्यो छ क, “परमेसर घमण्ड करबाळा को बिरोध करअ छ, पण नरमाई सुं चालबाळा मनखा प दीया करअ छ।”7 जिसुं परमेसर क आग्अ नमर हो जाओ, अर सेतान को बिरोध करो तो वो थांक्अ सायरअ सुं भाग जाव्अलो। 8 परमेसर क सांकड़्अ आवो तो वो बी थांक्अ सांकड़्अ आवलो। ह पापीओ, खुदका हाथां न्अ पवितर करो, अर ह दोगलाओ, खुदका हीया न्अ पवितर करो। 9 सौक करो, दुखी होवो अर रोवो, थांकी हांसी आंसुवा मं अर खुसी उदासी मं बदल जाव्अ। 10 परबु क साम्अ नमर बणो तो वो थान्अ ऊंचो करअलो।
लान्छण लगाबो
11 ह भायाओ, एक-दूसरा न्अ बदनाम मत करो। ज्यो भाई न्अ बदनाम करअ छ, अर बी पर लान्छण लगाव्अ छ, वे बेवस्था न्अ बदनाम करअ छ अर बेवस्था माळ्अ लान्छण लगाव्अ छ, अस्यान थे बेवस्था न्अ मानबाळा कोन पण बेवस्था को न्याय करबाळा बणजाव्अ छ। 12 बेवस्था न्अ देबाळो अर न्याय करबाळो तो एक'ई छ, ज्यो बचाबाको अर मारबा को जोर रांखअ छ। पण थे कुण छो, ज्यो खुदका पाड़ोस्या माळ्अ लान्छण लगावो छो?
घमण्ड मत करो
13 सुणो, थे ज्यो अस्यान खेवो छो, “आवो आपा आज-काल फलाणा नगर मं जार एक बरस गुजारअला, अर बोपार करर नफो कमाबाळा”, 14 अर या कोन जाणो क काल कांई होव्अलो। सूणो तो सणी थांकी जन्दगी छ ही कांई? थे तो भाप की जस्यान छो, ज्यो थोड़ी देर दिख्अ छ अर फेर मट जाव्अ छ। 15 पण ईकी बजाय थान्अ या खेणो चायजे क, “परबु की मनसा होव्अ जद्याई तो आपा जीवता रेव्अला, अर यो काम या फेर वो काम करअला।” 16 पण दसा तो या छ क थे ऊंची ऊंची बाता करबा प घमण्ड करो छो, अस्यानको घमण्ड बरो छ।
17 अस्यान ज्यो कोई भलाई करबो जाण्अ छ, अर करअ कोन तो वो पाप करअ छ।