फिलेमोन क नांऊ पौलुस को कागद
फिलेमोन
1
1 मसी ईसु बेई बन्दी बण्यो म पौलुस अर आपणा भाई तीमुथियुस की ओड़ी सुं।म्हाका प्यारा भायला अर लारा काम करबाळा फिलेमोन,a 2 bआपणी बेणा अफफिया, आपणी लार का सपाई अरखिप्पुस अर थांक्अ घरा भेळा होबाळा बस्वास्या की टोळी न्अ।
3 आपणा परम बाप परमेसर अर परबु ईसु मसी की ओड़ी सुं थान्अ दीया अर सांति मल्अ।
फिलेमोन को परेम अर बस्वास
4 खुदकी परातना मं थारो नांऊ लेता होया म सदाई आपणा परमेसर को धन्यवाद करतो रेऊ छु। 5 क्युं क म परमेसर का पवितर मनखा बेई थारा परेम अर ईसु मसी मं थारा बस्वास का बारा मं सुणतो रेऊ छु। 6 म्हारी परातना छ क तु थारा बस्वास सुं पदा मेळजोळ सुं लोगा न्अ गेलो दखाव्अ। जिसुं वान्अ वां सबळी चोखी चीजा को ज्ञान हो जाव्अ ज्यो मसी का मकसद न्अ आग्अ चलाबा मं आपणा बीच मं होरी छ। 7 ह भायाओ, थांकी जोरीसुं परमेसर का पवितर मनखा का हीया हरया-भरया होग्या, जिसुं थारा परेम सुं मन्अ घणो आण्द मल्यो छ।
उनेसिमुस न्अ भाई मानबो
8 मसी मं मन्अ थारा काम करबाळा बेई आदेस देबा को अधिकार छ। 9 पण परेम सुं म थासुं अरदास करबो चोखो समझु छु। म पौलुस ज्यो अब बुढ़ो होर्यो छु, अर मसी ईसु का चोखा समचार को परचार करबा की बजेसुं बन्दी बी बण मेल्यो छु। 10 cजद्या म बन्दी घर मं छो तो उनेसिमुस म्हारो मसी का बस्वास मं छोरो बण्यो छो उंका बारा मं अरदास करर्यो छु। 11 एक बगत छी जद्या यो थारा कांई बी काम को कोन छो, पण अब थारा अर म्हारा दोन्या का घणो काम को छ।
12 वो म्हारा काळज्या को टुकडो छ उन्अ म फेरू थां कन्अ खन्दार्यो छु। 13 म उन्अ अण्डअ म्हारी लांरा'ई रखाणबो छाव्अ छो क थारी ओड़ी सुं चोखा समचार बेई म्हारी सेवा कर सक्अ। क्युं क म चोखा समचार न्अ सुणाबा की बजेसुं जैळ मं बन्द छु। 14 पण फिलेमोन, म म्हारी सायता करबा बेई थारी जोरी कोन करबो चाऊ। म थारी मरजी क बना कांई बी कोन करबो चाऊ। म चाऊ छु क तु बिन्अ राजी होर करअ।
15 कांई तोल वो तसुं थोड़ा दना ताणी जिसुं न्यारो होयो क सदाई थारअ सांकड्अ रेव्अ। 16 दास की जस्यान नही, पण दास सुं बी साऊटो एक प्यारा भाई की जस्यान। म बीसुं घणो परेम करू छु पण तु उन्अ ओर बी साऊटो परेम करअलो। एक मनख की जस्यान नही पण परबु मं बण्या एक भाई की जस्यान।
17 अर ज्यो तु मन्अ खुदको पांतीदार समझ्अ तो उन्अ बी म्हारी जस्यान कोई समझ। 18 अर ज्यो वो थारो कांई बरो कर्यो छ या बीक्अ उपरअ थारो करजो छ तो उन्अ म्हारा खाता म माण्ढ द्अ। 19 म पौलुस खुद म्हारा हाथा सुं या माण्ढ़र्यो छु, म थन्अ सब चुका द्युलो। थन्अ या बताबा की जुरत कोन्अ क थारी जन्दगी म्हारी करजदार छ। 20 हां भाया, मन्अ तसुं ईसु मसी का नांऊ सुं यो फायदो मल्अ तो म्हारा हीया मं चेन मल्अ।
21 म जाणु छु क जस्यान म माण्ढ़र्यो छु वस्यान थे करअला पण उसुं बी साऊटो करअलो। 22 म्हारअ बेई रेबा की ठोर को इन्तजाम रखाणज्यो क्युं क म्हारो बस्वास छ क थांकी परातना की बजेसुं म राजी-खुसी थासुं मलुंलो।
कागद की समाप्ती
23 dमसी ईसु मं बण्या म्हारी लार का बन्दी इपफ्रास को थान्अ नमस्कार। 24 eम्हारी लार काम करबाळा, मरकुस, अरिस्तर्खुस, देमास अर लूका को थान्अ नमस्कार मालुम होव्अ।
25 थां सबळा प परबु ईसु मसी की दीया बणी रेव्अ। अस्यान'ई होव्अ!