Bi Yesu Kiris afeeñale bu
Béekinineŋe bu kaawiit konde ni kikiñjee
Diye eleetar i yi Saaŋ, *apotor ite Yesu *Kiris akiñje i *kéeyilene ku ti kikinu keemo hutok nu kúsuba kite Asi. Aane b'akiñje bu te yo fe, ajukajuk bo féet ni ñíkino, ajamajam bo yooŋ nu wúkondino. Aane Búwejet bite Atambatun bujoko fu éeyini kámeyi bondu fe.
Kajokajok Saaŋ kaja káfiiten t'ekiŋk yiyi kaane Patmos, t'ésuk ite Asi. Bo b'akiñje fu eleetar yende kaanuku eeyaŋganan Ekarjen i kikaw, ábuki kóŋkeyin káhihinooreehihinoor dómbokun. Ho h'aaniin fu kajok alitee bija yooŋ tu hunak hiraanu hu, abe ni kayakar, ábuki Yesu aanaan: «An fe eeyak kariiŋan, íñje kawunio eeteŋ ti miriyaay mite nunukanuk nunnu nuwun buroŋ bu neeemo nu t'etiir t'etool ite Atambatun.» (Kafeeñal ku 2.7). Abe Yesu humuumo bibin memee, eebin eeheek meejakut mu.
Bike bómbokun bondu ti kaawiit konde: bítiyar bu beemo fu ñúwejet ñeejakut ñu ñondu tu burok t'etaam ye, abe Ekarjen i kajuku sílaam, bakaake tu boko kayak iŋi kayoolee. Búsooboriyan bu beemo fu Yesu aamo fu Anahaan u, abe akina kariiŋan Setani, ni keeteñekee ku Atambatun, bija yooŋ ñúwejet ñeejakut ñu fe. Bíhaajiyan bu beemo fu Atambatun anaŋanaŋ hisiibanu bija ti bakan kéeyilene ku te o, áhaŋum keeyoolee ku uŋu hoone hu.
Hirim honde hibajabaj sembe, abe eyakar yooŋ yendu toko bija ti bakan kondu keejuke ku sílaam sondu sómbombokun su. Húwufooriinwufoor yooŋ kaanuku naane bakate ku *Rom ii káhihinooriin fe, Yesu, Ametek ite Atambatun bibin kanuutan bondu, ábuki o aja fu kariiŋan. Bondu bihaŋiin fu kayaŋganan kikaw.
Beefeeñe bu Saaŋ, naane etaam yende eja i kamoosen, n'éyeni i y'Atambatun aja i bibin kasiiŋan, ni naane aja i kafakan kéejeŋgino ku fe, asokasok bo. Setani, n'emalaka yeene, ni kéejeŋgino ku fe, Yesu kaheekiiin, abe n'áfiiteniin ti kaayeen kéesulie-sulie ku. Bufor bíyeni n'iŋi bibaj, n'etaam yooŋ éyeni, ni hikinu híyeni, abe Atambatun n'Anahaan u Yesu n'iŋi kabin keekin toko ni bakan kéejeŋginiin ku.
Iye i kaawiit konde kije fu:
1) Kasaafu ku (1.1-8)
2) Yesu n'afeeñ ti Saaŋ (1.9-20)
3) Bileetar beekiñjee bu bija ti bakate ti kikinu keemo hutok nu kúsuba kéeyilene ku (2.1-3.22)
4) Kásukaay ku t'etiir bufor bu (4.1-11)
5) Kaawiit keekotanee ku kúkotanin keemo hutok nu kúsuba (5.1-6.17)
6) Kásukaay ku hágila eriikeey ite Atambatun yite híyiaate hu (7.1-17)
7) Wúbiinu wu hutok nu wúsuba wu (8.1-11.19)
8) Éjufuur i, ni síndakakureŋ súsuba su (12.1-13.18)
9) Kajoonan kite kúŋgowulan ku, ni kite bakan keeramee ku (14.1-15.8)
10) Sukot séeyekie su kayiŋat kite Atambatun (16.1-21)
11) Enatoora yite Atambatun kariiŋanee (17.1-20.10)
12) Kajoonan kiraanu ku (20.11-15)
13) Bufor bíyeni bu, n'etaam éyeni i (21.1-8)
14) Serusalem éyeni i (21.9-22.5)
15) Memee Kiris bíbatikeina (22.6-21)