यरूसलेम मं एक सभा
15
1 फेर चन्याक दना पाछ्अ एकात मनख यहूदया सुं आया अर बस्वास्या न्अ सखाबा लाग्या क “मूसा का निमा की जस्यान थांको खतनो कोन्अ होयो तो थांको उद्धार कोन्अ हो सक्अ।” 2 पौलुस अर बरनबास बासुं घणा टंटा अर बेसबाजी कर्या। जद्या बस्वास्या की टोळी पौलुस अर बरनबास अर एकात बाकी लारका न्अ ईको गेलो हेरबा बेई थरपेड़ा अर बढ़ा-बुढ़ा कन्अ अन्ताकिया सुं यरूसलेम खन्दाबा को निस्चय कर्या।3 वे बस्वास्या की टोळी की ओड़ी सुं खन्दाया फिनीके अर सामरया होता होया सबळा बस्वास्या न्अ गेर यहूद्या को मन कस्यान बदल्यो। यो समचार सुणाता गिया, जिसुं सबळा बस्वासी घणा राजी होरया छा। 4 फेर जद्या वे यरूसलेम पुच्या तो बस्वास्या की टोळी, थरपेड़ा अर बढ़ा-बुढ़ा बाको सुवागत कर्या। जद्या परमेसर बासुं ज्योबी करवायो छो सब बान्अ बताया। 5 जद्या फरीस्या का टोळा मंसुं आया एकात बस्वासी उबा होया अर खिया, “गेर यहूदी को खतनो जरूर कर्यो जाणी चायजे बान्अ आज्ञा दी जाणी चायजे क वे मूसा का निमा न्अ मान्अ।”
6 ई बात प बच्यार करबा बेई थरपेड़ा अर बढ़ा-बुढ़ा लोग एकठार भेळा होया। 7 aएक लाम्बी-चोड़ो बात-बतळ्यावण क पाछ्अ पतरस उबो होर बान्अ खियो, “भाईवो! थें जाणो छो क घणादना पेली थां मंसुं परमेसर मन्अ थरप्यो छो क, म गेर यहूदी मनखा न्अ चोखा समचार को संदेसो सुणाऊ अर वे बस्वास करअ। 8 bअर सबळा का मन का बच्यारा न्अ जाणबाळो परमेसर आपणी न्याई'ई बान्अ बी पवितर-आत्मा को वरदान देर बान्अ बी अपणा लियो। 9 बस्वास सुं बाका हीया न्अ धोर वाक्अ अर आपण्अ गाब्अ कोई आंतरो कोन्अ कर्यो। 10 तो अब चेला की न्याड प यो एक अस्यानको जुड़ो मेलर जिन्अ आपा उठा सका अर न्अ आपणा आग्लाबड़ा, थें परमेसर न्अ क्युं परखो छो? 11 पण म्हाको तो पक्को बस्वास छ क जस्यान परबु ईसु की दीया सुं म्हाको उद्धार होयो छ वस्यान ई बाको बी उद्धार होयो छ।”
12 ईप्अ सबळा छाना होग्या अर बरनबास अर पौलुस की सुणबा लागग्या क गेर यहूदी क गाब्अ परमेसर बासुं कस्यान अणोता नसाण अर अचम्बा का काम करवायो छो। 13 वे जद्या बोल चुक्या तो याकूब उबो होर खेबा लाग्यो, “ह भाईवो, म्हारी सुणो! 14 समौन बतायो क पेल-पेल परमेसर गेर यहूद्या मंसुं एकात मनखा न्अ खुदका मनख होबा बेई चुणर उंका परेम न्अ कस्यान प्रगट कर्यो छो। 15 परमेसर की ओड़ी सुं बोलबाळा का बचन बी इसुं मल्अ छ, जस्यान मण्ढरी छ;
16 “बीक्अ पाछ्अ म आंउलो अर
दाऊद का राज न्अ फेरू ल्याउलो,
म बीका राज का ढुंढा न्अ फेरू पक्का बणाऊलो। म बीका राज महल न्अ फेरू पाछो बणाऊलो।
17 दनीया का सबळा मनख मन्अ हेरला अर हां!
