थरपेड़ा का काम 4

पतरस अर यूहन्‍ना यहूदी पंचायत म

1 हालताणी पतरस अर यूहन्‍ना मनखा सुं बाता कर'ईर्या छा जद्‍या याजक, मन्दर का सपाया को मुखियो अर एकात सदूकी उकन्अ आया। 2 वे बासुं चड़र्या छा क्युं क पतरस अर यूहन्‍ना ईसु का मरया मंसुं जीवतो हेबा को परचार करर्या छा। अस्यान वे मरया मंसुं पाछो जीवता होबा न्अ सिद्ध करर्या छा। 3 जद्‍या वे बान्अ पकड़र काळ कोटड़ी मं पटक दिया क्युं क दन आथग्यो छो। 4 पण ज्यो मनख बी उपदेस न्अ सुण्या छा बाम्अ सुं घणासारा बीक्अ माळ्अ बस्वास कर्या अर अस्यान बाकी गणती अन्दाजन पांच हजार लोगा ताणी जा पूंची।

5 दूसरअ दन यहूद्‍या का नेता, बुढ़ा अर यहूदी धरम सखाबाळा यरूसलेम मं भेळा होया। 6 वे महायाजक हन्‍ना, कैफा, यूहन्‍ना, सिकन्दर अर महायाजक का परवार का घणा मनख बी उण्डअ छा। 7 वे बां थरपेड़ा न्अ उण्डअ ल्यार बुज्बा लाग्या, “थें कुणकी सक्‍ती अर अधिकार सुं यो काम कर्या छा?”

8 फेर पवितर-आत्मा सुं भर पतरस बान्अ खियो, “ह मनखा का नेताओ अर बढ़ा-बुढ़ाओ! 9 आज म्हासुं एक लंगड़ा मनख की लेरअ करी भलाई का बारा मं बुज-थाज करी जारी छ क वो कस्यान नीका हेग्यो? 10 तो थान्अ अर सबळा इजरायल का मनखा न्अ यो तोल पड़ जाणी चायजे क नासरी ईसु मसी का नांऊ सुं यो मनख नीका होयो अर थांक्अ साम्अ उबो छ। जिन्अ थें करूस प लटकाया अर जिन्अ परमेसर मरया मंसुं फेरू जीवतो कर दियो।” 11 ईसु बोई छ जिका बारा मं सास्तरा मं मण्ढरी छ,

“यो बोई भाटो छ! जिन्अ कारीगर बनाकाम को मान्या छा,

बोई कुणा को भाटो बणग्यो।”

12 ईसु का नांऊ सुंई आपान्अ उद्धार मल सक्अ छ क्युं क “ई आम्बर क तण्अ मनखा न्अ कोई दूसरो नांऊ कोन्अ दिया। जिसुं उद्धार ह जाव्अ।” 13 जद्‍या वे पतरस अर यूहन्‍ना की हिम्मत न्अ देख्या अर या जाण्या क वे कम पढ़या-लख्या अर सिधासाक मनख छ तो बान्अ घणो अचम्बो हियो। फेर वे जाणग्या क वे ईसु की लेरअ रियेड़ा मनख छ। 14 अर वे बी नीका होयेड़ा मनख न्अ बाकी लेरअ उबो देखर्या छा जिसुं बा कन्अ खेबा बेई कांई कोन्अ रियो। 15 वे बान्अ यहूदी पंचायत मंसुं नखळबा बेई खिया अर आमा-सामा बतळाबा लागग्या क, 16 “या मनखा की लेरअ आपा कांई करां? क्युं क यरूसलेम मं रेबाळा सबळा जाण्अ छ क एक घणाजोर को चमत्कार हियो छ अर बी बेई आपा नट बी कोन्अ सका। 17 पण आपा बान्अ चतावा क वे ईसु का नांऊ की बतळ्यावण कोई ओर सुं कोन्अ करअ, जिसुं मनखा मं ई बात न्अ ओर फेलबा सुं रोक्यो जा सक्अ।” 18 तो वे बान्अ मेईन्अ बलार आज्ञा दिया क कद्‍या बी ईसु का नांऊ सुं थें न्अ तो कोई न्अ बताज्यो अर न्अ कोई न्अ उपदेस दिज्यो। 19 पण पतरस अर यूहन्‍ना बान्अ जुवाब दिया, “थेई बतावो, परमेसर क साम्अ सई कांई छ मे परमेसर की माना या थांकी माना? 20 मे तो ज्योबी देख्या अर सुण्या, बीन्अ बताबा सुं कोन्अ चूका।” 21 फेर पंचायत का पंच बान्अ धमकार छोड़ दिया। बान्अ सज्या देबा को कोई गेलो कोन्अ लाद्‍यो क्युं क ज्यो बाता होई छी बा बेई सबळा मनख परमेसर की महमा करर्या छा। 22 जि मनख न्अ नीका करबा को अचम्बो हियो छो वो चाळीस बरस सुं सांवटो छो।

