थरपेड़ा का काम 5

हनन्याह अर सफीरा

1 हनन्या नांऊ को एक मनख अर उंकी बेरबानी सफीरा दोनी मलर खुदकी सम्पत्ति का एक हस्सा न्अ बेच दिया। 2 अर खुदकी बेरबानी की सेमती सुं बीम्अ सुं थोड़साक पिसा बचार मेल लियो। अर बच्यो जिन्अ ल्यार थरपेड़ा न्अ सुंप दियो। 3 जद्‍या पतरस बीन्अ खियो, “ह हनन्या, सेतान न्अ तु थारा मन मं या बात क्युं अण्णाबा दियो की तु पवितर-आत्मा सुं झूंट बोल्अ अर जमी न्अ बेचबा सुं मल्या पिसा मंसुं थोड़साक बचार मेल ले? 4 कांई बेचबा सुं पेली बा थारी कोन छी? अर जद्‍या तु बीन्अ बेच दियो तो, कांई वे पिसा थारा अधिकार मं कोन्अ छा? तु अस्यानको काम करबा को बच्यार थारा मन म क्युं कर्यो? तु मनखा सुं नही पण परमेसर सुं झूंट बोल्यो छ।” 5 हनन्या जद्‍या ये सबद सुण्यो तो पछाटो खार पड़र मरग्यो। ज्योबी ईका बारा मं सुण्यो बीक्अ घणाजोर को ड़र बेठग्यो। 6 फेर एकात मोट्‍यार उठ'र बीन्अ कफन मं लपेटर बारअ लेजार गाढ़ दिया। 7 अन्दाजन तीन घण्टा पाछ्अ, ज्योबी हियो छो बीसुं अण्जाण उंकी घरहाळी माईन्अ आई। 8 पतरस उन्अ बुज्यो, “मन्अ बता, कांई तु थारा खेत न्अ अतरा मेई बेची छी?” तो वां खेई, “हां! अतरा मेई।” 9 जद्‍या पतरस उन्अ खियो, “थें दोनी परबु का आत्मा की परक्ष्या लेबा बेई राजी क्युं हिया छा? देख थारा घरहाळा न्अ गाड़बाळा देळ ताणी आपुच्या अर वे थन्अ बी उठा'र ले जाव्अला।” 10 तो बा झटदाणी बीका पगा म पड़र मरगी। फेर वे मोट्‍यार माईन्अ आया अर बीन्अ मरी देखर उठा'र लेग्या अर बीका घरहाळा कन्अ'ई बीन्अ गाढ़ दिया। 11 फेर सबळा बस्वास्या की टोळी अर ज्योबी बाका बारा मं सुण्या बा सबळा प घणाजोर को ड़र छाग्यो।

घणा अणोता अर अचम्बा का काम

12 थरपेड़ा सुं मनखा मं घणा अणोता अर अचम्बा का काम कर्या जारया छा। वे सबळा एक चत होर सुलेमान का बराऊण्ढा मं भेळा हेव्अ छा। 13 वाक्अ भेळ्अ होबा की हिम्मत कोई कोन करअ छो पण लोग बाकी बढाई जरूर करअ छा। 14 उण्डी परबु मं बस्वास करबाळा बेरबान्या अर मोट्‍यार सावटा सुं सावटा होता जारया छा। 15 अर लोग खुदका रोगला मनखा न्अ खाटा अर बछावणा मं सुवाणर गळ्यां मं मेलरया छा क जद्‍या पतरस उण्डअ सुं नखळ्अ तो बाम्अ सुं कोई प उंकी छाया पड़जाव्अ। 16 यरूसलेम नगर क सांकड्अ का नगरा सुं टोळा का टोळा मनख बिमारा न्अ अर दुष्टात्मा सुं दुख्या मनखा न्अ लेर आबा लागग्या। अर वे सबळा नीका होव्अ छा।

थरपेड़ा न्अ सताबो

17 फेर महायाजक अर बाकी लेरअ का सदूक्या की टोळी, वे इष्का सुं भरया छा अर बाका बिरोध मं उबा होग्या। 18 जिसुं वे थरपेड़ा न्अ बन्दी बणार काळ कोटड़ी मं पटक दिया। 19 पण रयात की बगत परबु को एक सरगदूत काळ कोटड़ी का कुवाड़ न्अ खोल दियो अर बान्अ बारे लेजार खियो, 20 “मन्दर मं जावो अर ई नुई जन्दगी का बारा मं सबळी बाता मनखा न्अ बताद्‍यो।” 21 जद्‍या वे या सुण्या तो भागफाटया की मन्दर मं बड़गा अर सखाबा लागग्या।

