थरपेड़ा का काम 19

पौलुस इफिसुस नगर म

1 अस्यान होयो क जद्‍या अपुल्‍लोस कुरिन्थ मं छो जद्‍या पौलुस एसिया क माईन्अ का परदेसा की यात्रा करता होया इफिसुस मं आ पुच्यो। उण्डअ बीन्अ एकात चेला मल्या। 2 अर वो बान्अ बुज्यो, “थें बस्वास कर्या छा जद्‍या पवितर-आत्मा पाया छा कांई?”

वे खिया, “मे तो सुण्या बी कोन्अ क कोई पवितर-आत्मा बी होव्अ छ।”

3 तो वो खियो, “फेर थें कांई को बतिस्मो लिया छो?”

वे खिया, “यूहन्‍ना को बतिस्मो।”

4 फेर पौलुस खियो, “यूहन्‍ना तो पापा सुं मन फराया मनखा न्अ बतिस्मो दियो छो। वो इजरायल का मनखा न्अ खियो छो क ज्यो म्हारअ पाछ्अ आर्यो छ, बीप्अ बस्वास करो, बोई ईसु छ।”

5 या सुणर वे परबु ईसु का नांऊ सुं बतिस्मो ले लिया। 6 फेर जद्‍या पौलुस वाक्अ माळ्अ खुदका हाथ मेल्यो तो पवितर-आत्मा वाक्अ माळ्अ उतर्यायो अर वे न्यारी-न्यारी बोल्या अर परमेसर की ओड़ी सुं बोलबा लागग्या। 7 वे सबळा मलार अन्दाजन बारा मनख छा।

8 फेर पौलुस यहूद्‍या का परातना करबा का घर मं चलग्यो अर बना डरप्या तीन मिना ताणी मनखा सुं बोलतो रियो। वो बाकी लेरअ सुवाल-जुवाब करतो अर बान्अ परमेसर का राज का बारा मं समझातो रेव्अ छो। 9 पण बाम्अ सुं चन्याक मनख घणा टेकला छा वे बस्वास करबा बेई नटग्या अर लोगा क साम्अ परमेसर का ई गेला का बारा मं चोखो बरो खिया। तो वो बस्वास्या न्अ लारा लेर बान्अ छोडर चलग्यो। अर तरन्‍नुस का सामुदायक भवन मं रोजीना सुवाल-जुवाब करबा लागग्यो। 10 दो बरस ताणी अस्यान'ई होतो रियो। जिसुं एसिया म रेबाळा यहूदी अर यूनानी सबळा परबु का बचन न्अ सुण लिया।

स्कीवा का छोरा

11 परमेसर पौलुस क हाथा अणोता काम करर्यो छो। 12 अण्डअ ताणी क बीक्अ अड्‍या नातणा न्अ अर गमछा न्अ रोगला कन्अ ले जाता अर वे नीका हो जाता अर दुष्टात्मा बाम्अ सुं नखळ भागती। 13 एकात यहूदी जाणतेर मनख अण्डी-उण्डी दुष्टात्मा नखाळता फरअ छा। वे या करबा लागग्या क ज्यांम्अ दुष्टात्मा घुसमेली छी बाप्अ परबु ईसु का नांऊ न्अ काम लेबा की जोरी करता अर खेता, “बी ईसु का नांऊ सुं नखळजा जिको परचार पौलुस करअ छ।” 14 स्कीवा नांऊ का एक यहूदी महायाजक का सात छोरा बी अस्यान करर्या छा। 15 तो एकबार दुष्टात्मा बान्अ अस्यान खेई, “म ईसु न्अ जाणु छु अर पौलुस का बारा मं बी जाणु छु, पण थें कुण छो?”

16 फेर वो मनख जिमे दुष्टात्मा छी वाक्अ माळ्अ झपट्‍यो। अर बान्अ लोई-लुवाण कर अधमर्या कर दियो। अस्यान वे आधा-नातकणा'ई घायल होर घरा सुं नखळर भागग्या। 17 इफिसुस म रेबाळा सबळा यहूदया अर यूनान्या न्अ ई बात को तोल पड़यो तो वे सबळा मनख घणा डरपगा छा। अस्यान परबु ईसु का नांऊ को आदर ओर सावटो होग्यो। 18 बस्वास कर्या मनखा मंसुं घणा मनख आया अर खुदका कर्या बरा कामा न्अ सबळा क साम्अ मान्या 19 टोणा-टोटका करबाळा मंसुं घणा अपणी अपणी पोथ्या न्अ उण्डअ ल्यार भेळी कर दिया अर सबळा क साम्अ वाक्अ लाई लगा दिया। बा पोथ्या को भाऊ पचास हजार चांदी का कल्दार क बर्याबर छो। 20 अस्यान परबु को बचन ओर तागतहाळो होर दूर-दूर ताणी फेलग्यो।

