थरपेड़ा का काम 7

स्तिफनुस को भाषण

1 फेर महायाजक स्तिफनुस न्अ बुज्यो, “ये बांता सांची छ कांई?” 2 वो जुवाब दियो, “भाई-बन्ध अर बढ़ा-बुढ़ाओ! म्हारी बात सुणो। हारान मं रेबा सुं पेली आपणा बाप-दादा अबराम मेसोपोटामिया मं छो, जद्‍या महमाळो परमेसर वाक्अ साम्अ प्रगट होयो” 3 अर खियो, “तु खुदका देस अर घर-बार न्अ छोड़र बी देस मं चलजा, ज्यो मं थन्अ दखाऊलो।” 4 तो वो कसद‍्‌या की जमी न्अ छोड़र हारान मं जा बस्यो जण्ढ्अ सुं बीका बाप की मोत क पाछ्अ परमेसर बीन्अ बी देस मं आबा को मोको दियो जण्ढ्अ अबार थें रेरया छो। 5 परमेसर अण्डअ बीन्अ कांई कोन्अ दियो, अण्डअ ताणी क एक तल जमी बी कोन दियो। बीक्अ कोई ओलाद कोन्अ छी पण परमेसर बीसुं प्रतिज्ञा कर्यो क यो देस वो बीन्अ अर बीका बंस का न्अ बाकी सम्पत्ति का रूप मं देव्अलो। 6 परमेसर बीन्अ या बी खियो, क “थारा बंस का मनख परदेस मं रेवला अर उण्डअ का मनख बान्अ च्यार सौ बरस ताणी दास बणार बाकी लेरअ बरो बुवार करअला।” 7 परमेसर खियो, “दास बणाबाळी बी बरादरी न्अ मं सज्या देऊलो अर फेर बीक्अ पाछ्अ वे बी देस मंसुं बारे आजाव्अला अर वे ई ठोर प म्हारी सेवा करअला।” 8 अर परमेसर अबराम न्अ वाचा का नसाण जस्यान खतना को दस्तुर दियो। जिसुं वो उंका छोरा इसहाक का जनम क आठवां दन पाछ्अ खतनो कर्या। वस्यान ई इसहाक याकूब को अर याकूब खुदका बारा छोरा आपणा आग्लाबड़ा बारा गोतां का पेला मनखा का खतना कर्यो। 9 याकूब का वे ग्यारा छोरा बाका भाई यूसुफ प बळ्या मरअ छा। जिसुं वे बीन्अ हाळी बणबा बेई मिसर मं बेच दिया। पण परमेसर उंकी लेरअ छो। 10 अर वो बीन्अ सबळी विपत्या सुं बचायो। परमेसर यूसुफ न्अ मिसर का राजा क साम्अ अस्यान की बुद्धि अर दीया दियो क, राजो बीन्अ मिसर को राजपाल अर खुदका घरको अधिकारी बणायो। 11 अर वां दना मं सबळा मिसर अर कनान देस मं काळ पड़यो। जिसुं हाहाकर माचग्यो अर आपणा आग्लाबड़ा का खाबा का बी लाला पड़ग्या। 12 जद्‍या याकूब सुण्यो क मिसर मं नाज छ, तो पेली बार वो आपणा आग्लाबड़ा न्अ उण्डअ खन्दायो। 13 बाकी दूसरी यात्रा की बगत यूसुफ बीका भाया न्अ बतायो क बोई यूसुफ छ। अर मिसर का राजा न्अ बी यूसुफ का परवार का बारा मं जद्‍याई तोल पड़यो। 14 तो यूसुफ खुदका बाप याकूब अर परवार का सबळा मनखा न्अ बला खन्दायो ज्यो सबळा पचेत्तर मनख छा। 15 जद्‍या याकूब अर बीका परवार का सबळा मिसर गिया अर जण्ढ्अ वो अर वे सबळा आपणा आग्लाबड़ा बी उण्डअ मरग्या। 16 बाका हाड़ उण्डअ सुं पाछा सकेम मं लेग्या जण्ढ्अ बान्अ कबर म गाढ़ दिया या बाई कबर छी जिन्अ अबराम हमोर का छोरा सुं मोल लियो छो।

17 जद्‍या परमेसर अबराम सुं ज्यो प्रतिज्ञा कर्यो छो, बीको पूरो होबा की बगत सांकड्अ आई तो मिसर मं आपणा मनखा की गणती साऊटी होगी। 18 आखरी मं मिसर मं एक अस्या राजा को राज आयो ज्यो यूसुफ न्अ कोन्अ जाण्अ छो। 19 वो आपणा मनखा की लेरअ बरो बुवार कर्यो। वो आपणा आग्लाबड़ा न्अ धोखा सुं मजबुर कर्या क वे खुदका लुवा-बाळका न्अ बारे मरबा बेई छोड़दे। 20 उंई बगत मं मूसा जनम्यो। वो परमेसर क साम्अ घणो रूपाळो बाळक छो। तीन मिना ताणी उंकी देखभाळ घर मं ई होती रेई। 21 अर फेर जद्‍या बीन्अ बारे छोड़ दिया तो राजा की छोरी बीन्अ उठा'र खुदका छोरा की न्याय पाळी-पोसी। 22 मूसा न्अ मिसर्या का राज-पाट को बढ़ीया ज्ञान मल्यो। वो बाणी अर करम दोन्या सुंई महान होग्यो।

