थिस्सलुनीकिया नगर का बस्वास्या की टोळी क नांऊ पौलुस को पहलो कागद
1 थिस्सलुनीकियों
1
1 cयो कागद पौलुस, सिलवानुसa अर तीमुथियुस की ओड़ी सुं परम बाप परमेसर अर परबु ईसु मसी मं बण्या थिस्सलुनीकिया सहर का बस्वास्या की टोळी क नांऊ, थान्अ परमेसर की दीया अर सांति मल्अ। bथिस्सलुनीकिया का बस्वास्या को बस्वास अर जन्दगी
2 म्हे थां सबळा बेई सदाई परमेसर न्अ धन्यवाद देता अर थान्अ परातना मं याद करता रेवां छा। 3 अर आपणा परमेसर अर बाप क साम्अ थांका वा बस्वास का कामा न्अ अर परेम बेई थांकी कडी मेनत न्अ अर आपणा परबु ईसु मसी का आबाकी आस मं थरचा न्अ लगतमार याद रखाणा छा।
4 परमेसर का प्यारा म्हाका भायाओ, म्हे जाण्अ छा क थें चुणेड़ा छो। 5 क्युं क म्हाका चोखा समचार को ब्योरो थां खन्अ बाता मेई कोन पुच्यो पण पवितर-आत्मा की सामर्थ अर गाढ़ी भगती सुं पुच्यो छ। थे जाणो छो क जद्या म्हे थांकी लारा छा, तो थांका फायदा बेई कस्यान की जन्दगी जीव्अ छा। 6 dघणा दुखा का बीच मं थे पवितर-आत्मा सुं मलबाळी खुसी की लारा चोखा समचार न्अ मान्या अर म्हाक्अ अर परबु क पाछ्अ चालबा लागग्या।
7 जिसुं मकिदुनिया परदेस अर अखाया परदेसा का सबळा बस्वास्या बेई थे एक नमुनो बणग्या 8 क्युं क थाम्अ सुं परबु का संदेस की ज्यो आवाज उठी छ, वा मकिदुनिया अर अखाया नगर मेई कोन सुणी गई पण परमेसर मं थांको बस्वास हर कढी जाण्यो जाबा लागग्यो। तो अब मान्अ कांई बी खेबा की जुरत कोन्अ। 9-10 क्युं क वे खुद'ई म्हाका बारा मं बताव्अ छ क थे कस्यान म्हाकी आवभगत कर्या छा। अर जीवता अर सांचा परमेसर की सेवा करबा बेई अर सरग सुं उंका छोरा की पाछो आबाकी बाठनाळता होया थे मूरत्या की ओड़ी सुं सांचा परमेसर ओड़ी कस्यान मुढ़या छा। छोरो मतलब ईसु न्अ वो मरया मंसुं फेरू जीवतो कर्यो छो, अर वोई परमेसर का आबाळा रोषा सुं आपणी रक्षा करअ छ।