Bi Yesu Kiris afeeñale bu
Kájabina ku
1
Kaawiit konde kíyekie fu béenuusee bu bi Yesu *Kiris afeeñale bu.
Atambatun n'áhino éemeyi bo kaanuku éewufoor bo kiŋki karok bija te o,
man ni kámeyi beeware bu kabaju memee.
Yesu Kiris n'áboñin amalaka oone eebin eesokam bo,
íñje Saaŋ aroka oone.
2 Abe isokasok b'ijuke bu bireyi fea:
bo beemo fu hirim hite Atambatun,
nu múniyo mi Yesu Kiris áwufooram mu.
3 Atoof t'an eejaŋgee u kaawiit konde tu buhooŋu ésuk i,
ni kiŋki kajamatan báhamin bonde béenuutina bu t'Atambatun,
abe n'iŋi kájeŋgin yooŋ beekiñjee bu te ko,
ábuki memee bo kabaju!
Kasaafu kite kéeyilene ku ti kikinu keemo hutok nu kúsuba
4 Íñje Saaŋ ikiñje fee bakate ku ti kikinu keemo hutok nu kúsuba kite Asi *kéeyilene ku:
Atambatun aja ásoniyanuun,
abe n'awunuun káasuumaay,
akina eeemo u,
akina éeyemie u,
akina eebin ub.
Ñúwejet ñu hutok nu ñúsuba ñu ñeeemo ñu hágila eriikeey yeene yite híyiaate hu ñija ñúsoniyanuun,
abe nu ñuwunuun yooŋ káasuumaay.
5 Yesu *Kiris yooŋ,
aseede éejube u aja ásoniyanuun,
abe n'awunuun káasuumaay,
akina eeemo u átiyar u dók ti karitanee t'eket i,
akina eeemo u áyi ite bákayi ku t'etaam i.
Kiris ámaŋamaŋi úne,
abe n'aram úne tu wuhoofoor wu ni halan hoone héeyuusee huc.
6 Áhinahin úne núuyemi bakan bakate ti jáyi joone.
Áhinahin úne yooŋ núuyemi éhina *wusarahd bija t'Atambatun Faafo.
Yesu Kiris aja ákini hiraanu kániku ku ni sembe su!
Amiin.
7 Arijuk,
ondu ti bibin tu bufor bu!
Ésuk i fe,
bija yooŋ ni keeyao ku kajukio ni ñíkiniin.
Búsuk bite t'etaam ye fe kayiyu uŋu hoone hue.
Hee bondu kabaju!
Amiin!
8 Atemit,
Atambatun eehaŋe u ebaja sembe aane:
«Íñj'eemo fu átiyar u n'araan u tokof,
íñj'eemo u,
íñje éeyemie u,
íñje eebin u.»
Yesu n'afeeñ ti Saaŋ
9 Íñje Saaŋ atuuun iŋi naane úhine i t'afeeneŋ ni Yesu *Kiris.
Úne bakate ti Jáyi jite Atambatun,
abe íñj'endu ti kajuku sílaam naane aruun,
íñj'endu yooŋ ti kámuñu kep naane aruun.
Kajokamjok kabin káfiiten t'ekiŋk yende yiyi kaane Patmos aŋarkeyi naane iŋ'iwaare hirim hite Atambatun,
nu múniyo mi Yesu áwufooram mu.
10 Tu hunak hite Anahaan ug,
Búwejet Beenabe bu nu bujokam,
abe n'ijam inde hiñaawiam kaaji kéetumbe kiraas naane káabiinu.
11 Ni keene:
—Bamb'a̱juk iye,
a̱kiñj bo ti kaawiit,
abe n'a̱boñ ko *kéeyilene ku ti kikinu hutok nu kúsuba konde:
Efees,
Simirn,
Perigam,
Tiyatiir,
Sarid,
Filadelfi,
ni Lawodise.
12 N'iweteko kaanuku man n'ijuk an aa áhamin iyu n'íñje.
N'ijuk báanaŋum bite búrundoora beemo hutok nu súsuba bite éwurus,
13 abe ake eenokoore nu húŋgowulan n'áyemi t'etut bo.
Asiimasiimo kájufa kéeyuuse,
abe n'awuuj nibaŋ nite éwurus tu búsuso.
14 Wan wu ti hikawo aŋ'afañj daŋ naane ehuuy,
ñíkino ni ñíyemi naane sineemak.
15 Wuwoto uŋu wútumb wusilan naane mañ meebuuyee ti sineemak,
abe ni míhinee meebunan.
Kaajio uŋu kusok naane kúsuw kite káajuŋeeyh.
16 Ajokajok t'emoŋio yaatos i wúloofiiloof weemo hutok nu wúsuba,
abe kábura keebaliŋge suf iŋi kíŋaasin tu butumo.
Buhooŋio iŋi bisilan naane taanak tu kaajiŋgan far.
17 H'ijuko hu,
n'iney bite wuwoto naane an eekete.
N'ásit emoŋio yaatos i t'íñje abe n'aanam:
—Atum'á̱koleyi!
Íñj'eemo fu átiyar u n'araan u tokoi.
18 Íñj'eemo fu an eeemo u buroŋ.
Íketaanaketaani,
bare hahiye íñj'endu buroŋ hiraanu.
Íñje íyekie fu sijaab site eket i,
ni site ti keekete ku tindi kaja.
19 Náami a̱kiñj bamb'a̱juk iye:
beebaje bu hahiye,
ni beeja bu bibin kabaju.
20 Wúloofiiloof wu hutok nu wúsuba wu w'a̱juke wu t'emoŋiam yaatos i,
ni báanaŋum bite búrundoora bu hutok nu súsuba su bite éwurus i,
iye i bije fu:
wúloofiiloof wu hutok nu wúsuba wu weemo fu emalaka yite kéeyilene ku ti kikinu keemo hutok nu kúsuba;
báanaŋum bite búrundoora bu hutok nu súsuba su ni bíyemi kéeyilene ku ti kikinu keemo hutok nu kúsuba.