मलिकिसिदक याजक
7
1 यो मलिकिसिदक सालेम को राजो, अर परमप्रधान परमेसर को याजक छो। जद अबराम च्यार राजां न्अ हरार पाछो आर्यो छो तो यो बीसुं मलर बीन्अ आसीर्वाद दियो। 2 अर अबराम ईन्अ सबळी मलेड़ी चीजा को दसवो हस्सो दियो छो। बीका नांऊ को पेलो अर्थ “धार्मिकता को राजो” अर वो सालेम को राजो छो जिको मतलब “सान्ति को राजो” छ। 3 मलिकिसिदक का माई-बाप का बारा मं कांई कोन लिखेड़ो। न्अ बीकी कोई वंसावली। जीका पैदा होबा को अर मरबा को कोई अतोपतो कोन्अ। वो परमेसर का छोरा की जस्यान सदा को याजक छ।4 देखो, वो कतरो महान छो जीन्अ आपणो पूरवज पहलो मनख अबराम युद्ध मं जीतेड़ा माल को चोखा सुं चोखो दसवो हस्सो दियो छो। 5 लेवी की ओलादा मं सुं ज्यो याजक बण्अ छ, वान्अ मूसा का निमा सुं आज्ञा मली छ क वे इजरायल का मनखा सुं दसवो हस्सो लेव्अ। अर वे बी अबराम का वंस का छा। 6 पण यो तो ज्यो अबराम का वंस को बी कोन्अ छो फेरबी अबराम सुं दसवो हस्सो लियो। अर जीन्अ प्रतिज्ञाए मली छी बीन्अ आसीर्वाद दियो। 7 अर इम्अ कोई सक्अ कोन्अ क बड़ो छोटा न्अ आसीर्वाद देव्अ छ। 8 अर अण्डअ तो वे याजक दसवो हस्सो लेव्अ छ ज्यो मरबाळा छ। पण उण्डअ मलिकिसिदक लेव्अ छ जिकी गुवाई सास्तर देव्अ छ क वो जिन्दो छ। 9 तो आपा या बी खे सकां छा क लेवी बी ज्यो दसवो हस्सो लेव्अ छ, वे अबराम सुं होर दसवो हस्सो दिया छा। 10 क्युं क जद मलिकिसिदक लेवी बंस का फेला मनख अबराम सुं मल्यो छो तो लेवी अबराम की काया मं छो।
11 अर इजरायल्या न्अ लेव्या का याजकपणा सुं बेवस्था मली छ। तो जद लेवी का याजक का काम पूरा हे जाव्अ छ तो फेर न्यारी तरा को याजक प्रकटबा को कोई मतलब कोन्अ, ज्यो मलिकिसिदक की रीत सुं याजक होयो छ। पण हारून की रीत माळ्अ कोन्अ। 12 क्युं क जद याजकपणो बदल्यो तो बेवस्था बदलबो बी जरूरी छ। 13 क्युं क जीका बारा मं खियो जाव्अ छ क वो अस्या दूसरा गोत को छ जिम्अ सुं कोई बी यज्ञ कुण्ड की सेवा कोन्अ कर्यो। 14 तो या बात चोड़ा मं छ क आपणो परबु यहुदा का गोत मं पैदा होयो छ। अर मूसा ई गोत सुं कोई याजक होबा का बारा मं कोन्अ खियो।
मलिकिसिदक की जस्यान दूसरो याजक
15 अर यो ओर बी साफ छ क मलिकिसिदक की जस्यान एक ओर याजक होबाळो छो। 16 वो मनखा का निम-कायदा सुं याजक कोन्अ बण्यो, पण नास कोन होबाळी जन्दगी की सक्ति सुं याजक बण्यो छ। 17 क्युं क सास्तर मं गुवाई दी गई छ क, “तु मलिकिसिदक की रीत प जुगजुग क ताणी याजक छ।” 18 फेर पराणी आज्ञा कमजोर अर बनाकाम की होबा की बजेसुं रद्द होगी। 19 क्युं क मूसा की बेवस्था कोई बी बात न्अ पूरी कोन्अ करी छी, पण आपान्अ एक चोखी आस की पेचाण कराई छी जिक्अ जरीये आपा परमेसर क सांकड्अ जारया छा। 20 अर परमेसर मसी न्अ सोगन खार याजक बणायो छ। पण दूसरा न्अ बना सोगन क याजक बणायो छ। 21 पण ईसु सोगन की लार बीकी ओड़ी सुं याजक बणायो गियो छ, परमेसर बीन्अ खेव्अ छ क,
“परबु सोगन खायो छ, क
‘तु जुगजुग को याजक’
अर वो खुदको मन कद्या बी कोन बदल्अलो।”
22 ई सोगन सुं ईसु एक उत्तम करार को जमानती ठेर्यो छ।
23 अर एक फरक ओर छ, क ओर ज्यो याजक होव्अ छ वान्अ मोत आव्अ छ, जिसुं वे सदाई याजक कोन्अ रे पाव्अ छा। 24 पण यो जुगजुग जीवतो छ, ई बजेसुं ईको याजकपणो बी सदाई रेव्अ छ। 25 ई बजेसुं ज्यो बीकी लार परमेसर कन्अ आव्अ छ वो बाको पूरो-पूरो उद्धार कर सक्अ छ क्युं क वो वाक्अ ताणी परमेसर सुं अरदास करबा क ताणी सदाई जीवतो छ।
26 आपण्अ ताणी अस्यान कोई महायाजक लायक छो, ज्यो पवितर, बेदाग अर सुद्ध छो। अर पाप्या सुं न्यारो अर सरग सुं बी ऊंचो होयो छो। 27 अर बा महायाजका की जस्यान बीन्अ जुरत कोन्अ क पेली खुदका पापा क ताणी फेर दूसरा का पापा क ताणी चढ़ावो चढ़ाव्अ। क्युं क वो लोगबागा का पापा बेई खुदकी बली चढ़ार बीन्अ एक'ई बार मं पूरो कर दियो। 28 क्युं क बेवस्था तो कमजोर मनखा न्अ महायाजक बणाव्अ छ, पण बा सोगन ज्यो बेवस्था क पाछ्अ खाई गई छी, बी छोरा न्अ महायाजक बणाई छ ज्यो जुगजुग क ताणी सिध्द करेड़ो छ।