सात सायता करबाळा न्अ थरपबो
6
1 बाई दना मं जद्या चेला की गणती सांवटी होरी छी, तो यूनानी रीत-रूवाज न्अ मानबाळा यहूदी अर इब्रानी रीत-रूवाज न्अ मानबाळा यहूदया मं एक मुद्दो उठग्यो क बाकी बिधवा बेरबान्या की लेरअ चीजा बाटबा मं रोजीना दुब्यात बरती जारी छ।2 जिसुं बारा थरपेड़ा सबळा बस्वास्या की टोळी न्अ एकलार बलाया अर खिया, “मांक्अ बेई परमेसर का बचना न्अ सखाबा को अर परचार करबा की सेवा न्अ छोड़र खाबा-पीबा की चीजान्अ बाटबा को काम करबो चोखो कोन्अ। 3 तो भाईवो आपण्अ मेईन्अ सुं चोखी साखहाळा, पवितर-आत्मा सुं भरया अर समझदार सात मनखा न्अ थरपो। ज्यांन्अ या जुम्मेवारी सुंप देवा। 4 अर आपा खुदन्अ पूरी टेम परातना अर परमेसर का बचना न्अ सखाबा अर परचार करबा मं लगाया रखाणा।”
5 थरपेड़ा की ई बात न्अ बस्वास्या की सबळी टोळी मान्अली अर वे बस्वास अर पवितर-आत्मा सुं भर्यो स्तिफनुस, फिलिप्पुस अर प्रखुरूस, निकानोर अर तीमोन अर परमिनास अर अन्ताकियाळा नीकुलाउस न्अ ज्यो यहूदी धरम मान लियो छो, थरप लिया। 6 अर बा मनखा न्अ वे थरपेड़ा क साम्अ उबा कर दिया। थरपेड़ा वाक्अ उपरअ हाथ मेल्या अर परातना कर्या।
7 अस्यान परमेसर को बचन फेलबा लागग्यो अर यरूसलेम मं चेला की गणती घणी सांवटी होगी, अर घणासारा याजक बी ईसु मं बस्वास करबा लागग्या।
स्तिफनुस न्अ पकड़बो
8 स्तिफनुस परमेसर की दीया अर सामर्थ सुं भर्यो मनख छो। वो मनखा क गाब्अ बड़ा-बड़ा अचम्बा का काम अर अणोता चमत्कार करअ छो। 9 आजाद होया मनख नांऊ का एक यहूदी परातना करबा का घरका यहूदी मनख ज्यो कुरेन सहर, सिकन्दरिया सहर, किलिकिया सहर अर एसिया राज्य सुं आया छा। वे बीका बिरोध मं टंटा करबा लागग्या। 10 पण वो पवितर-आत्मा सुं मली बुध्दि सुं असी बात खेव्अ छो, क वे बीक्अ साम्अ कोन्अ रूक सक्या। 11 फेर वे एकात मनखा न्अ पिसा देर उकसार खुवाया क, “मे ईन्अ मूसा अर परमेसर का अपमान की बाता खेता सुण्या छा।” 12 अस्यान वे लोग-बागा न्अ, यहूदी बुढ़ा नेता अर मूसा का निमा न्अ सखाबाळा न्अ भड़का दिया। फेर वे आर स्तिफनुस न्अ पकड़ लिया अर सबसु ऊंची यहूदी सभा क साम्अ लियाया। 13 वे वा झूंटा गुवा न्अ पेस कर्या ज्यो खिया, “यो मनख ई पवितर मन्दर अर मूसा का निमा का बिरोध मं बोलतो रुक्अई कोन्अ।” 14 मे ईन्अ खेता सुण्या छा क “यो नासरी ईसु ई मन्दर न्अ नास कर देव्अलो अर मूसा ज्यो रीत-रूवाज आपान्अ दियो छ बान्अ बदल देव्अलो।” 15 फेर जद्या सबसु ऊंची यहूदी सभा मं बेठ्या सबळा लोग बीन्अ चत लगार देख्या क बीको मुण्डो कोई सरगदूत का मुण्ढा की न्याई छ।