बरनबास अर साऊल न्अ थरपर खन्दाबो
13
1 अन्ताकिया की बस्वास्या की टोळी मं एकात परमेसर की ओड़ी सुं बोलबाळा, बरनबास, समौन जिन्अ काळ्यो बी खेव्अ छा, कुरेन को रेबाळो लूकियुस, देस की चोथी-पांती को राजपाल हेरोदेसa को झोळ्या आयो भाई मनाहेम अर साऊल जस्यानका सखाबाळा छा। 2 वे जद्या नराळ-बरत करता होया परबु की महमा मं लागमेल्या छा, जद्या पवितर-आत्मा खेई, “बरनबास अर साऊल न्अ जि काम बेई मं बलायो छु, बीन्अ करबा बेई बान्अ न्यारा करद्यो।”3 तो वे नराळ-बरत अर परातना करर बरनबास अर साऊल क माथ्अ हाथ मेलर बान्अ बद्या कर दिया।
साइप्रस की यात्रा
4 पवितर-आत्मा सुं खन्दाया बरनबास अर पौलुस सिलुकिया गिया जण्ढ्अ सुं जाज मं बेठर वे साइप्रस नांऊ का टापू मं पुच्या। 5 फेर जद्या वे उं टापू क ओलाड़ी का सलमीस नगर मं पुच्या तो यहूदया का परातना करबा का घर मं परमेसर का बचन को परचार कर्या। मरकुस नांऊ को यूहन्ना सायता करबाळा की न्याई बाकी लेरअ छो।
6 बी सबळा टापू मं यात्रा करता होया वे पेलाड़ी का पाफुस नगर ताणी जा पुच्या। उण्डअ बान्अ एक यहूदी जादूगर मल्यो, जिको नांऊ बारईसु छो अर वो झूंटमाट परमेसर की ओड़ी सुं बोलबाळो छो। 7 वो सिरगियुस पौलुस को लारहाळो छो। सिरगियुस पौलुस राजपाल अर घणो बुद्धिमान मनख छो। राजपाल परमेसर को बचन सुणबा बेई बरनबास अर साऊल न्अ बलायो छो। 8 पण बारईसु जिको यूनानी नांऊ इलिमास छो। वो बाको बिरोध कर्यो अर राजपाल न्अ परमेसर मं बस्वास करबा सुं रोकबा की जोरी कर्यो। 9 फेर साऊल जिन्अ पौलुसb बी खेव्अ छ पवितर-आत्मा सुं भर इलिमास ओड़ी नाळता होया खियो, 10 “सबळा छळ-कपट अर बराया सुं भरया सेतान का छोरा, तु हर तरा की भलाई को बेरी छ। तु परबु का सिधा अर सांचा गेला न्अ तोड़बो मरोड़बो कोन छोड़्अ कांई? 11 अब देख परबु को हाथ थारअ उपरअ आ पड़यो अब तु आन्धो होवलो अर थोड़ी बगत ताणी दन का उजाळा न्अ कोन देख सकअलो।” झटदाणी धुंधळको अर अंधेरो बीक्अ उपरअ आग्यो अर वो अण्डी-उण्डी टटोळबा लागग्यो क कोई बीको हाथ पकड़र बीन्अ चलाव्अ। 12 तो राजपाल बीन्अ देखर परबु का समचार सुं अचम्बा मं होर बस्वास कर्यो।
पौलुस अर बरनबास को साइप्रस सुं जाबो
13 फेर पौलुस अर उंकी लेरअ का पोफुस सुं नावड़ा मं पम्फूलिया का पिरगा सेर मं आग्या। पण यूहन्ना जिको नांऊ मरकुस छो बान्अ उण्डअ'ई छोडर पाछो यरूसलेम आग्यो। 14 उण्डी वे यात्रा मं आग्अ चालता होया पिरगा सुं पिसिदिया का अन्ताकिया मं आपुच्या।
