इकुनियुम मं पौलुस अर बरनबास
14
1 अस्यान'ई पौलुस अर बरनबास इकुनियुम मं यहूद्या का परातना करबा की ठोर प गिया। उण्डअ वे अस्यान परचार कर्या क घणासारा यहूदी अर गेर यहूदी बस्वास कर्या। 2 पण वे यहूदी ज्यो बस्वास कोन्अ कर सक्या छा, गेर यहूदया न्अ उकसार बांका मना मं बस्वास्या का बिरोध मं कळ्डाई पदा कर दिया। 3 पौलुस अर बरनबास उण्डअ सावटा दना ताणी रिया अर परबु का बारा मं बना भय सुं परचार करता रिया। बासुं चमत्कार अर अचम्बा का काम करवाता होया परमेसर अपणी दीया का संदेस को मान करवातो रियो। 4 उण्डी नगर का मनखा मं फूट पड़गी। एकात थरपेड़ा ओड़ी अर एकात यहूदया ओड़ी होग्या।5 फेर जद्या गेर यहूदी अर यहूदी खुदका नेता की लेरअ मलर बाकी लेरअ बरो बुवार करबा बेई अर बान्अ भाटा सुं मारबा की जुगत बठाण्या। 6 पण पौलुस अर बरनबास न्अ ईको तोल पड़ग्यो अर वे लुकाउनिया का दिरबे अर लिस्तरा क सांकड्अ का गांवा मं बचर भागछुट्या। 7 उण्डअ बी वे चोखा समचार को परचार करता रिया।
लिस्तरा अर दिरबे नगर मं
8 लिस्तरा नगर मं एक मनख छो। वो जनम सुंई खुदका पगा सुं अपंग छो। वो कद्या बी चाल-फर कोन्अ सक्यो छो। 9 यो मनख पौलुस न्अ बतळातो सुण्यो छो। पौलुस बीक्अ उपरअ नंगा कर्यो अर पायो क उम्अ नीका होबा को बस्वास छ। 10 तो पौलुस जोरसुं खियो, “खुदका पगा प उबो होजा!” तो वो उपरअ उचक्यो अर चालबा-फरबा लागग्यो 11 पौलुस ज्योबी कर्यो छो भीड़ बीन्अ देखी तो लोग लुकाउनिया की भाषा म हाक्को पाड़र खेबा लाग्या, “आपण्अ गाब्अ मनखा का रुप मं देवता उतर्याया!” 12 वे बरनबास न्अ “जेअसa” अर पौलुस न्अ “हिरमेसb” खेबा लागग्या। पौलुस न्अ हिरमेस जिसुं खेबा लाग्या क्युं क वो खास बोलबाळो छो। 13 जेअस को मन्दर नगर क बाण्अ छो जिको पुज्यारी नगर का बाण्णा प दो सांड अर माळा लेर आ पुच्यो। वो भीड़ की लेरअ पौलुस अर बरनबास बेई बली चढ़ाबो छाव्अ छो।
14 पण जद्या बरनबास अर थरपेड़ो पौलुस या सुण्या तो खुदका लत्ता फाड़ लिया अर भीड़ मं घुसर जोरसुं या खेबा लाग्या, 15 “ह भाईवो, थें अस्यान क्युं करर्या छो? मे बी थां जस्यानका ई मनख छा, अण्डअ मे थान्अ चोखो समचार सुणाबा आया छा क थें या बनाफालतु की चीजा सुं मुड़र बी जीवता परमेसर की ओड़ी आओ ज्यो आम्बर, धरती, समदर अर ज्योबी याम्अ छ, बीन्अ बणायो छ। 16 पराणा जमाना मं वो संसार का सबळा मनखा न्अ अपणा-अपणा गेला मं चालबा दियो। 17 पण थांक्अ साम्अ वो खुदन्अ साबित कर्यो। क्युं क वो थांकी लेरअ भलाई कर्यो छ। वो थान्अ आम्बर मंसुं बरखा दियो अर रूत की रूत थान्अ साख-बाड़ी दियो। बोई थान्अ खाबा बेई देव्अ छ अर थांका मना न्अ आण्द सुं भर देव्अ छ।” 18 या सबळा बचना क पाछ्अ बी वे घणीनठा भीड़ न्अ बली चढ़ाबा सुं रोक्या।
19 फेर अन्ताकिया अर इकुनियुम सुं आया एकात यहूदी, भीड़ न्अ खुदकी ओड़ी करर पौलुस न्अ भाटा सुं मारया अर बीन्अ मर्यो जाणर नगर क बारे घिसर लेजार पटक्याया। 20 फेर जद्या बस्वासी बीक्अ च्यारूमेर भेळा होया तो वो उठग्यो अर पाछो नगर मं चलग्यो अर फेर दूसरअ दन बरनबास की लेरअ वो दिरबे ओड़ी चलग्यो।
सीरिया का अन्ताकिया मं पाछो आबो
21 पौलुस अर बरनबास दिरबे मं चोखा समचार को परचार कर्या अर घणासारा चेला बणाया। फेर वे लिस्तरा सुं इकुनियुम होता होया पिसिदिया का अन्ताकिया पाछा आग्या। 22 अर बस्वास्या न्अ बस्वास मं बण्या रेबा बेई समझाया अर धीरज बन्धाया क, “आपान्अ परमेसर का राज मं उळबा बेई घणा दुख झेलणा पड़्अला”, 23 सबळा बस्वास्या की टोळी मं बढ़ा-बुढ़ा न्अ थरप दिया अर नराळ-बरत अर परातना करर बान्अ परबु का हाथा मं सुंप दिया जिम्अ वे बस्वास कर्या छा।
24 उंक्अ पाछ्अ पिसिदिया नगर सुं होता होया पम्फूलिया परदेस मं आपुच्या। 25 अर पिरगा नगर मं बचन सुणार अत्तालिया चलग्या। 26 उण्डअ सुं वे जाज मं अन्ताकिया पाछा गिया। जण्ढ्अ जि काम बेई बान्अ परमेसर का हाथा मं सुंप दिया छा, बी काम न्अ वे अबार ई पूरो कर्या छा।