दूसरा न्अ राजी राखो, खुदन्अ नई
15
1 आपा ज्यो बस्वास मं गाढ़ा छा, आपान्अ चायजे क आपा वांकी कमजोरी न्अ सेन करां ज्यो बस्वास मं कमजोर छ। आपा बस खुदन्अ ई राजी कोन करां। 2 पण आपा मंसुं हरेक दूसरा की भलाया बेई ई मंसा सुं वांन्अ राजी करां क वे बस्वास मं बढ़अ। 3 अण्डअ ताणी क मसी बी खुदन्अ राजी कोन कर्यो छो। पण जस्यान मसी का बारा मं सास्तर मं मण्ढ मेल्यो छ, “थारी बेजती करबाळा की बेजती म्हारअ उपरअ आ पड़ी।” 4 जतरी बी बाता सास्तर मं पेली सुं माण्ढी गई छ आपान्अ सखाबा बेई छ, क आपा थरचा अर हिम्मत ज्यो सास्तर सुं मल्अ छ उसुं आसा रखाणा। 5 अर सबळी थरचा अर हिम्मत देबाळो परमेसर थान्अ बरदान देव्अ क मसी ईसु की जस्यान आमा-सामा एक मन का होर रेबा को मन दे। 6 जिसुं क थे सबळा एक मन होर एक आवाज मं आपणा परबु ईसु मसी का पिता परमेसर न्अ महमा देता रेवो।7 परमेसर की महमा करबा बेई एक-दूसरा न्अ अपणावो जस्यान मसी थान्अ अपणायो छो। 8 जिसुं म थान्अ बतार्यो छु क परमेसर खुदकी बस्वास योग्यता की जस्यान, आग्ला बढ़ा सुं कर्या वादा न्अ मजबुत करबा बेई मसी यहूदी मनखा को दास बण्यो। 9 अर गेर यहूदी बी परमेसर न्अ उंकी दीया बेई महमा देव्अ। जस्यान सास्तर मं मण्ढर्यो छ;
“ई बजेसुं गेर यहूदी मनखा क गाब्अ थन्अ पेचाणुलो;
अर थारा नांऊ की महमा गाऊलो।”
10 अर फेरू खियो छ;
“गेर यहूदी मनखवो, परमेसर का मनखा की लार राजी रेवो।”
11 अर फेरू खियो;
“सबळा गेर यहूदी मनखवो परबु की महमा करो।
अर सबळी जात्याओ उंकी महमा करो।”
12 अर फेर यसायाह बी खेव्अ छ;
“यिसे का बंस को एक मनख आवलो,
ज्यो गेर यहूदी मनखा बेई राजो बण्अलो।
अर वे उंप्अ आस लगाव्अला।”
13 सबळी आसा देबाळो परमेसर थान्अ उम्अ बस्वास करबा सुं सब तरा का आण्द अर सान्ति सुं भर दे, जिसुं पवितर-आत्मा की तागत सुं थांकी आसा बढ़ती जाव्अ।
गेर यहूदी मनखा मं पौलुस की सेवा
14 ह म्हारा भाईवो, मन्अ थाप्अ भरोसो छ क थे भलाई सुं भरया छो अर ज्ञान सुं पुरा छो। अर थे एक-दूसरा न्अ सखा सको छो। 15 पण थान्अ फेरू याद दुवाबा बेई एक-दो बाता का बारा मं साफ-साफ माण्ढ्यो छु। यो म उं दीया सुं कर्यो छु ज्यो मन्अ परमेसर दियो छ। 16 मतलब गेर यहूदी मनखा बेई मसी ईसु की सेवा करबाळो होर परमेसर का चोखा समचार की सेवा याजक की नाई करू, जिसुं गेर यहूदी मनख परमेसर क साम्अ मानी जाबाळी भेंट बण सक्अ अर पवितर-आत्मा सुं पूरी तरा पवितर बण्अ। 17 तो मसी ईसु मं परमेसर बेई म्हारी सेवा को मन्अ घमण्ड छ। 