23 जद्‍या मूसा चाळीस बरस को हियो तो खुदका भाई-बन्धा इजरायल का मनखा सुं मलबा को निस्चय कर्यो। 24 तो एकबार वो देख्यो क मिसर को एक मनख बाम्अ सुं एक की लेरअ बरो बुवार करर्यो छ तो वो बीन्अ बचायो अर मिसरी मनख न्अ मार'र बदलो ले लियो। 25 क्युं क बीको बच्यार छो क बीका खुदका भाई बंद जाण जाव्अ क बान्अ छुड़ाबा बेई परमेसर बीन्अ काम मं लेर्यो छ। पण वे बीन्अ कोन्अ समझ सक्या। 26 दूसरअ दन बीका अपणा मनखा मंसुं कोई मनख लड़रया छा तो वो बाम्अ मेल जोल कराबा की जोरी कर खियो, “ओ भाईवो, थें तो भाई भाई छो। फेरबी एक-दूसरा सुं क्युं लड़रया छो?” 27 पण वो मनख ज्यो खुदका पाड़ोसी सुं बरो बुवार करर्यो छो मूसा क धक्‍को देर खियो, “थन्अ म्हाप्अ अधिकार करबाळो अर न्याय करबाळो कुण बणायो छ? 28 जस्यान तु क्याल बी मिसरी न्अ मार्यो छो वस्यान ई तु मान्अ बी मारबो छाव्अ छ कांई?” 29 जद्‍या मूसा या सुण्यो तो उण्डअ सुं भागग्यो अर मिद्यान देस मं एक परदेसी की न्याय हेर रेबा लागग्यो। उण्डअ उंक्अ दो छोरा पदा होया।

30 चाळीस बरस बित्या पाछ्अ सिनाई डुंगर क सांकड्अ राड़ी मं एक बळता झाड़ की झाळा क गाब्अ सुं एक सरगदूत बीक्अ साम्अ प्रगटयो। 31 मूसा जद्‍या या देख्यो तोबी नजारा न्अ देखर अचम्बा मं होग्यो। अर वो ओर नीका देखबा बेई बीक्अ सांकड्अ गियो तो बीन्अ परबु की आवाज सुणाई दी क, 32 “मं थारा आग्लाबड़ा अबराम को, इसहाक को अर याकूब को परमेसर छु।” अर या सुणर मूसा ड़र सुं कांपतो होया देखबा की हिम्मत बी कोन कर सक्यो।

33 जद्‍या परबु बीन्अ खियो, “थारा पगा की चप्पला उतार द क्युं क जी ठोर प तु उबो छ बा पवितर ठोर छ। 34 म मिसर मं म्हारा मनखा की लेरअ होरया बरा बुवार न्अ देख्यो छु। म बान्अ कळसर रोता सुण्यो छु। बान्अ आजाद कराबा बेई मं तण्अ उतर्यो छु। आ, अब मं थन्अ मिसर खन्दाऊलो।” 35 यो बोई मूसा छ जिबेई वे या खेर नटग्या छा क, “थन्अ म्हाप्अ अधिकार करबाळो अर न्याय करबाळो कुण बणायो छ?” यो बोई छ जिन्अ परमेसर बी सरगदूत सुं ज्यो बीक्अ बेई एक बळता झाड़ मं प्रगटयो छो, राज करबा बेई अर छुड़ाबा बेई खन्दायो छो। 36 वो बान्अ मिसर मं अर लाल समून्दर मं अर उजाड़ थळा मं चाळीस बरस ताणी अचम्बा अर अणोता चमत्कार का काम करता होया मिसर मंसुं बारे नखाळ ल्यायो।

37 बोई मूसा इजरायल का मनखा न्अ खियो छो, परमेसर थारा भाया मं सुंई थांक्अ बेई एक म्हारअ जस्यान को परमेसर की ओड़ी सुं बोलबाळो खन्दाऊलो। 38 यो बोई छ ज्यो राडी मं इजरायली मनखा की लार रियो छो, वो आपणा आग्लाबड़ा की लेरअ बी छो अर सिनाई डुंगर प बासुं बाता करबाळा सरगदूत की लेरअ मेजुद छो। ज्यो आपान्अ देबा बेई परमेसर सुं जन्दगी देबाळा बचन पायो छो।

