थरपेड़ा का काम 17

थिस्सलुनीके नगर मं पौलुस अर सिलास

1 फेर अम्फिपुलिस अर अपुल्‍लोनिया नगरा मं होता होया वे थिस्सलुनीके आपुच्या। उण्डअ यहूदया को एक परातना करबा को घर छो। 2 खुदकी आदत की जस्यान पौलुस बासुं मलबा गियो अर तीन आरामहाळा दन बाकी लेरअ बचना सुं वाद-विवाद करतो रियो। 3 अर सास्तरा मंसुं बान्अ समझार या सिद्ध करतो रियो क मसी न्अ दुख झेलणो जरूरी छो अर फेर बीन्अ मरया मंसुं जीवतो होबो जरूरी छो। वो खेतो, “जी ईसु को म थांक्अ गाब्अ परचार करू छु, बोई छूटवाड़ो देबाळो राजो छ।” 4 बाम्अ सुं एकात मनख बस्वास कर्या अर पौलुस अर सिलास की लारा जा मल्या। अस्यान'ई परमेसर सुं डरपबाळा अणगणती का यूनानी मनख अर जानी-मानी बेरबान्या बी करी।

5 पण यहूदी बळ्या मरता एकात बजार का बदमासा न्अ भेळा कर्या अर एक टोळी बणार नगर मं दंगा करवा दिया। अर कस्यान बी पौलुस अर सिलास न्अ भीड़ क साम्अ ल्याबा बेई यासोन का घर मं हमलो कर दिया। 6 पण वे बान्अ कोन्अ पाया तो वे यासोन न्अ अर दूसरा बस्वास्या न्अ नगर का अधिकारी क साम्अ घिसताई लियाया। वे बळाया, “ये मनख ज्यो सबळी धरती प उथल-पुथल मचा मेल्या छ अब अण्डअ बी आग्या। 7 अर यासोन बान्अ खुदका घर मं रखाण मेल्यो छो। अर ये सबळा रोम का राजा कैसर की हुकम न्अ कोन्अ मान्अ अर खेव छ एक राजो ओर छ जिको नांऊ ईसु छ।” 8 जद्‍या भीड़ अर नगर का अधिकारी या सुण्या तो वे हाका-हूक करबा लागग्या। 9 जद्‍या अधिकारी, यासोन अर दूसरा बस्वासी मनखा न्अ जमानत का पिसा लेर छोड़ दिया।

पौलुस अर सिलास बिरीया नगर मं

10 फेर पौलुस अर सिलास न्अ बस्वासी भाई रयातु रयात'ई बिरीया खन्दा दिया। उण्डअ पूंचर वे यहूदी परातना करबा का घर मं गिया। 11 ये मनख थिस्सलुनीके का मनखा सुं सावटा चोखा छा। ये मनख पूरो मन लगार बचन न्अ सुणता अर रोजिना सास्तरा न्अ पढ़ता अर या जांच करता क पौलुस ज्यो बाता बतायो छ वे सांची छ। 12 जिसुं घणा मनख बस्वास कर्या अर बाम्अ घणा यूनानी मोट्‍यार अर चोखी बोलती लुगाया छी। 13 अर जद्‍या थिस्सलुनीके का यहूदी मनखा न्अ यो तोल पड़यो क पौलुस बिरीया मं बी परमेसर का बचन को परचार करर्यो छ तो वे उण्डअ बी आपुच्या। अर उण्डअ बी भीड़ न्अ भड़काबो अर दंगा कराबो सरू कर दिया। 14 जिसुं बस्वासी भाई पौलुस न्अ जाबा बेई झटदाणी सागर की तीर प खन्दा दिया। पण सिलास अर तीमुथियुस बिरीया मं ई रुकग्या। 15 पौलुस की लार हाळा बीन्अ एथेंस नगर ताणी पुंचाया अर बीको यो संदेसो लेर पाछा आया क बेगासाक सिलास अर तीमुथियुस म्हारअ कन्अ आजाव्अ।

पौलुस एथेंस मं

16 जद्‍या पौलुस एथेंस मं तीमुथियुस अर सिलास की बाठनाळर्यो छो। तोबी नगर न्अ मूरत्या सुं भर्यो देखर मन ई मन मं कळसर्यो छो। 17 जिसुं वो रोजीना यहूदी परातना करबा का घर मं यहूदी अर गेर यहूदी भगता सुं सुवाल-जुवाब करतो रेव्अ छो। उण्डअ चोक मं ज्यो कोई बी होतो वो बीसुं बी रोजीना सुवाल-जुवाब करतो। 18 ऐकात इपीकुरी अर स्तोइकी ज्ञानी मनख बी बीसुं सुवाल-जुवाब करबा लागग्या। बाम्अ सुं एकात उंकी हांसी कर खिया, “यो मुरख कांई खेबो छाव छ?”