18 म बस वाई बाता न्अ खेबा की हिम्मत रांखू छु, ज्यांसुं मसी गेर यहूदी मनखा न्अ परमेसर न्अ मानबा बेई म्हारा बचन, म्हारा काम, 19 तागतहाळा नसाण अर अचम्बा का काम की तागत अर परमेसर का आत्मा की तागत सुं म्हारअ जरिये पूरो कर्यो छ। अर जिसुंई यरूसलेम नगर सुं लेर ईल्लुरिकुम परदेस क च्यारूमेर मसी का चोखा समचार न्अ सुणाबा को काम म पूरो कर्यो छु। 20 म्हारी सदा या मन्सा रेई छ क म मसी का चोखा समचार को उपदेस उण्डअ देऊ जण्ढ्अ कोई बी मसी को नांऊ कोन जाण्अ। जिसुं म दूसरा की नीव प घर कोन बणाऊ। 21 जस्यान सास्तर मं मण्ढरी छ;
“ज्यांन्अ उंका बारा मं कोन बताया वे उन्अ देख्अला।
अर ज्यो सुण्या बी कोन्अ वे समझ्अला।”
पौलुस को रोम जाबाको बच्यार बणाबो
22 aकेई बार म थां कन्अ आबासुं रोक्यो गियो छु। 23 पण अब या परदेसा मं म्हारो काम खतम होग्यो अर घणा बरसा सुं म थासुं मलबो छार्यो छु। 24 जिसुं म स्पेन देस जाती बगत थां कन्अ होर जाऊलो। क्युं क मन्अ उम्मीद छ क ई यात्रा मं थासुं मलु अर जद्या थांकी लार रेबा सुं म्हारो मन थोड़ोघणो राजी हो जाव्अ तो मन्अ आग्अ की यात्रा मं थांकी सायता मल्अ।
25 bपण अब म परमेसर का पवितर मनखा की सेवा करबा यरूसलेम जार्यो छु। 26 क्युं क मकिदुनिया अर अखाया परदेस का बस्वास्या की टोळी का मनखा न्अ यो चोखो लाग्यो क यरूसलेम मं रेबाळा परमेसर का पवितर मनखा मं ज्यो गरीब छ, वान्अ कोई-कांई देव्अ। 27 cहां, या वे खुद तय कर्या छ अर वाक्अ बेई वांकी जुम्मेवारी बण्अ छ। क्युं क गेर यहूदी मनख वांका आसीर्वाद मं पांतिदार होया छ तो या वाकी जुम्मेवारी बण्अ छ क वे खुदकी चीजा सुं यहूदी मनखा की सायता करअ। 28 अर जद्या म भेळो कर्या गिया धन न्अ वांका हाथा मं सुंपर ई काम न्अ पूरो करल्यु तो थांका नगर सुं होता होया पाछो स्पेन जाऊलो। 29 अर म जाणु छु जद्या थां कन्अ आंउलो तो मसी का आसीर्वाद की लारा आंउलो।
30 ह भायाओ, म थान्अ आपणा परबु ईसु मसी अर पवितर-आत्मा को परेम याद दुवार अरदास करू छु क परमेसर सुं परातना करता होया आत्मा मं ज्यो बाथेड़ो करर्यो छु उम्अ थे म्हारी लार रेवो। 31 क म यहूद्या का बना बस्वास्या सुं बच्यो रेऊ अर यरूसलेम मं रेबाळा परमेसर का पवितर मनखा बेई ज्यो दान म लेर जार्यो छु वो वान्अ चोखो लाग्अ। 32 जिसुं परमेसर की मरजी की जस्यान म राजी होर थां कन्अ आर आण्द मना सकु। 33 सान्ति देबाळो परमेसर थां सबळा की लार रेव्अ। आमीन।