हेरोदेस को बस्वास्या की टोळी न्अ सताबो
12
1 बा दना मं राजो हेरोदेसa बस्वास्या की टोळी का एकात मनखा न्अ सताबो सरु कर दियो। 2 वो यूहन्ना का भाई याकूब न्अ तलवार सुं मरवा दियो। 3 अर जद्या वो देख्यो, क यहूदी मनख इसुं राजी होव्अ छ तो वो पतरस न्अ बी बन्दी बणाबा को बच्यार कर्यो। या बना खमीर की रोठ्या का तुंवार का दना की बात छी। 4 हेरोदेस पतरस न्अ पकड़र काळ कोटड़ी मं पटकवा दियो। बीन्अ च्यार-च्यार सपाया की च्यार टोळ्यां की रुखाळी मं सुंप दिया अर फसह का तुंवार क पाछ्अ मुकदमो चलाबा बेई लोगा क साम्अ ल्याबा की बच्यारो। 5 जद्या पतरस न्अ काळ कोटड़ी मं रोक मेल्या छा जिसुं बस्वास्या की टोळी का मनख उं बेई चतमन लगार परमेसर सुं परातना करर्या छा।काळ कोटड़ी मंसुं पतरस को छूटबो
6 जद्या हेरोदेस बीक्अ उपरअ मुकदमो चलाबा बेई बीन्अ बारे ल्याबाळो छो बी रयात पतरस दो सपाया क गाब्अ, दो बेला सुं बन्द मेल्यो छो अर सुतो छो। बारे पेहरो देबाळा काळ कोटड़ी की रुखाळी करर्या छा। 7 अण्याचुको'ई परमेसर को एक सरगदूत उण्डअ आर उबो होयो अर काळ कोटड़ी उजाळा सुं झगाबोळ होगी, वो पतरस की बगल थपथपायो अर बीन्अ जगार खिया, “बेगोसोक उबो हो।” अर बेला बीका हाथा मंसुं खुलर पड़गी। 8 जद्या सरगदूत बीन्अ खियो, “कमरपट्टो बान्ध, कामळी उठा अर चप्पला फेर तियार ह।” तो पतरस वस्यान ई कर्यो। सरगदूत बीन्अ फेरू खियो, “थारो चोगो फेर अर म्हारअ पाछ्अ आजा।” 9 फेर पतरस बीक्अ पाछ्अ-पाछ्अ बारे नखळ्यायो। वो कोन्अ समझर्यो छो क ज्यो सरगदूत कर्यो छ वो सांच्याई छ। वो बच्यारर्यो छो क कोई सपनो देखर्यो छ। 10 पहला अर दूसरा पहरादार क आग्अ जाता होया लो का बी कुवाड़ कन्अ आपुच्या ज्यो नगर ओड़ी खुल्अ छो। वो बांक्अ बेई अपणा आप ई खुलग्यो। अर वे बारे नखळग्या। वे हालताणी गळी म सुंई जारया छा क वो सरगदूत एकधम बीन्अ छोड़ग्यो।
11 फेर पतरस न्अ जस्यानई होस आयो, तो वो खियो, “अब म्हारी समझ मं आई क सांच्याई परबु खुदका सरगदूत न्अ खन्दार हेरोदेस का हाथा सुं अर यहूदी मनख ज्योबी म्हारअ उपरअ करबा की बच्याररया छा बा सबळा सुं मन्अ बचायो छ।”
12 वो यूहन्ना जिन्अ मरकुस खेव्अ छा। उंकी माई मरियम क घरा आयो। उण्डअ घणासारा मनख एकलार परातना करर्या छा। 13 पतरस कुवाड़ बजायो अर बीन्अ देखबा रूदे नांऊ की एक दासी उण्डअ आई। 14 पतरस की बोली पेचाणर खुसी क मारअ उं बेई कुवाड़ खोल्या बनाई पाछी माईन्अ भागगी अर बताई क पतरस बाण्अ उबो छ। 15 वे बीन्अ खिया, “तु बावळी हेगी कांई?” पण बा जोरसुं खेती रेई क अस्यान'ई छ। जद्या वे खिया, “वो बीको सरगदूत होवलो।”
16 उण्डी पतरस कुवाड़ बजातोई रियो अर फेर जद्या वे कुवाड़ खोलर बीन्अ देख्या तो अचम्बा मं पड़ग्या। 17 बान्अ हाथ सुं छाना रेबा को असारो कर बान्अ नीका बतायो क परबु बीन्अ काळ कोटड़ी मंसुं कस्यान बारे नखाळ्यो छ। अर फेर खियो, “याकूब अर दूसरा बस्वास्या न्अ ईका बारा मं बता दिज्यो।” अर फेर वो बी ठोर न्अ छोडर कोई दूसरी ठोर प चलग्यो।
18 जद्या उजाळो होयो तो पेरादारा मं भगदड माचगी अर वे कळाचूक होर बच्यारया छा क पतरस की लेरअ कांई होग्यो? 19 जद्या हेरोदेस बीन्अ खूब हरवायो पण वो बीन्अ कोन्अ लाद्यो, तो वो पहरादारा सुं बुज-थाज कर बान्अ मारबा की आज्ञा दियो। फेर हेरोदेस यहूद्या सुं जार कैसरिया मं थोड़ा दन रियो।
हेरोदेस की मोत
20 वो सूर अर सैदा का मनखा सुं घणु रोषा रेव्अ छो। जिसुं वे एक टोळी बणार बीसुं मलबा आया। राजा का महल को खास सेवा करबाळा बलासतुस न्अ राजी कर्या। फेर वे हेरोदेस न्अ मनाबा बेई अरदास कर्या। क्युं क यहूद्या सुंई बाका देस न्अ खाबाकी चीजा मल्अ छी।
21 एक दन हेरोदेस राजा की पोसाक फेर खुदका सिंहासन प बेठ्यो अर भाषण देबा लाग्यो 22 लोग बळाबा लागग्या, “या तो कोई देवता की बाणी छ, मनख की कोन्अ।” 23 हेरोदेस परमेसर न्अ महमा कोन्अ दियो छो, जिसुं बी बगत'ई परमेसर को एक सरगदूत बीन्अ रोगलो कर दियो अर बीक्अ किड़ा पड़ग्या ज्यो बीन्अ खाबा लागग्या अर वो मरग्यो।
24 पण परमेसर को बचन बढ़तो अर फेलतो रियो।
25 जद्या बरनबास अर साऊल खुदकी सेवा पूरी कर लिया, तो मरकुस खुवाबाळा यूहन्ना न्अ लेरअ लेर यरूसलेम सुं अन्ताकिया पाछा आग्या।