बस्वास्या का धीरज बेई परातना

23 जद्‍या पतरस अर यूहन्‍ना न्अ छोड़ दिया तो वे खुदका मनखा कन्अ पाछा आग्या अर बान्अ परमुख याजक अर बुढ़ा यहूदी नेता ज्यो खिया वो सब बान्अ खे दिया। 24 जद्‍या वे या सुण्या तो एक मन सुं एक चत होर जोरसुं परमेसर न्अ हाको पाड़र अरदास कर्या क, “ह मालिक! तु ई आम्बर, धरती, समून्दर अर उंक्अ मेईन्अ ज्योबी छ उन्अ बणायो छ।” 25 तु ई थारा सेवा करबाळा म्हाका आग्लाबड़ा दाऊद का मुण्ढा सुं पवितर-आत्मा सुं खुवायो छो क, “ये दूसरी जात्या क्युं हुल्‍लड कर'री छ? 26 परबु परमेसर अर बीका थरपेड़ा मसी का बिरोध मं लोगबाग बनाबातई क्युं घात घड़र्या छ? धरती का राजा तियारया कर्या, अर दरबार भेळा होया।”

27 हां सांच्याई, थारा पवितर सेवा करबाळा ईसु जिन्अ तु मसी बणायो छो बीका बिरोध मं हेरोदेस अर पुन्तियुस पिलातुस बी ई नगर मं गेर यहूदी अर इजरायल का मनखा की लेरअ भेळा होया। 28 थारी सक्‍ती अर मन्सा की ज्यान ज्यो पेलीसुंई निस्चित हेग्यो छो। जिन्अ वो पूरो कर्यो। 29 अब ह परबु बाकी धमक्या प चत लगा अर थारा सेवा करबाळा न्अ नरभे हेर थारा बचन सुणाबा की सक्‍ति द। 30 “तु थारा पवितर सेवा करबाळा ईसु का नांऊ सुं मनखा न्अ नीका करबा बेई अर चमत्कार अर अचम्बा का काम करबा बेई, थारो हाथ बढ़ा।”

31 जद्‍या वे परातना पूरी कर्या तो जि ठोर प वे भेळा छा बा हालगी अर बा सबळा मं पवितर-आत्मा भरगी। अर वे बना डरप्या परमेसर का बचन बोलबा लागग्या।

बस्वासी खुदकी माया-पुंजी न्अ आमा-सामा बरत्या

32 या बस्वास्या की टोळी एक मन अर एक चत छी अर कोई बी अस्यान कोन खेव्अ छो क या म्हारी छ। बा कन्अ ज्योबी हेव्अ छो बीन्अ वे सबळा बांट लेव्अ छा। 33 अर वे थरपेड़ा पूरी तागत सुं परबु ईसु को पाछो जिन्दो होबा की गुवाई देव्अ छा। अर परमेसर बा सबळा प खुब दीया कर्यो। 34 बी टोळी मंसुं कोई न्अ कांई बी कमी कोन्अ छी क्युं क जिकन्अ बी जमी या घर छा बीन्अ वे बेच देव्अ छा अर उसुं ज्यो पिसा बान्अ मल्अ छा बान्अ ल्यार 35 थरपेड़ा न्अ सुंप देव्अ छा। अर जिन्अ जतरी जुरत होव्अ छी बीन्अ अतरा पिसा देदिया जाव्अ छा।

36 जस्यानकी यूसुफ नांऊ को, साइप्रस मं रेबाळो, एक लेवी छो जिन्अ थरपेड़ो बरनबास मतलब लोगा न्अ उकसाबाळो बी खेव छा।

37 वो एक खेत बेच दियो जिको वो धणी छो अर बीका पिसा ल्यार थरपेड़ा न्अ सुंप दियो छो।