ईसु आपणो महायाजक
8
1 अब ज्यो बात म्हे खेर्या छा बीम्अ सुं सबसुं बड़ी या छ, क आपणो एक अस्यो महायाजकa छ, ज्यो सरग मं सर्वसक्तिमान परमेसर का सिंहासन क जीवणी-बगल जा बेठ्यो। 2 अर बी पवितर ठोर मं सेवा करर्यो छ ज्यो सांचो तम्बूb छ जिन्अ कोई मनख नही पण परबु उबो कर्यो छो। 3 क्युं क हर एक महायाजक भेंट अर बलिदान चढाबा क ताणी ठेरायो जाव्अ छ। ई बजेसुं जरूरी छ क ई कन्अ बी चढाबा क ताणी कोई-कांई होव्अ। 4 अर धरती माळ्अ होतो तो याजक कोन्अ होतो। क्युं क मूसा का निमा की जस्यान भेंट चढ़ाबाळा याजक तो पेलीसुंई छ। 5 जि ठोर वे याजकपणा को काम करअ छा वो तो ज्यो सरग मं छो बीकी नकल अर छाया छ। जस्यान जद मूसा तम्बू बणाबाळो छो, तो बीन्अ चेतावणी मली छी क, “देखज्यो नमुनो तन्अ डुंगर माळ्अ दखायो गियो छ, बीकी जस्यानई सबळी चीजा बणाज्यो।” 6 पण ईसु न्अ ज्यो सेवा को काम मल्यो छो, वो बांका सेवा का कामा सुं साउटो चोखो छो। क्युं क वो जि करार को बिचोल्यो छो वो पराणा करार सुं चोखो छ। अर नयो करार चोखा वादा सुं बान्ध्यो गियो छ। 7 क्युं क बा पेला करार मं खोट कोन होती तो दूसरी क ताणी मोको कोन्अ मलतो। 8 पण वो बाम्अ दोष पार खेव्अ छ क परबु खेव्अ छ क,“देखो वे दन आव्अ छ,
क इजरायल का कुणबा की लार अर यहुदा का कुणबा की लार एक नयो करार करूलो।
9 परबु अस्यान खेव्अ छ, या बी करार की जस्यान कोन्अ होव्अली
ज्यो म बांका आग्ला बढ़ा की लार वान्अ मिसर देस सुं हाथ पकड़र नखाळती बगत खायो छो।
क्युं क परबु खेव्अ छ क वे लोगबाग म्हारा करार को बस्वास कोन कर्या,
म वासुं मुण्डो फेर लियो।
10 फेर परबु खेव्अ छ, क ज्यो करार म बा दना क पाछ्अ इजरायल्या की लार करूलो बा या छ क,
म म्हारा निमा न्अ बांका मन मं बसाऊलो,
अर बांका हीया माळ्अ मांडूलो,
अर म बांको परमेसर होऊलो अर
वे म्हारा लोगबाग होव्अला।
11 अर हरेक खुदका देस का मनखा न्अ अर
भाई-बन्दा न्अ या सक्षा कोन्अ देव्अला
क ‘तु परबु न्अ जाण।’
क्युं क धोखा सुं लेर बडा ताणी
सबळा मन्अ जाण लेव्अला।
12 क्युं क म बांका अधर्म का बारा मं दीया दखाऊलो,
अर बांका पापा न्अ कद्या बी याद कोन्अ रांखूलो।”
13 ई करार न्अ नयो खेर वो पेला करार न्अ बनाकाम को ठेरा दियो। अर ज्यो चीज पराणी अर फाटी-टूटी हो जाव्अ छ बीको मटणबो जरूरी छ।