फेर आरामहाळा दन यहूद्या का परातना करबा का घर मं जार बेठग्या। 15 मूसा का बेवस्था का निमा न्अ अर परमेसर की ओड़ी सुं बोलबाळा की पोथ्या न्अ बाच्यां पाछ्अ यहूदी परातना करबा का घरका अधिकारी वां कन्अ यो संदेसो खन्दाया क, “ह भाईवो, लोगा न्अ समझाबा बेई थां कन्अ ओर बचन होवे तो थें सुणावो।” 16 जद्या पौलुस उबो होयो अर हाथ हलार खेबा लाग्यो, “ह इजरायल का मनखवो अर परमेसर सुं ड़रप बाळा गेर यहूदीओ सुणो, 17 इजरायल को परमेसर आपणा आग्लाबड़ा न्अ थरप्यो अर बान्अ महान बणायो। जद्या आपणा मनख मिसर मं परदेस्या की न्याई रेव छा। वो बान्अ खुदकी महान सक्ति सुंई बी मिसर की धरती मंसुं बारे नखाळर ल्यायो छ। 18 अर परमेसर राडी मं चाळीस बरस ताणी बान्अ बरदास कर्यो छो। 19 अर कनान देस की बा सात जात्या न्अ नास करबा धरती इजरायल का मनखा न्अ खुदकी होबा बेई देदियो। 20 इम्अ अन्दाजन साढ़ी च्यार सौ बरस लागग्या।”
“ईक्अ पाछ्अ परमेसर की ओड़ी सुं बोलबाळा समूएल का टेम ताणी वो बान्अ न्याय करबाळा दियो। 21 फेर वे एक राजो मांग्या, तो परमेसर बिन्यामीन का बंस का एक मनख कीस का छोरा साऊल न्अ चाळीस बरस ताणी वाप्अ राजो बणायो।” 22 फेर वो साऊल न्अ हटार दाऊद न्अ बाको राजो बणायो जिका बारा मं वो बतायो छो, “मं यिसे का छोरा दाऊद न्अ एक अस्या मनख की न्याय पायो छु ज्यो म्हारा मन जस्यान को छ। ज्योबी मं बीसुं करवाबो चाऊ छु उं सबळा न्अ वो पूरो करअलो।” 23 ई मनख का बंस का एक मनख ईसु न्अ परमेसर खुदकी प्रतिज्ञा की जस्यान इजरायल न्अ छुड़ाबाळो बणायो छ। 24 cबीक्अ आबासुं पेली यूहन्ना इजरायल का मनखा न्अ पापा सुं मन फरार बतिस्मो लेबाको परचार करतो आयो छो 25 dयूहन्ना जद्या खुदका काम न्अ पूरो करबा मं छो, तो वो खियो, “थें मन्अ ज्यो समझ मेल्या छो वो म कोन्अ। पण एक अस्यो मनख म्हारअ पाछ्अ आर्यो छ। जिकी म जुत्या खोल्बा जस्यान को बी कोन्अ।”
26 “भाईवो, अबराम की ओलादवो अर परमेसर का भगत गेर यहूदीओ! उद्धार को यो संदेसो आपण्अ बेई खन्दायो गियो छ। 27 यरूसलेम मं रेबाळा मनख अर बाका राजा या कोन जाण्या क ईसु छुड़ाबाळो छ, अर आरामहाळा दन सखाया जाबाळा वे बचन ज्यो परमेसर की ओड़ी सुं बोलबाळा खिया छा, कोन्अ पेचाण्या अर बीक्अ दोष लगा'र सास्तरा का बा बचना न्अ पुरा कर्या। 28 eअर बीन्अ मोत की सज्या देबा की कोई बजे कोन्अ लादी फेरबी पिलातुस सुं बीन्अ मारबा की मांग कर्या। 29 fबीका बारा मं ज्योबी मण्ढर्यो छो बीन्अ वे पूरो कर लिया तो वे बीन्अ करूस सुं तण्अ उतार लिया अर एक कबर मं मेल दिया। 30 पण परमेसर बीन्अ मरया पाछ्अ फेरू जीवतो कर दियो। 31 gअर फेर ज्यो मनख गलील सुं यरूसलेम ताणी उंकी लेरअ रिया छा वो वाक्अ साम्अ घणादना ताणी प्रगट होतो रियो। ज्यो अब इजरायल का मनखा बेई उंकी गुवाई छ। 32 मे थान्अ चोखो समचार सुणारया छा जिका बारा मं परमेसर आपणा आग्लाबड़ा की लेरअ प्रतिज्ञा कर्यो छ। 33 मरया पाछ्अ ईसु को फेरू जीवतो करबो, बाकी ओलादा आपा बेई परमेसर बी प्रतिज्ञा न्अ पूरो कर्यो छ। जस्यान भजन की पोथी का दूसरा भजन मं मण्ढरी छ;
“तु म्हारो छोरो छ,
मं आज थारो बाप बण्यो छु।”
34 अर वो बीन्अ मरया मंसुं जीवतो कर दियो क वो कद्या बी कोन्अ सड़अ। बी बेई परमेसर अस्यान खियो छ;
