थरपेड़ा का काम 18

पौलुस कुरिन्थियों नगर म

1 ईक्अ पाछ्अ पौलुस एथेंस न्अ छोड़र कुरिन्थियों नगर मं आग्यो। 2 उण्डअ वो पुन्तुस मं जनम्या अक्विला नांऊ का एक यहूदी मनख सुं मल्यो। ज्यो अबार खुदकी घरहाळी प्रिसकिल्‍ला की लेरअ इटली सुं आयो छो। वे इटली जिसुं छोड़या छा क क्लौदियुस राजो सबळा यहूद्‍या न्अ रोम मंसुं नखळर जाबाको आदेस दियो छो। तो पौलुस बीसुं मलबा गियो। 3 अर बाको काम-धंधो एक'ई छो तो वो बाकी लेरअ'ई रुक्यो अर काम करबा लागग्यो। वे तम्बू-ड़ेरा बणाबा को काम करअ छा। 4 हर आरामहाळा दन वो यहूदी परातना करबा का घरा मं सुवाल-जुवाब कर यहूद्‍या न्अ अर यूनान्या न्अ समझाबा की जोरी करतो। 5 जद्‍या मकिदुनिया सुं सिलास अर तीमुथियुस आया तो पौलुस खुदका सबळा बगत न्अ बचन को परचार करबा मं लगा मेल्यो छो। वो यहूद्‍या न्अ परमाणित करबा मं रेव छो क “ईसु ई मसी छ।” 6 जद्‍या वे बीको बिरोध कर्या अर बीन्अ भलो बरो खिया तो वो बाका बिरोध मं खुदको पल्‍लो झरकाड़ता होया खियो, “थांकी करणी थांकाई माथा प पड़अ। उंकी म्हारी कोई जुवाबदारी कोन्अ छ। अब मं आग्अ सुं गेर यहूद्‍या मं जाऊलो।” 7 अस्यान पौलुस उण्डअ सुं चाल्यो अर तीतुस यूसतुस नांऊ का एक गेर यहूदी मनख क घरा गियो। वो परमेसर को भगत छो। बीको घर यहूदी परातना करबा का घर क अड़ार छो। 8 यहूदी परातना करबा का घरको प्रधान क्रिसपुस, खुदका सबळा घराणा समेत परबु मं बस्वास कर्यो। अर नरासारा कुरिन्थ का रेबाळा बी ज्यो पौलुस का परबचन सुण्या छा, बस्वास कर बतिस्मो लिया।

9 एक रयात दर्सण मं परबु पौलुस न्अ खियो, “ड़रप मत, बोलतो रे अर छानो मत होवे। 10 क्युं क मं थारी लेरअ छु। जिसुं कोई बी थारअ माळ्अ हमलो कर थन्अ नुकसाण कोन्अ पुचावलो क्युं क ई नगर मं घणासारा मनख म्हारा मनख बण्अला।” 11 जिसुं पौलुस उण्डअ डेड बरस ताणी रुक्यो, अर परमेसर का बचन की सक्ष्या देतो रिया।

12 अखाया को राजपाल गल्‍लियो छो जद्‍या यहूदी एकठार होर पौलुस क उपरअ चढ़ाया अर बीन्अ पकड़र अदालत मं लेग्या। 13 अर खिया, “यो मनख लोगा न्अ परमेसर की भगती अस्यान करबा बेई खेर्यो छ ज्यो मूसा का वेवस्था का निमा की उल्टी छ।”

14 अबार पौलुस बोलबाळो'ई छो क गल्‍लियो बोल्यो, “ओ यहूदीओ, अर ज्यो या कोई अन्याय या फेर जोरका अपराध की बात होती तो म थांकी बात को न्याय करतो। 15 पण या बात थांका सब्दा, नांवा अर थांकी बेवस्था का सुवाला सुं मतलब रखाण्अ छ, जिसुं थें अपणा आप ई इसुं सुळजो। अस्यान का मामला मं म न्याय करबाळो कोन्अ बणबो चाऊ।” 16 अर फेर वो बान्अ अदालत क बारे नखाळ दियो। 17 तो वे परातना करबा का घरका नेता सोस्तिनेस न्अ जा पकड़या अर अदालत क साम्अ ई कुटबा लागग्या। पण गल्‍लियो या बाता प नरचुंई ध्यान कोन्अ दियो।

