थरपेड़ा का काम 11

यरूसलेम की बस्वास्या की टोळी न्अ पतरस को समझाबो

1 सबळा यहूद्‍या का बस्वासी अर थरपेड़ा सुण्या क परमेसर का बचन न्अ गेर यहूदी का बी मानर्या छ। 2 तो जद्‍या पतरस यरूसलेम पुच्यो तो एकात यहूदी बस्वासी बीक्अ तोमत लगाया क, 3 “तु गेर यहूदी मनखा क घरा गियो अर बाकी लेरअ रोटी-पाणी बी खायो-पीयो छ।” 4 जद्‍या पतरस बान्अ सांच्याई ज्यो होयो छो, बीन्अ सुणाबे समझाबे लागग्यो, 5 म याफा नगर मं परातना करर्यो छो तो म एक दर्सण देख्यो क एक बड़ी चादरा जस्यानकी कोई चीज तण्अ उतररी छ, बीन्अ च्यारू कुणा पकड़र आम्बर सुं तण्अ धरती प उतारर्या छ। अर बा म्हारअ साम्अ आगी। 6 म बीन्अ चत लगार देख्यो। बीक्अ उपरअ एकूं-एक जात्या का ज्यानबर किड़ा-मकोड़ा, आम्बर मं उडबाळा जन्दावर छा। 7 जद्‍या म एक आवाज सुण्यो, ज्यो मन्अ खेरी छी, “पतरस उठ, मार अर खा।” 8 पण म खियो, “परबु कतेई नही, क्युं क म कद्‍या बी कोई सुगली अर खराब चीजान्अ कोन्अ खायो।” 9 आम्बर म सुं दुबारा आवाज आर खेई, “जिन्अ परमेसर पवितर बणायो छ बीन्अ तु सुगली मत समझ!” 10 तीन बार अस्यान'ई होयो। फेर बा सबळी चीजान्अ अस्यान'ई आम्बर मं उठालिया। 11 बी बगत मं जण्ढ्अ रूक मेल्यो छो उं घर म तीन मनख आपुच्या। बान्अ म्हारअ कन्अ कैसरिया सुं खन्दाया छा। 12 परमेसर की आत्मा मन्अ बाकी लेरअ बेधोक्अ जाबा बेई खेई। ये छ: भाई बी म्हारी लेरअ गिया। अर में बी मनख का घर मं उळ्या। 13 वो म्हान्अ बतायो क एक सरगदूत न्अ बीका घर मं कस्यान उबो देख्यो छो। ज्यो खियो छो क “याफा मं खन्दार पतरस खुवाबाळा समौन न्अ बला ले। 14 वो थन्अ बचन सुणावलो जिसुं थारो अर थारा परवार को उद्धार हेव्अलो।” 15 जद्‍या म परबचन सरू कर्यो तो पवितर-आत्मा वाक्अ उपरअ उतर्यायो। एकधम वस्यान ई जस्यान सरू मं आपण्अ उपरअ उतर्यो छो।

16 फेर मन्अ परबु का खिया वे बचन याद आया क, “यूहन्‍ना पाणी सुं बतिस्मो देव्अ छो पण थान्अ पवितर-आत्मा सुं बतिस्मो दियो जावलो।” 17 अस्यान परमेसर बान्अ बी बोई वरदान दियो ज्यो आपान्अ जद्‍या परबु ईसु मसी मं बस्वास कर्या जद्‍या दियो छो तो परमेसर को बिरोध करबाळो म कुण हेव्अ छो?

18 बस्वासी जद्‍या या सुण्या तो वे तोमत लगाबो बन्द कर दिया। वे परमेसर की महमा करता होया खेबा लागग्या, “अच्छया तो परमेसर गेर यहूदया न्अ बी पापा सुं मन फराबा अर सांचो जीवन जीबा को मोको दियो छ!”

अन्ताकिया मं चोखा समचार को परचार

19 बस्वासी मनख, स्तिफनुस की मोत क पाछ्अ आया दुखा की बजेसुं कण-कणका होग्या छा अर फिनिक, साइप्रस अर अन्ताकिया ताणी जा पुच्या। अर ये यहूदी मनखा न्अ ई चोखो समचार सुणाव छा। 20 याई बस्वास्या मंसुं एकात साइप्रस अर कुरेन का रेबाळा छा। तो जद्‍या वे अन्ताकिया आया तो गेर यहूदया न्अ बी परबचन देता होया ईसु मसी को चोखो समचार सुणाबा लागग्या। 21 परबु की सक्‍ति बाकी लेरअ छी। जिसुं घणासारा मनखा को टोळो बस्वास कर परबु ईसु ओड़ी मुड़ग्यो।

22 जद्‍या ईको समचार यरूसलेम का बस्वास्या की टोळी का काना मं पुच्यो तो वे बरनबास न्अ अन्ताकिया खन्दाया। 23 जद्‍या बरनबास उण्डअ पुच्यो अर परमेसर की दीया न्अ देख्यो तो घणो राजी होयो अर सबळा न्अ तन-मन सुं बिस्वासहाळा होर परबु मं बण्या रेबा बेई समझायो। 24 क्युं क वो पवितर-आत्मा अर बस्वास सुं भर्यो एक चोखो मनख छो। फेर घणीसारी भीड़ परबु मं बस्वास कर्या।

25 बरनबास साऊल न्अ हेरबा तरसुस मं चलग्यो। 26 फेर वो बीन्अ हेरर अन्ताकिया मं लियायो। आख्अ साल वे बस्वास्या की टोळी सुं मलता अर भीड़ न्अ परबचन देता रिया। चेला सबसु पेली अन्ताकिया मं मसीही खुवाया।

27 बी बगत यरूसलेम सुं एकात परमेसर की ओड़ी सुं बोलबाळा अन्ताकिया मं आया। 28 बाम्अ सुं अगबुस नांऊ को एक परमेसर की ओड़ी सुं बोलबाळो उबो होर पवितर-आत्मा सुं या भविष्यवाणी कर्यो क सबळी दनीया मं जोरदार काळ पड़बाळो छ। यो काळ राजा क्लौदियुस का जमाना मं पड़यो। 29 जद्‍या हरेक चेलो खुदकी सरदा सुं यहूद्‍या मं रेबाळा बस्वास्या की सायता बेई कोई-कांई खन्दाबा को नर्णो कर्या छा। 30 अर वे बरनबास अर साऊल क हाथा यरूसलेम की बस्वास्या की टोळी का बढ़ा-बुढ़ा कन्अ सायता खन्दाया।