39 पण आपणा आग्लाबड़ा उंकी बात कोन्अ मान्या, मूसा न्अ नटग्या अर वे पाछा मिसर जाबो छार्या छा। 40 वे हारून न्अ खिया, “म्हाक्अ बेई देवता बणाज्यो म्हान्अ गेलो दखाव्अ। में कोन्अ जाणा क बी मूसा को कांई होयो ज्यो मान्अ मिसर सुं नखाळर ल्यायो छो।” 41 तो बा दना मं वे एक बछड़ा की मूरती बणार बीक्अ बेई बली चढ़ाया। जिन्अ वे खुदका हाथा सुं बणाया छा, उंप्अ वे घणो आण्द मनाया। 42 पण परमेसर बासुं मुण्डो फेर लियो अर बान्अ आम्बर का ग्रह-नछत्रा की पूजा करबा बेई छोड़ दियो। जस्यान परमेसर की ओड़ी सुं बोलबाळा की पोथ्या मं मण्ढर्यो छ क, “ह इजरायल का मनखवो, थे राडी म चाळीस बरस ताणी ज्यानबरा की बली अर दूसरा चढ़ावा मनई चढ़ाया छा कांई? 43 थें मोलेक देवता की पालकी अर देवता रिफान का तारा न्अ थांकी लांरा लेर फरअ छा, ज्यां मूरत्या न्अ थें पुजा करबा बेई बणाया छा। जिसुं म थान्अ बाबुल सुं बी आंतरअ गुलामी मं खन्दाऊलो।” 44 परमेसर को तम्बू बी राडी मं आपणा आग्लाबड़ा की लेरअ छो। वो तम्बू वस्यान ई बणाया छा जस्यान परमेसर मूसा न्अ दखायो अर बतायो छो। 45 आपणा आग्लाबड़ा बी तम्बू न्अ यहोसू की मेजुदगी मं ई ठोर मं लेर आया छा। जि ठोर न्अ वे उण्डअ रेबाळी जात्या सुं जीत लिया छा। ज्यांन्अ परमेसर आपणा आग्लाबड़ा क साम्अ सुं नखाळ दियो छो। वो तम्बू दाऊद की बगत ताणी उण्डअ'ई रियो। 46 दाऊद परमेसर की दीया पायो अर अरदास कर्यो क वो याकूब का परमेसर बेई एक मन्दर बणवाव्अ। 47 पण वो राजो सुलेमान ई छो ज्यो वाक्अ बेई मन्दर बणवायो। 48 पण परम परमेसर तो हाथा सुं बणाया मन्दर मं कोन्अ रेवे। जस्यान परमेसर की ओड़ी सुं बोलबाळा खिया छ, 49 परबु खियो, सरग म्हारो सिंहासन छ, अर धरती म्हारा पगा की चोकी छ। म्हारअ बेई थें कस्यान को मन्दर बणावला? कसी ठोर मं म आराम करू? 50 ये सब म्हारा हाथा का बणेड़ा कोन्अ कांई?

51 अर स्तिफनुस खियो, “थें कस्या अडोक्ला छो, थांका मन परमेसर सुं कतरा आंतरअ छ अर बीका संदेस बेई थें कतरा बेरया छो। थें थांका आग्लाबड़ा ज्यान सदाई पवितर-आत्मा को बिरोध कर्या छो। 52 कांई अस्यानको कोई परमेसर की ओड़ी सुं बोलबाळो छो, जिन्अ थांका आग्लाबड़ा धोखा सुं कोन्अ पकड़ाया? वे बा परमेसर की ओड़ी सुं बोलबाळा न्अ मार दिया ज्यो परमेसर का धर्मी दास बेई पेलीई अलान कर दिया छा। जिन्अ अब थे धोखा सुं पकड़र मार दिया। 53 थे बेई छौ ज्यो परमेसर का निम सरगदूता का हाथा सुं लेतो लिया पण बीक्अ उपरअ चाल्या कोन्अ।”

स्तिफनुस न्अ भाटा सुं मारबो

54 जद्‍या यहूदी महासभा का मनख या सुण्या तो रोषा म भरग्या अर बीक्अ माळ्अ कचकच्या भिचबा लागग्या। 55 पण पवितर-आत्मा सुं भर्यो स्तिफनुस सरग ओड़ी नाळ्यो। वो देख्यो क परमेसर की महमा मं ईसु परमेसर क जीवणी-बगल मं उबो छ। 56 तो वो खियो, “देखो! म देखर्यो छु क सरग खुल मेल्यो छ, अर मनख को छोरो परमेसर क जीवणी-बगल मं उबो छ।”

57 तो वे बळार खुदका कान भींच लिया अर फेर वे सबळाई एकलार बळाताई बीक्अ माळ्अ झपट पड़या। 58 वे बीन्अ धक्‍का-मुक्‍की करताई नगर क बारे लेग्या अर उंप्अ भाटा बगाबा लागग्या। जद्‍या सबळा गुवा खुदका चादरा न्अ उतार'र साऊल नांऊ का एक मोट्‍यार मनख कन्अ मेल दिया। 59 वे स्तिफनुस प भाटा फाकताई रिया जद्‍या वो परातना कर्यो क, “ह परबु ईसु म्हारी आत्मा न्अ लेल्यो।” 60 फेर वो गोढावाण्या पड़ग्यो अर जोरसुं बळायो, “परबु ई पाप न्अ यांका बिरोध मं मत लिज्यो।” अस्यान खेर वो सदा की नीन्द मं सोग्यो।