पौलुस को अन्ताकिया मं पाछो आबो

18 पौलुस घणादना ताणी कुरिन्थियों नगर म रुक्यो रियो। फेर बस्वास्या सुं बद्‍या होर वो किंख्रिया मं आग्यो, उण्डअ सुं पाणी का जाज मं बेठर सीरिया बेई रुवाना होग्यो। उंकी लेरअ प्रिसकिल्‍ला अर अक्विला बी छा। पौलुस पाणी का जाज मं बेठर जाबा सुं पेली किंख्रिया मं खुदका बाळ कटायो क्युं क वो एक मन्‍नत मान्यो छो। 19 फेर वे इफिसुस पुच्या अर पौलुस प्रिसकिल्‍ला अर अक्विला न्अ उण्डअ'ई छोड़ दियो। अर खुद परातना करबा का घर मं जार यहूदया सुं सुवाल-जुवाब करबा लागग्यो। 20 जद्‍या उण्डअ का मनख बीन्अ थोड़ासाक दन औरू रुकबा बेई खिया तो वो नटग्यो। 21 पण जाती बगत वो खियो, “अर ज्यो परमेसर की मन्सा होई तो म थां कन्अ फेरू आंउलो।” फेर वो इफिसुस सुं पाणी का जाज मं बेठर यात्रा कर्यो।

22 फेर पौलुस कैसरिया पुच्यो अर उण्डअ सुं यरूसलेम गियो अर बस्वास्या की टोळी का मनखा सुं मल्यो। फेरू वो अन्ताकिया की ओड़ी चलग्यो। 23 उण्डअ थोड़ा दन रिया पाछ्अ बासुं बिदा लियो अर गलातिया अर फ्रूगिया का छेत्रा मं एकठार सुं दूसरी ठोर यात्रा करता होया सबळा बस्वास्या का बस्वास न्अ गाढ़ो करबा लागग्यो।

इफिसुस अर कुरिन्थ नगर मं अपुल्‍लोस

24 बी बगत अपुल्‍लोस नांऊ को एक यहूदी मनख इफिसुस मं आयो। वो सिकन्दरिया को रेबाळो छो। वो बोलबा मं विद्वान छो। उन्अ सास्तर को पूरो ज्ञान छो। 25 बीन्अ परबु को गेलो बताया गियो छो। वो हरदा मं जोस लेर परबचन करअ छो अर ईसु का बारा मं बड़ी चतराई सुं उपदेस देव्अ छो। पण वो यूहन्‍ना का बतिस्मा का बारा मेई जाण्अ छो। 26 यहूदी परातना करबा का घरा मं वो नरभे होर बोलबा लागग्यो। जद्‍या प्रिसकिल्‍ला अर अक्विला बीन्अ बोलतो सुण्या तो वे बीन्अ खुदक्अ घरा घरा लेग्या अर ओरू साऊटी बारीकी सुं बीन्अ परमेसर का गेला का बारा मं समझाया।

27 अर जद्‍या वो अखाया परदेस मं जाबो चायो तो बस्वासी उंकी हिम्मत बढाया अर उण्डअ का बस्वास्या न्अ बीको सुवागत करबा बेई कागद माण्ढर खन्दाया। जद्‍या वो उण्डअ पुच्यो तो उण्डअ का बस्वास्या न्अ घणी मदद मली, ज्यो परमेसर की दीया सुं बस्वास मं आया छा। 28 वो यहूदया की भीड़ क गाब्अ जोरदार सब्दा मं सास्तर सुं सुवाल-जुवाब करर परमाणित करअ छो क “ईसु ई मसी छ”। अस्यान वो यहूदी मनखा न्अ सबळी भीड़ क साम्अ छाना कर दियो छो।