रोमियों 11

इजरायल्या प परमेसर की दीया

1 जिसुं म खेऊ छु, कांई परमेसर खुदकी परजा न्अ छोड़ दियो? एकधम नही, म बी तो इजरायली छु अबराम का बंस अर बिन्यामीन की गोत को छु। 2 परमेसर खुदकी परजा न्अ अण्जाण कोन मसझ्यो, ज्यांन्अ वो पेलीसुंई जाण्अ छो। कांई थे कोन जाण्अ छा क एलिय्याह का बारा मं पवितर सास्तर कांई खेव्अ छ, जद्‍या एलिय्याह परमेसर सुं इजरायल का मनखा का बिरोध मं परातना करर्यो छो? 3 “हे परबु, वे परमेसर की ओड़ी सुं बोलबाळा थारा मनखा न्अ मार दिया। थारा यज्ञ कुण्ड न्अ फोड़र बखेर दिया। थारी ओड़ी सुं बोलबाळो ऐकलो मं ई बच्यो छु। अर वे मन्अ बी मारबा बेई हेररया छ।” 4 पण जद्‍या परमेसर उन्अ कस्यान जुवाब दियो छो, “म खुद बेई सात हजार मनख बचा मेल्यो छु ज्यो झूंटा देवता बाअल क आग्अ ढोक कोन्अ दिया।” 5 वस्यानई आज क्याल बी एकात इजरायली उंकी दीया सुं चुण मेल्या छ। 6 अर ज्यो वो परमेसर की दीया को नतिजो छ तो करमा को नतिजो कोन्अ। नही तो दीया को कांई मतबल।

7 इसुं कांई छ? इजरायल का मनख जिन्अ हेररया छा, वे उन्अ कोन्अ पा सक्या। पण वो चुणेड़ा न्अ मलग्यो। पण ओर दूसरा न्अ कळ्डा बणाया गिया छ। 8 सास्तर मं मण्ढरी छ क,

“परमेसर वान्अ एक बना समझ को आत्मा दियो छ।”

“अस्यान की आंख्या दियो ज्यो देख कोन्अ सक्अ छी

अर अस्यान का कान दियो ज्यो सुण कोन्अ सक्अ।

अर याई दसा ठीक आजताणी बण मेली छ।”

9 दाऊद खेव्अ छ,

“वांका रोटी टुकड़ा वा बेई जाळ, फन्दा, ठोकर

अर सज्या बणजाव्अ।

10 वांकी आंख्या धुंधळी हो जाव्अ जिसुं वे देख कोन्अ सक्अ

अर वांकी कमर सदाई लळी रेव्अ।”

11 तो म बुजु छु कांई वे जिसुं ठोकर खाया छा क वे नास हो जाव्अ? एकधम नही। पण वांका गलती करबा सुं गेर यहूदी मनखा न्अ छूटवाड़ो मल्अ जिसुं यहूदी मनख वासुं होड़ करबा लागजाव्अ। 12 अस्यान वांको गलती करबा को मतलब सबळा जगत की भरपुरी छ अर ज्यो वांका नाकाम होबासुं गेर यहूदी मनखा की भरपुरी छ। तो वां सबळा का सामिल होबासुं तो घणी भरपुरी होव्अली।

13 अब म थां गेर यहूदी मनखा न्अ खेर्यो छु, क्युं क जस्यान म गेर यहूदी मनखा बेई थरपेड़ो चेलो छु अर ईप्अ मन्अ घमण्ड छ। 14 वस्यान ई म चाऊ छु म्हारा मनखा मं होड़ ठोर सकूं अर वाम्अ सुं थोड़ाघणा न्अ बचा सकूं। 15 क्युं क परमेसर को वान्अ अण्जाण करबो जगत का दूसरा मनखा को परमेसर सुं मेलमिलाप करवाव्अ छ, तो वान्अ अपणाबो मरेड़ा मंसुं जुवाबो कोन होव्अलो कांई? 16 ज्यो आपणा चढ़ावा को भोग पवितर छ तो बाकी को सबळो पवितर कोन्अ कांई। अर ज्यो जड़ पवितर छ तो उंकी डाळ्यां बी पवितर छ।