“म थन्अ वे पवितर अर नस्तेई पूरी होबाळी आसिस द्युलो ज्यांकी म दाऊद सुं प्रतिज्ञा कर्यो छो”
35 अस्यान'ई एक ओर भजन मं वो खियो छ
“परमेसर खुदका बी पवितर मनख न्अ कबर मं कोन्अ सड़बा देव्अ।”
36 “फेर दाऊद अपणा जुग मं परमेसर की योजना न्अ पूरी करर सदा की नींद मं सोग्यो अर जण्ढ्अ बीका आग्लाबड़ा न्अ कबर मं गाड़या छा उण्डअ'ई गाड़यो गियो। अर उंकी ल्यास सड़गी छी। 37 पण परमेसर जिन्अ मरया क गाब्अ सुं जीवतो कर्यो छो, उंकी ल्यास कोन्अ सड़ी छी।” 38-39 तो ह भाईवो थान्अ जाणणी चायजे क, ईसु ई पापा की छमा को उपदेस थान्अ दियो छो अर ज्योबी बीक्अ माळ्अ बस्वास करअ, वो बा सबळा पापा सुं छूटवाड़ो पावलो अर परमेसर का साम्अ धरमी ठेरायो जाव्अलो, ज्यांसुं थान्अ मूसा का निम की बेवस्था छूटवाड़ो कोन्अ दुवा सके। 40 तो सावचेत रेवो, परमेसर की ओड़ी सुं बोलबाळा की पोथ्या मं मण्ढर्यो छ ज्यो कढी थांप्अ कोन्अ हो जाव्अ। क्युं क वे खिया छ;
41 “रळेठाई करबाळाओ देखो, अचम्बा मं होर मर जावो; क्युं क थांका जुग म एक काम अस्यानको करू छु,
क कोई थान्अ बताव्अ तोबी थान्अ बस्वास कोन होव्अलो!”
42 पौलुस अर बरनबास जद्या उण्डअ सुं जारया छा तो लोग बान्अ आबाळा आरामहाळा दन बी अस्यान की बाता फेरू बताबा बेई अरदास कर्या। 43 जद्या सभा खतम होई तो घणा यहूदी अर घणा गेर यहूदी ज्यो यहूदी धरम न्अ मान्या पौलुस अर बरनबास क पाछ्अ चाल्या। पौलुस अर बरनबास वासुं बात-बतळ्यावण कर बान्अ समझार अरदास कर्या क वे परमेसर की दीया मं बण्या रेवे।
गेर यहूद्या मं परचार
44 आग्लअ आरामहाळा दन तो नगर का अन्दाजन सबळा मनख परबु का बचन सुणबा बेई भेळा होग्या। 45 जद्या बी भीड़ न्अ यहूदी देख्या तो वे घणा कळस्या अर पौलुस ज्यो खेर्यो छो बीको बिरोध करबा लागग्या अर अपमान कर्या। 46 पण पौलुस अर बरनबास बना डरप्या खिया, “या जरूरी छी क परमेसर को बचन पेली थान्अ सुणायो जातो पण थें बीन्अ नकारो छो अर थें अपणा-आपन्अ सदामेस की जन्दगी क योग्य कोन समझो, तो म्हे अब गेर यहूदया की ओड़ी मुड़रया छा।” 47 क्युं क परबु म्हान्अ अस्यान की आज्ञा दियो छ;
“म थान्अ गेर यहूदया बेई उजाळो बणायो,
जिसुं धरती का आखरी कुणा ताणी सबळा मनखा को उद्धार होव्अ।”
48 गेर यहूदी जद्या या सुण्या तो घणा राजी होया अर वे परबु का बचन को मान कर्या फेर वे ज्यो सदामेस की जन्दगी पाबा बेई निस्चय कर्या छा, बस्वास कर लिया।
49 अस्यान बी सबळा छेत्र मं परबु को बचन फेलग्यो। 50 उण्डी यहूदी मनख, ऊंचा घरा की गेर यहूदी परमेसर को भे मानबाळी लुगाया अर नगर का मुखिया न्अ उकसाया। अर बान्अ पौलुस अर बरनबास क बिरोध मं सताबो सरू कर दिया। जोर लगवार पौलुस अर बरनबास न्अ बी नगर मंसुं बारे नखळा दिया। 51 hफेर पौलुस अर बरनबास बान्अ चताबा बेई खुदका पगा की ग्यार झरकाड़र इकुनियुम मं चलग्या। 52 पण अन्ताकिया का बस्वासी मनख आण्द अर पवितर-आत्मा सुं भरयापुरा होता रिया।