परमेसर न्अ राजी करबाळी जन्दगी
4
1 ह भाई-बेणो, अब मन्अ थान्अ एकात बात ओर बताणी छ। ईसु मसी का नांऊ सुं म्हे थासुं परातना अर अरदास करां छा क थे जस्यान म्हाका उपदेस मान्या छा, थान्अ परमेसर न्अ राजी करबा बेई वांकी न्याई चालणी चायजे। जरूर थे वस्यान ई चालर्या छो। पण थे वस्यान ई ओरू साऊटा करता चालो। 2 क्युं क थे या जाणो छो क परबु ईसु का अधिकार सुं म्हे थान्अ आदेस दिया छा।3 अर परमेसर की याई मन्सा छ क थे पवितर हो जावो, अर वेभिचार सुं आंतरअ रेवो, 4 खुदकी बेरबानीa की लारा कस्यान रियो जा सक्अ छ थान्अ ईको ज्ञान होणी चायजे थाम्अ सुं हरेक खुदकी बेरबानी की लारा पवितर अर आदर की लारा रेवो 5 अर ये कामवासना सुं ज्यो परमेसर न्अ कोन जाणबाळा अधर्म जस्यानकी छ। 6 यां बी परमेसर की मन्सा छ क ई बारा म कोई बी खुदका भाई बेई कोई अपराध कोन करअ या फेर कोई अनुचित फायदो कोन उठाव्अ, क्युं क अस्यान का सबळा पाप बेई परबु सज्या देव्अलो जस्यान म्हे थान्अ बता दिया छा अर थान्अ साऊचेत बी कर दिया छा। 7 परमेसर आपान्अ अपवितर बणबा बेई कोन बलायो पण पवितर बणबा बेई बलायो छ। 8 जिसुं ज्यो ई सक्ष्या बेई नटर्यो छ वो कोई मनख न्अ कोन नटर्यो पण परमेसर न्अ नटर्यो छ। उं परमेसर न्अ ज्यो थान्अ खुदकी पवितर-आत्मा बी देर्यो छ।
9 अब थान्अ ईकी जुरत कोन्अ क थान्अ भाई-बेण का परेम का बारा मं बी माण्ढ्यो जाव्अ, क्युं क परमेसर खुद थान्अ एक-दूसरा सुं परेम करबा की सक्ष्या दियो छ। 10 अर सांच्याई थे खुदका सबळा भाया की लार मकिदुनिया मं अस्यान'ई करर्या छो। अर म्हे चावां छा क थे परेम मं ओरू बढ़ता जावो। 11 सांति सुं जीबा न्अ आदर की बात समझो। खुदका काम सुं काम रांखो अर अपणा हाथा की कमाई खावो। जस्यान म्हे थान्अ बताई चुक्या छा। 12 इसुं बेबस्वासी मनख थांका जीबा का ढंग सुं थांको आदर करअला। जिसुं थान्अ कोई दूसरा क भरोसअ रेबा की जुरत कोन पड़्अली।
परबु को पाछो आबो
13 ह भाईवो, म्हे चावां छा क ज्यो सदा की नींद मं सोग्या वांका फेरू जीवतो होबा का सच न्अ जाणो, जिसुं थान्अ बना बस्वासहाळा की जस्यान कळेस कोन करणी पड़्अ, ज्यां कन्अ आस कोन्अ। 14 क्युं क ज्यो म्हे यो बस्वास करां क ईसु की मोत होगी अर वो फेरू जीवतो होग्यो। तो या बात बी बस्वास करबाळी छ क ज्यो उम्अ बस्वास करता होया मरग्या, वांकी लारा बी परमेसर वस्यान ई करअलो अर ईसु की लारा वान्अ पाछा खन्दावलो।
15 bक्युं क म्हे परबु का सखाया बचन की जस्यान थान्अ या खेर्या छा क जद्या परबु फेरू पाछो आवलो तो आपा ज्यो जीवता छा अर हालताणी अण्डअ'ई छा वांसु आग्अ कोन नखळ सका ज्यो मर चुक्या छ। 16 क्युं क सरगदूता को मुखियो जद्या खुदकी ऊंची आवाज सुं आदेस देव्अलो अर जद्या परमेसर को नरसिंगो बाज्अलो तो परबु खुद सरग सुं उतरअलो। उं बगत ज्यो मसी म मरग्या वे पेली जी उठ्अला। 17 वांक्अ पाछ्अ आपा ज्यो जीवता छा, अर हालताणी बी अण्डअ'ई छा वांकी लाराई बायरा म परबु सुं मलबा बेई बादळा म उपरअ उठालिया जाव्अला, अस्यान आपा हमेसा बेई परबु की लारा हो जाव्अला। 18 तो यां सब्दा की लार एक-दूसरा को जोस बढ़ाता रेवो।