रोमियों 9

परमेसर अर यहूदी मनख

1 म मसी मं सांची खेर्यो छु। म झूंट कोन खेऊ अर म्हारी समझज्यो पवितर-आत्मा सुं छ म्हारी लार म्हारी गुवाई देव्अ छ, 2 मन्अ घणो दुख छ अर म्हारा मन मं लगतमार पिड़ा छ। 3 अर ज्यो यो म्हारा बसम्अ होतो क खुदका भाई-बेण अर म्हारा देस का मनखा बेई, म परमेसर का सराप न्अ खुदक्अ उपरअ ले लेतो अर मसी सुं न्यारो हो जातो। 4 ज्यो इजरायली छ अर ज्यांन्अ परमेसर की ओलाद होबा को अधिकार छ, ज्यो परमेसर की महमा का दर्सण कर चुक्या छ, ज्यो परमेसर का करार का पांतिदार छ। ज्यांन्अ मूसा की बेवस्था, सांची भगती अर वादो दिया गियो छ। 5 आपणा आग्लाबड़ा बी वांसु'ई सम्बन्ध रखाण्अ छा अर मनख्याजुण का स्याप सुं मसी वाम्अई पदा होयो ज्यो सबळा को परमेसर छ अर सदामेस धनै छ! आमीन।

6 अस्यान कोन्अ क परमेसर खुदका वादा न्अ पूरो कोन कर्यो क्युं क ज्यो इजरायल का बंस का छ, वे सबळा इजरायली कोन्अ। 7 अर न्अ अबराम का बंस का होबा की बजेसुं वे सबळा अबराम की ओलाद छ। पण जस्यान परमेसर खियो छ, “इसहाक सुंई थारो बंस खुवाव्अलो।” 8 मतलब यो कोन्अ क काया की ओलाद परमेसर की ओलाद छ, पण परमेसर का वादा सुं होबाळा उंका बंस का मानया जाव्अ छ। 9 क्युं क वादो यो छ क “निस्चित बगत मं म पाछो आंउलो अर सारा क छोरो होव्अलो।”

10 अतरोई नही। पण जद्‍या रिबका बी एक मनख आपणा आग्लाबड़ा इसहाक सुं पेटसुं होई 11-12 तो जोड़ला क पैदा होबासुं पेली अर वांक्अ कांई बी भलो बरो करबा सुं पेली रिबका न्अ खियो गियो छो, “बड़ो छोरो छोटा की सेवा करअलो।” जिसुं परमेसर की वा मन्सा ज्यो करमा सुं नही पण परमेसर का चुणबा सुं साबित होव्अ छ। 13 जस्यान सास्तर मं मण्ढरी छ, “म याकूब सुं परेम कर्यो अर एसाव सुं नफरत।”

14 तो फेर म्हे कांई खेवां? कांई परमेसर अन्याय करबाळो छ? 15 एकधम नही! क्युं क वो मूसा न्अ खियो छो, “म जिप्अ बी दीया करबो चाऊ उंप्अ दीया करूलो, अर जिप्अ बी तरस खाबो चाऊ उंप्अ तरस खाउलो।” 16 जिसुं या न्अ तो चाहबाळा की अर न्अ भागदोड़ करबाळा की पण दीया करबाळा परमेसर की बात छ। 17 क्युं क पवितर सास्तर मं परमेसर फिरोन राजा न्अ खियो छो, “म थन्अ जिसुं उबो कर्यो छो क म म्हारी तागत थारम्अ दखा सकुं। अर म्हारा नांऊ को परचार सबळी धरती मं फेल सक्अ।” 18 तो परमेसर जिप्अ छाव्अ छ दीया करअ छ अर जिन्अ छाव्अ कळ्डो कर देव्अ छ। 19 तो ह सक्अ छ तु मन्अ खेव्अ, “तो फेर परमेसर आपण्अ उपरअ दोष क्युं लगाव्अ छ?” बीकी मन्सा को बिरोध कुण कर सक्अ छ? 20 मनख कुण होव्अ छ ज्यो परमेसर न्अ पलट'र जुवाब देव्अ? कांई कोई चीज उन्अ बणाबाळा न्अ बुज सक्अ छ, “तु मन्अ अस्यानको क्युं बणायो छ?” 21 कांई कोई कुम्हार न्अ ग्यार प यो अधिकार कोन्अ क वो एक लुण्दा सुं एक बरतन खास काम बेई अर दूसरो छोटा काम बेई बणाव्अ?

22 पण इम्अ कांई छ अर ज्यो परमेसर खुदका रोष न्अ दखाबा बेई अर खुदकी सक्‍ती दखाबा बेई वा मनखा की, ज्यो रोष का काम का छा अर ज्यो नास होबा बेई छा, घणी थरचा सुं सेन कर्यो। 23 जिसुं वां मनखा बेई ज्यो दीया का पात्र छा अर ज्यांन्अ वो खुदकी महमा पाबा बेई बणायो छो वाप्अ खुदकी महमा उळ्ळाई सुं परगट कर सक्अ। 24 मतलब आपा ज्यांन्अ वो खाली यहूद्‍या मं सुंई नही पण गेर यहूद्‍या मंसुं बी बलायो छ। 25 जस्यान होसे की पोथी मं मण्ढर्यो छ,

“ज्यो मनख म्हारा कोन छा

वान्अ म म्हारा मनख खेऊलो

अर वा जाति ज्यो म्हारी प्यारी कोन छी

म उन्अ प्यारी खेऊलो।”

26 अर,

“जी ठोर मं वान्अ खियो गियो छो,

‘थे लोग म्हारी परजा कोन्अ।’

उण्डअ'ई वे जीवता परमेसर की ओलाद खुवावला।”

27 अर परमेसर की ओड़ी सुं बोलबाळो यसायाह इजरायल का बारा मं हाक्‍का पाड़र खेव्अ छ;

“इजरायल की ओलाद समून्दर की बालू का कणा की न्याय मनमान छ।

फेरबी वाम्अ सुं खाली चन्याक ई बच पाव्अला।

28 क्युं क परबु धरती प खुदका न्याय न्अ पूरी तरा अर बेगोई पूरो करअलो।”

29 अर जस्यान यसायाह परमेसर की ओड़ी सुं खियो छो,

“अर ज्यो सबसुं सक्‍तिसाली परबु आपण्अ बेई

बंसज कोन छोड़तो

तो आपा सदोम अर अमोरा की जस्यान

पुरा नास हो जाता।”

30 तो फेर म्हे कांई खेवां? म्हे ई नरणा प पुच्या छा क गेर यहूदी ज्यो धार्मिकता न्अ कोन हेररया छा, वे धार्मिकता न्अ पा लिया। वे ज्यो बस्वास की बजे सुंई धरमी ठेराया गिया छ। 31 पण इजरायल का मनख बेवस्था प चालबो छाव्अ छा ज्यो वान्अ धरमी ठेराती, पण वे धार्मिकता न्अ कोन पा सक्या। 32 क्युं नही? क्युं क वे ईको पालण बस्वास सुं नही पण खुदका करमा सुं करर्या छा। वे उं भाटा सुं ठोकर खाग्या, ज्यो ठोकर दुवाव्अ छो। 33 जस्यान सास्तर मं मण्ढ मेल्यो छ;

“देखो, मं सिय्योन मं एक भाटो मेलर्यो छु ज्यो मनखा न्अ ठोकर दुवाव्अ छ

अर एक चट्टान ज्यो अपराध कराव्अ छ।

पण वो ज्यो उम्अ बस्वास करअ छ, उन्अ कद्‍या बी नरास कोन होणो पड़्अलो।”