परबु का फेरू आबाळा दन बेई तियार रेवो
5
1 ह भाई-बेणो, परबु का फेरू आबा का तथ-बार अर बगत का बारा मं थां बेई माण्ढबा की कोई जुरत कोन्अ 2 aक्युं क थे खुद खूब चोखा जाणो छो क चोर रात मं छान्अ सेक आव्अ छ, वस्यान ई परबु को पाछो आबा को दन आवलो। 3 जद्या लोग खेर्या होव्अला क “सब कुछ सान्त अर सुरक्षित छ” जद्या जस्यान कोई दो जीवां बेरबानी क अण्याचुको दर्द चालबा लागजाव्अ छ वस्यान ई वा प बिनास उतर्यावलो अर वे कढी बचर बी कोन भाग सक्अला।4 पण ह भाई-बेणो, थे अन्धेरा मं रेबाळा कोन छो क थांप्अ परबु का पाछा आबा को वो दन चोर की न्याय छान्अ सेक आजाव्अ। 5 क्युं क थे सबळा तो उजाळा का छोरा छो अर दन की ओलाद छो। आपान्अ तो रात सुं जुड़ मेल्या छा अर न्अ अन्धेरा सुं। 6 जिसुं आपान्अ ओरां की न्याई सुता कोन रेणी चायजे, पण सावधानी सुं आपान्अ खुदन्अ काबु मं रखाणणी चायजे। 7 क्युं क रात मेई लोगबाग सोव्अ छ, अर नसो करबाळा बी रात मं ही मस्त होव्अ छ। 8 bपण आपा तो दन सुं जुड़या छा जिसुं आपान्अ खुद प काबु रखाणणी चायजे। आवो बस्वास अर परेम को कवच पेरल्यां अर उद्धार पाबा की आस न्अ टोपा की न्याय फेरर सावचेत हो जांवा। 9 क्युं क परमेसर आपान्अ खुदका रोष बेई नही पण आपणा परबु ईसु मसी मं मुक्ति पाबा बेई बणायो छ। 10 ईसु मसी आपण्अ बेई मरग्यो क छाव्अ आपा जीवता छा या मरया, जद्या वो फेरू पाछो आव्अ उंकी लारा जीवता रेवां। 11 जिसुं आमा-सामा सुख देवो अर एक-दूसरा न्अ आत्मा का रुप सुं गाढ़ा बणाता रेवो। जस्यान थे कर बी रया छो।
आखरी नर्देस
12 ह भाईवो थासुं म्हाकी अरदास छ क ज्यो मनखc थांक्अ गाब्अ मेनत करर्या छ अर परबु मं ज्यो थान्अ गेलो बतार्या छ, वांको आदर करता रेवो। 13 थासुं म्हाकी अरदास छ क वांका काम की बजेसुं वांन्अ परेम सुं पूरो आदर देता रेवो। आमा-सामा सांति सुं रेवो।
14 ह भाईवो, थासुं म्हाकी अरदास छ आळस्या न्अ चतावो, डरपण्या न्अ हिम्मत बन्धावो, बोदा मनखा की सायता मं चत लगावो, सबळा की लारा थरचा रखाणो। 15 देखता रेवो क कोई बराई को बदलो बराई सुं कोन देव्अ, पण सबळा मनख हमेसा एक-दूसरा की लारा भलाई की जोरी करअ।
16 हमेसा राजी रेवो। 17 लगतमार परातना करता रेवो। 18 हरेक बात मं परमेसर को धन्यवाद करो। क्युं क थांक्अ ताणी मसी ईसु मं परमेसर की याई मन्सा छ।
19 पवितर-आत्मा का कामा न्अ मत दबावो। 20 परमेसर की ओड़ी सुं बोलबाळा का संदेसा न्अ कद्या बी छोटा मत समझो। 21 हरेक बात की सांच न्अ परखो, ज्यो चोखी छ उन्अ मानता रेवो 22 अर सब तरा की बराई सुं बच्या रेवो।
23 सांति देबाळो परमेसर खुद'ई थान्अ एकधम पवितर करअ। पुरीतरां सुं मतलब थे खुदका सबळा आत्मा, पराण अर काया न्अ आपणा परबु ईसु मसी क पाछो आबा ताणी एकधम बना दोष की बणाया रखाणो। 24 वो परमेसर ज्यो थान्अ बलायो छ बस्वास करबा जस्यान को छ। जरूर वो अस्यान'ई करअलो।