17 पण ज्यो जैतून का रूंखड़ा की कोई डाळी तोड़र फका दी जाव्अ, अर तु ज्यो एक जंगळी जैतून का रूंखड़ा की डाळी छ उन्अ उंप्अ कलम चढ़ा दियो जाव्अ। अर वा चोखा जैतून का रूंखड़ा की जड़ा सुं पोसण लेबा लागजाव्अ छ, 18 तो थन्अ वां डाळ्यां ज्यांन्अ तोड़र फका दिया वाक्अ आग्अ घमण्ड कोन करणी चायजे। अर ज्यो तु घमण्ड करअ छ तो चेत रांख वो तु कोन्अ ज्यो जड़ा न्अ पाळर्यो छ, या तो वा जड़ छ ज्यो थन्अ पाळरी छ। 19 अब तु खेवलो, “हां डाळ्यां ई बजेसुं तोड़ी गई क म्हारी कलम चढ्अ।” 20 या बात सांची छ। पण वे वांका अबस्वास की बजेसुं तोड़ी गई छ पण थे थांका बस्वास की बजेसुं टक्या रेवो छो। ई बजेसुं ईको घमण्ड मत कर पण डरपतो रे। 21 अर ज्यो परमेसर असल डाळ्यां न्अ कोन छोड़यो तो वो थन्अ बी कोन छोड़्अलो।

22 ई बजेसुं तु परमेसर की दीया न्अ देख अर उंकी कळ्डाई प ध्यान द्अ। या कळ्डाई वां बेई छ ज्यो गरग्या पण उंकी दीया थारबेई छ। अर ज्यो थे परमेसर की दीया मं बण्या रेव्अ तो उंकी दीया थारबेई छ। नही तो थन्अ बी काटर फका दियो जाव्अलो। 23 अर ज्यो वे खुदका अबस्वास न्अ छोड़ देव्अ तो वान्अ बी रूंखड़ा मं फेरू जोड़ दियो जाव्अलो। क्युं क परमेसर वान्अ फेरू जोड़बा की सक्‍ति राख्अ छ। 24 जद्‍या थन्अ जंगळी जैतून का रूंखड़ा सुं एक डाळी की न्याई काटर सुभाव क खिलाफ एक चोखा जैतून का रूंखड़ा सुं जोड़ दियो गियो, तो ये ज्यो उं रूंखड़ा की असली डाळ्यां छी खुदका रूंखड़ा मं पाछी क्युं कोन जोड़ी जाव्अली।

सबळा प्अ परमेसर की दीया

25 ह भायाओ! म थान्अ ई लुखेड़ा सांच सुं अण्जाण कोन रांखबो चाऊ, क कढी थे खुदन्अ घणा समझदार कोन समझबा लागजावो। क्युं क इजरायल का मनखा को कठोर होबो सदाई कोन बण्यो रेव्अलो। यो तो जद्‍या ताणी छ जद्‍या ताणी टाळेड़ा गेर यहूदी मनख परमेसर का परवार का कोन बणजाव्अ। 26 अर अस्यान सबळा इजरायली बचाया जाव्अला। जस्यान सास्तर खेव्अ छ,

“छूटवाड़ो देबाळो सिय्योन सुं आवलो;

वो याकूब का परवार मं सुं सबळा अधर्म न्अ आंतरअ करअलो।

27 वांकी लार म्हारो यो करार छ,

क म वाका पाप न्अ आंतरअ कर देऊलो।”

28 जण्ढ्अ ताणी चोखा समचार की बात छ, वे थांका बारा मं परमेसर का बेरी छ। पण जण्ढ्अ ताणी परमेसर क हाथा थरप्यो जाबा की बात छ, तो वे वांका आग्लाबड़ा की बजेसुं प्यारा छ। 29 क्युं क परमेसर का बरदान अर उंकी बुलाहट कद्‍या बी कोन बदल्या जा सक्अ। 30 जस्यान थे गेर यहूदी पेली कद्‍या बी परमेसर का खिया मं कोन चाल्अ छा। पण अब यहूदी मनखा क खिया मं कोन चालबा की बजेसुं परमेसर की दीया थाप्अ हुई छ। 31 वस्यान ई अब वे उंको खियो कोन मान्अ क्युं क परमेसर की दीया थाप्अ छ। जस्यानकी दीया थाप्अ होई छ वस्यान की दीया अब वाप्अ बी होव्अ। 32 क्युं क परमेसर सबळा मनखा न्अ खियो कोन मानबा की केद मं ई बजेसुं पटक मेल्यो छ क वो वाप्अ दीया करअ।

परमेसर धनै छ

33 परमेसर को धन, बुद्धि अर ज्ञान कतरो अपरम्पार छ। उंको न्याय कतरो गहरो अर उंका गेला कतरा भेद सुं भरया छ। 34 जस्यान सास्तर मं मण्ढ मेल्यो छ;

“परबु का मन न्अ कुण जाण्अ छ?

अर उन्अ सला देबाळो कुण हो सक्अ छ?”

35 “परमेसर न्अ कुण कांई दियो छ?

क वो कोई न्अ पाछो देव्अ।”

36 क्युं क सबळा न्अ रचबाळो वोई छ। उसुं'ई सबळा छ अर वे उं बेई छ। सदाई उंकी महमा होव्अ! आमीन।