अर उण्डअ महायाजक अर बाकी टोळी, इजरायल का बढ़ा-बुढ़ा की पूरी सभा बलाया। फेर वे काळ कोटड़ी मंसुं थरपेड़ा न्अ बला खन्दाया। 22 पण जद्‍या अधिकारी काळ कोटड़ी म पुच्या तो उण्डअ बान्अ थरपेड़ा कोन्अ मल्या। वे पाछा आर ईका बारा मं बताया अर 23 खिया, “मान्अ काळ कोटड़ी का ताळा लाग्या अर सपाई बाण्णा कन्अ उबा मल्या पण जद्‍या मे कुवाड़ खोल्या तो मान्अ माईन्अ कोई कोन्अ मल्या।” 24 मन्दर का रुखाळा का मुखिया अर महायाजक जद्‍या या सुण्या तो चक्‍कर मं पड़ग्या अर बच्यार करबा लाग्या, “यो कांई हो सक्अ छ।”

25 फेर कोई माईन्अ आर बान्अ बतायो, “सुणो ज्यां मनखा न्अ थें काळ कोटड़ी म पटक्या छा वे मन्दर मं मनखा न्अ सखार्या छ।” 26 तो मन्दर का रुखाळा को मुखियो सपाया न्अ लेर उण्डअ गियो अर थरपेड़ा न्अ उण्डअ सुं पाछा लियायो पण जोरी कोन्अ कर्यो क्युं क मन्दर का रुखाळा न्अ ड़र छो क लोगबाग वाक्अ माळ्अ भाटा बगाव्अला।

27 वे बान्अ माईन्अ लियाया अर सबसु ऊंची यहूदी सभा क साम्अ उबा कर दिया। फेर महायाजक बान्अ बुज्या, 28 “थान्अ ई नांऊ सुं परबचन कोन देबा बेई मे कळ्डो आदेस दिया छा अर थें फेरबी सबळा यरूसलेम न्अ खुदका परबचना सुं भर दिया। अर कांई थें बी मनख की मोत को दोष मांक्अ उपरअ लगाबो छाव्अ छो?” 29 पतरस अर दूसरा थरपेड़ा बान्अ खिया, “आपान्अ मनखा की बेई परमेसर की आज्ञा मानणी चायजे। 30 यो आपणा आग्लाबड़ा को परमेसर ईसु न्अ मरया मंसुं पाछो जिन्दो कर दियो जिन्अ थें लोग करूस प लुमार मारनाख्या। 31 परमेसर बीन्अ ई राजो अर उद्धार करबाळा को मान देर खुदकी जीवणी-बगल मं बठाण्यो छ क इजरायल्या का मनख खुदका मन न्अ बदलर परमेसर क कन्अ आ सक्अ अर वो बाका पापा न्अ छमा कर सक्अ।” 32 अर ई बाता का मे गुवा छा अर वस्यानई बा पवितर-आत्मा बी। जि पवितर-आत्मा न्अ परमेसर उंकी आज्ञा मानबाळा न्अ दियो छ।

33 जद्‍या वे या सुण्या तो रोषा हेग्या अर बान्अ मारबो छाव्अ छा। 34 पण महासभा मं सुं एक गमलिएल नांऊ को फरीसी, ज्यो यहूदी निम सखाबाळो छो अर जिको सबळा मनख आदर करअ छा वो उबो होयो अर आज्ञा दियो क यान्अ थोड़ी बेर बारअ नखाळदे। 35 फेर वो बान्अ खियो, “इजरायल का मोट्‍यारओ, थें या मनखा की लेरअ ज्योबी करबा बेई तियार छो बीन्अ सोच बच्यार करज्यो। 36 थोड़ा बरसा पेली खुदन्अ बड़ो बतातो थियुदास आयो छो। अर अन्दाजन च्यार सौ मनख उंकी लेरअ बी होग्या छा, पण वो मार दियो गियो। बीका सबळा चेला कण-कणका होग्या अर वो आन्दौलन थमग्यो। 37 अर वस्यानई जणगणना की बगत गलील को रेबाळो यहूदो बी आयो। वो बी घणा मनखा न्अ खुदकी लेरअ करलियो छो। वो बी मार्यो गियो अर उंका बी चेला अण्डी-उण्डी बखरग्या। 38 जिसुं ईका बारा मं म थान्अ खेऊ छु, थे या मनखा का बिरोध मं कांई मत करो यान्अ अस्यान'ई छोड़द्‍यो क्युं क यांकी या योजना अर काम मनखा की ओड़ी सुं होवला तो मतई खतम हे जावला। 39 अर वे परमेसर की ओड़ी सुं होवला तो थे बीन्अ कोन्अ रोक सक्अला। अर जद्‍या ह सक्अ छ थे खुदन्अ परमेसर का बिरोध मं लड़ता पावो!”

महासभा गमलिएल की राय मानलिया। 40 अर वे थरपेड़ा न्अ माईन्अ बलार वाक्अ कोड़ा लगवार आज्ञा दिया क, “ईसु का नांऊ सुं कांई बी मत खिज्यो।” 41 अर थरपेड़ा यहूदी महासभा मंसुं राजी-खुसी सुं बारे आग्या क्युं क परमेसर बान्अ ईसु का नांऊ सुं अपमान अर दुख-भोगबा जस्यान को गण्यो। 42 फेर मन्दर अर घरा-घरा म रोजिना ई चोखा समचार न्अ सखाबो अर परचार करबो कद्‍या बी कोन छोड़या क “ईसु ई मसी छ।”