थिस्सलुनीके नगर मं पौलुस का काम
2
1 ह भाई-बेणो, थे खुद जाणो छो क म्हाको थां कन्अ आबो बेकार कोन्अ छो। 2 aथे खुद जाणो छो क थां कन्अ आबासुं पेली फिलिप्पी सहर मं दुख उठाबा अर बेजती सेन कर्या पाछ्अ अर जोरको बिरोध होता होया बी परमेसर की सायता सुं मान्अ परमेसर का चोखा समचार न्अ सुणाबा की हिम्मत मली छ। 3 क्युं क म्हाका परबचन छळ का अर असुद्ध अर भरम मं पटकबाळा कोन्अ। 4 क्युं क परमेसर म्हान्अ ई लायक समझ्यो अर चोखो समचार सुणाबा को काम सुप्यो छ। वस्यान म्हे मनखा न्अ राजी करबा की जोरी कोन करां पण म्हे तो उं परमेसर न्अ राजी करां छा ज्यो आपणा मना न्अ परखअ छ।5 थे खुब चोखा जाणो छो क म्हे कद्या बी चुपड़ी बाता की लारा थांक्अ साम्अ कोन आया। परमेसर ईको गुवा छ, क म्हाका परबचन कोई लोभ को भायनो कोन्अ छा। 6 म्हे मनखा सुं कोई मान-सम्मान कोन चाया। न्अ थासुं अर न्अ कोई दूसरा सुं। अर हां म्हे मसी का खन्दायेड़ा होबा को अधिकार जमा सक्अ छा 7 पण म्हे थांक्अ गाब्अ वस्यान ई नम्रता सुं रिया जस्यान एक माई खुदकी ओलाद न्अ दूध पार पाळ्अ छ। 8 म्हे थां बेई अस्यान की नरमाई मेसुस कर्या छा, क परमेसर सुं मल्या चोखा समचार की लारां खुदकी ज्यान बी दे सकां छा क्युं क थे म्हाका प्यारा होग्या। 9 ह भाई-बेणो, थे म्हाका रात-दन का कळ्डा बाथेड़ा न्अ अर मुसिबतां न्अ याद रखाणो जिन्अ म्हे जिसुं कर्या छा क परमेसर का चोखा समचार न्अ सुणाता होयां म्हे थांक्अ उपरअ बोझ कोन बणा। 10 थें म्हाका गुवा छो, अर अस्यान'ई परमेसर बी गुवा छ क थां बस्वास्या बेई म्हाको बेवार कतरो खरो, चोखो अर बना दोषहाळो छो। 11 थे जाणोई छो क म्हे थाम्अ सुं हरेक की लार वस्यान बेवार कर्या छा जस्यान एक बाप खुदका छोरा-छोर्या की लार बेवार करअ छ। 12 म्हे थान्अ हिम्मत बन्दाया छा, आराम दिया छा अर उं तरीका सुं जन्दगी जीबा की कुसामद कर्या छा जिसुं परमेसर राजी होव्अ छ, ज्यो थान्अ खुदका राज अर महमा मं बलायो छ।
13 अर जिसुं म्हे लगतमार परमेसर को धन्यवाद करां छा क्युं क थे जद्या म्हासुं परमेसर को बचन सुण्या छा तो म्हे उन्अ मनखा को संदेस मानबा की बेई परमेसर को संदेस मान्या छा, वस्यानई वो सांचो छ, अर थां बस्वास करबाळा मं परमेसर काम बी करर्यो छ। 14 bह भाई-बेणो, थे यहूद्या नगर की मसी ईसु का बस्वास्या की टोळी क पाछ्अ चालो छो। थे खुदकी लारहाळा भाया सुं वस्यान ई दुख झेल्या छो जस्यान वे यहूद्या क हाथा सुं दुख झेल्या छा। 15 cज्यो परबु ईसु न्अ अर परमेसर की ओड़ी सुं बोलबाळा न्अ मार दिया अर आपान्अ सताया छा, वासुं परमेसर राजी कोन्अ वे तो सबळी मनख ज्यात का बिरोधी छ। 16 वे गेर यहूदया मं चोखा समचार का उपदेस देबा मं रोड़ा अटकाव्अ छ क कढ्अ वां मनखा को उद्धार कोन हो जाव्अ। या बाता मं वे सदाई खुदका पाप को घड़ो भरता रेव्अ छ अर अब अन्त मं परमेसर को रोष वांक्अ उपरअ आ पड़यो!
पौलुस की फेरू मलबा की मन्सा
17 ह भायाओ, जण्ढ्अ ताणी म्हाकी बात छ, म्हे थोड़ी बगत बेई काया मं थासुं बछटग्या छा, पण म्हाका मन थांकी लाराई छा। थासुं मलबा बेई म्हे गाड़ा उतावळा होरया छा। 18 हां! म्हे थां कन्अ आबाकी खुब जोरी करर्या छा। म पौलुस खुद बी घणी बार जोरी कर्यो पण सेतान उम्अ रोड़ा अटका दिया। 19 अच्छया तो बतावो म्हाकी आस, म्हाको जोस या फेर म्हाको वो मुकुट जिप्अ मान्अ अतरो अभिमान छ, कांई छ? थे वो कोन्अ कांई। आपणा परबु ईसु क दुबारा आया सुं जद्या म्हे उंक्अ साम्अ मेजुद होव्अला 20 तो अण्डअ थे म्हाकी महमा अर म्हाको आण्द होव्अला।