दूसरा खिया, “यो तो कोई पराया देवता को परचार करर्यो छ।” वे अस्यान जिसुं खेव छा क्युं क वो ईसु का बारा मं उपदेस देव्अ छो अर बीका फेरू जीवतो हेबा को परचार करअ छो। 19 वे बीन्अ अरियुपगुस की सभा मं लेग्या अर बुज्या, “बा नुई सक्ष्या कांई छ? जिन्अ तु लोगा क साम्अ बतार्यो छ। 20 तु ज्यो नुई बाता म्हाका कान मं पटकर्यो छ, बाको मतलब कांई छ?” 21 एथेंस का रेबाळा सबळा मनख अर परदेसी नुई बाता सुणबा मं अर बतळाबा मं सबळो टेम लगाव छा।

22 जद्‍या पौलुस अरियुपगुस क साम्अ उबो होर खियो, “ह एथेंस का मनखवो! म देखर्यो छु क थें सब तरा सुं धारमी छो।” 23 ज्दया म घूमता-फरता थांकी पूजबा की चीजान्अ देखर्यो छो जद्‍या मन्अ एक अस्यान की वेदी बी मली जिप्अ मण्ढर्यो छो, अण्जाण परमेसर बेई तो थें बना जाण्याई जिकी परातना करो छो, म थान्अ बी कोई बचन सुणाऊ छु। 24 “वो परमेसर, ज्यो ई संसार न्अ अर ज्योबी इम्अ छ बीन्अ बणायो छ बोई सरग अर धरती को परबु छ। वो हाथा सुं बणाया मन्दरा मं कोन्अ रेवे।” 25 बीन्अ कोई चीज की कमी कोन्अ क मनखा का हाथा सुं उंकी सेवा होव्अ। बोई सबळा न्अ जन्दगी, सांसा अर सब कुछ देव्अ छ। 26 एक'ई मनख सुं वो धरती का सबळा मनखा न्अ बणायो क वे सबळी धरती मं बस जाव्अ अर बोई मनखा को टेम अर बी ठोर की मेर बान्ध दियो। 27 उंकी मरजी या छी क लोग परमेसर न्अ हेरअ। ह सक्अ छ वे बीन्अ टटोळर पाले। फेरबी वो आपा मं कोई सुं आंतरअ कोन्अ। 28 क्युं क कोई खेव्अ छ, “बीम्अ आपा जीवता रेंवा छा बीम्अ'ई चाला-फरा छा अर बण्या रेंवा छा।” अस्यान'ई थांका एकात कवी बी खिया छ, “क्युं क आपा बीकाई बाळक छा।”

29 “क्युं क आपा परमेसर का बाळक छा जिसुं आपान्अ कद्‍या बी कोन्अ बच्यारणी चायजे क वो सोना, चांदी या कारीगर क हाथा भाटा की बणाई कोई मूरती जस्यान को छ। 30 परमेसर बी बगत का सबळा मनखा को लेखो कोन्अ लियो ज्यो बीन्अ कोन्अ जाण्अ छा अर अब सब ठोर का मनखा न्अ वो पापा सुं मन फराबा की आज्ञा देर्यो छ। 31 वो एक दन धाम मेल्यो छ जद्‍या वो खुदका थरपेड़ा एक मनख की लेरअ जगत का सबळा मनखा को न्याई सुं न्याय करअ लो। जिन्अ परमेसर मरेड़ा मंसुं जीवतो करर हरेक न्अ ई बात को परमाण दियो छ।”

32 जद्‍या वे मरया मंसुं जीवतो होबा की बात सुण्या तो बा मनखा मंसुं एकात उंकी हांसी करबा लागग्या अर एकात खिया, “ईका बारा मं मे फेर सुणबो छावा छा।” 33 जद्‍या पौलुस उण्डअ सुं चलग्यो 34 एकात बस्वास कर्या अर उंकी लेरअ होग्या। ज्यांम्अ अरियुपगुस सभा का सदस्य दियुनुसियुस नांऊ को एक मनख अर दमरिस नांऊ की एक बेरबानी छी अर उंकी लेरअ ओर मनख बी छा।