इफिसुस मं हुल्‍लड़

21 या बाता क पाछ्अ पौलुस खुदका मन मं मकिदुनिया अर अखाया होता होया यरूसलेम जाबो को नण्णो कर्यो। वो खियो, “उण्डअ जांया पाछ्अ मन्अ रोम बी जाणो चायजे।” 22 तो वो तीमुथियुस अर इरास्तुस नांऊ का दो सायता करबाळा न्अ मकिदुनिया खन्दा दियो अर खुद एसिया मं थोड़ासाक दन ओर रियो। 23 बा दना मं इफिसुस मं परबु का ई गेला की बजेसुं घणाजोर की हुल्‍लड़ होई। 24 देमेत्रियुस नांऊ को यो सुन्दार चांदी का छोटा-छोटा अरतिमिस देवी का मन्दर बणवार कारीगर न्अ काम मं घणो फायदो दुवाव्अ छो। 25 वो बान्अ अर अस्यान का काम सुं जुड़या दूसरा मनखा न्अ भेळा कर्यो अर खिया, “देखो, थें जाणो छो क आपान्अ ई काम मं खुब पिसा मल्अ छ। 26 अर थें देख सको छो क पौलुस इफिसुस मं ई नई पण सबळा एसिया का मनखा न्अ बेहकार मनवार्यो छ क मनखा का हाथा का बणाया देवता परमेसर कोन्अ। 27 इसुंई बात कोई ड़र कोन्अ क आपणो कारोबार बदनाम होवलो पण महान देवी अरतिमिस का मन्दर की महमा खतम होबा को बी ड़र छ। अर जी देवी की पुजा सबळो एसिया अर संसार करअ छ उंकी महमा बी खतम हो जाव्अली।” 28 जद्‍या वे या सुण्या तो घणा रोषा होया अर बळा-बळार खेबा लाग्या, “इफिसुस की देवी अरतिमिस की जै हो!” 29 उण्डी सबळा नगर मं हुल्‍लड़ मांचगी। अर लोग गयुस अर अरिस्तर्खुस ज्यो मकिदुनिया सुं पौलुस की लारअ यात्रा करर्या छा पकड़ लिया अर वान्अ नगर का सभा घर मं लेर भाग्या। 30 पौलुस भीड़ क साम्अ जाबो छाव्अ छो पण बस्वासी बीन्अ कोन्अ जाबा दिया। 31 एकात बी ठोर का अधिकारी ज्यो पौलुस का भायला छा, बी कन्अ खुवाव खन्दाया की वो उण्डअ नगर का सभा घर मं आबाकी जोरी कोन्अ करअ। 32 अब देखो कोई-कांई बळार्यो छो अर कोई-कांई बळार्यो छो क्युं क सबळी सभा मं हुल्‍लड़ माचरी छी। बाम्अ सुं घणा तो या बी कोन्अ जाण्अ छा क वे उण्डअ क्युं भेळा होया छ। 33 जद्‍या वे सिकन्दर न्अ जिन्अ यहूदी उबा कर्या छा वो खुदका हाथा न्अ हला-हलार भीड़ क साम्अ जुवाब देव्अ छो। 34 पण जद्‍या भीड़ न्अ यो तोल पड़यो क वो एक यहूदी छ तो वे सबळा कोई दो घण्टा ताणी जोरसुं अस्यान बळाता रिया, “इफिसुस की देवी अरतिमिस की जै हो।” 35 फेर आखरी मं नगर को सचिव भीड़ न्अ छाना कर खियो, “ह इफिसुस का मनखवो कांई संसार मं कोई अस्यानको मनख छ ज्यो या कोन्अ जाण्अ क इफिसुस नगर महान देवी अरतिमिस का मन्दर अर आम्बर मंसुं पड़ी उंकी मूर्ति को रुखाळो छ? 36 क्युं क या बाता बेई कोन्अ नटयो जा सक्अ। जिसुं थान्अ छाना रेणी चायजे अर उत्यावळी मं थान्अ कांई बी कोन्अ करणी चायजे। 37 थें या मनखा न्अ पकड़र अण्डअ ल्याया छो पण वे न्अ तो कोई मन्दर न्अ लुट्‍या अर न्अ ही आपणी देवी को अपमान कर्या। 38 फेरबी देमेत्रियुस अर बीका लार हाळा कारीगर न्अ कोई का बिरोध मं कोई सकायत छ तो अदालत खुली छ अर उण्डअ न्याय करबाळो बी छ उण्डअ थें आमा-सामा मुकदमो चला सको छो। 39 अर ज्यो इसुं सावटो कांई बी छ तो बीको फेसलो न्याय सभा मं कर्यो जाव्अलो 40 ज्योबी होयो छ, बीसुं मान्अ ई बात को ड़र छ क आज की हुल्‍लड़ को दोष कढी आपण्अ माथ्अ कोन्अ मढ़ दे क्युं क ईको कोई कारण आपण्अ कन्अ कोन्अ जिन्अ आपा सई बता सका।” 41 अतरो खिया पाछ्अ वो सभा की छुट्टी कर दियो।