सबळा गेर यहूदी बी ज्यान मं म्हारी खुदकी परजा बणायो छु म्हारअ कन्अ आवला।
18 जिसुं परबु खेव्अ छ क, या बात म पेलीसुंई बतायो छु।”
19 अस्यान बताया पाछ्अ याकूब खियो, “म्हारो यो नर्णो छ क बा मनखा न्अ ज्यो गेर यहूदी होता होया बी परमेसर की ओड़ी मुड़या छ, बान्अ आकता कोन करणी चायजे।” 20 पण आपान्अ तो बा कन्अ या माण्ढर खन्दाणी चायजे क;
थें मूरत्या प चढ़ायो प्रसाद मत खाज्यो।
अर वेभिचार सुं बच्या रेवो।
न्याड मरोड़र मार्या ज्यानबर न्अ मत खाज्यो
अर लोई न्अ मत पीज्यो।
21 “पराणा जमाना सु'ई ये बचन मूसा का निमा सुं हरेक आरामहाळा दन यहूद्या का परातना करबा का घरा मं बाच्यो जाव्अ छ अर नगर-नगर मं परचार कर्यो जाव छ।”
गेर यहूदी बस्वास्या क नांऊ कागद
22 फेर थरपेड़ा, बढ़ा-बुढ़ा अर सबळी बस्वास्या की टोळी लेरअ मलरयो निस्चय कर्या क बाम्अ सु'ई एकात मनखा न्अ थरपर पौलुस अर बरनबास की लेरअ अन्ताकिया खन्दाव्अ। तो वे बरसब्बा खुवाबाळा यहूदा अर सिलास न्अ चुण लिया। वे बस्वास्या मं सबसु पढ़बाळा छा। 23 वे वाक्अ हाथा यो कागद खन्दाया;
“थांका भाई, बढ़ा-बुढ़ा अर थरपेड़ा की ओड़ी सुं अन्ताकिया, सीरिया अर किलिकिया का
सबळा गेर यहूदी बस्वासी भाया न्अ नमस्कार पूंच्अ।
प्यारा भाईवो;
24 में जद्या सुं या सुण्या छा क म्हासुं कोई आदेस पाया बनाई, एकात मनख आर खुदका सब्दा सुं थान्अ दुखी कर दिया अर थांका मन न्अ बेखाया छ। 25 म्हे सबळा बतळार यो निस्चय कर्या छा क म्हे म्हा मंसुं एकात मनखा न्अ चुणा अर आपणा प्यारा बरनबास अर पौलुस की लेरअ बान्अ थां कन्अ खन्दावा। 26 ये वेई मनख छ ज्यो आपणा परबु ईसु मसी का नांऊ बेई खुदकी ज्यान की बाजी लगा दिया छा। 27 जिसुं मे यहूदा अर सिलास न्अ खन्दार्या छा। वे थान्अ खुदका मुण्ढा सुं या सबळी बाता न्अ बतावला। 28 पवितर-आत्मा न्अ अर मान्अ योई चोखो लाग्यो क थांक्अ उपरअ या जरूरी बाता क अलावा कसी बी बात को बोझ कोन पटक्यो जावे; 29 थें मूरत्या प चढ़ायो प्रसाद मत खाज्यो। अर वेभिचार सुं बच्या रेवो। न्याड मरोड़र मार्या ज्यानबर न्अ मत खाज्यो अर लोई न्अ मत पीज्यो। थें खुदा-खुद न्अ या बाता सुं बचाया रखाण्अला। तो थांको भलो हेव्अलो। अच्छया नीका रिज्यो।”
30 अस्यान बान्अ बद्या कर दिया अर वे अन्ताकिया जा पुच्या। उण्डअ वे बस्वास्या की टोळी न्अ भेळा कर्या अर वो कागद बान्अ देदिया। 31 कागद पढ़या सुं ज्यो जोस बान्अ मल्यो, उंप्अ वे घणो आण्द मनाया। 32 यहूदा अर सिलास दोनी परमेसर की ओड़ी सुं बोलबाळा छा, ज्यो बस्वास्या न्अ सायता करता अर हिम्मत देता होया अर जोस देबाळो एक लाम्बो परबचन दिया। 33 उण्डअ थोड़ा दन रिया पाछ्अ बस्वासी भाई बान्अ बा कन्अ पाछा जाबा बेई परेम सुं बद्या कर्या ज्यो बान्अ खन्दाया छा। 34 “पण सिलास उण्डअ'ई रेबा को नण्णो कर्यो।”c
35 पौलुस अर बरनबास अन्ताकिया मं रिया। घणासारा दूसरा मनखा की लेरअ वे परबु का बचन न्अ सखाता अर परचार करता रिया।
पौलुस सुं बरनबास को न्यारो होबो
36 थोड़ा दना पाछ्अ बरनबास न्अ पौलुस खियो, “आवो ज्यां-ज्यां नगरा मं आपा परबु का बचना को परचार कर्या छा, उण्डअ का बस्वासी भाया कन्अ चालर या देखां क वे कांई करर्या छ।” 37 बरनबास छाव्अ छो क मरकुस खुवाबाळा यूहन्ना न्अ बी वे लेरअ ले जाव्अ। 38 dपण वो पम्फूलिया मं बान्अ छोडर परबु का काम मं बाको साथ कोन्अ दियो छो। जिसुं पौलुस बीन्अ खुदकी लेरअ कोन लेजाबो छाव्अ छो। 39 जिसुं बा दोन्या मं घणाजोर की रयाड़ होगी। जिको यो नतिजो नखळ्यो क वे दोनी न्यारा होग्या। बरनबास मरकुस न्अ लेरअ लेर पाणी का जाज सुं साइप्रस चलग्यो।