Eleetar étiyar i yi Saaŋ akiñje i
Yesu aamo fu hirim hu huhu huwun buroŋ bu
1
Uni írikiñjinuun fee iŋ'ite Hirim hu huhu huwun buroŋ bu.
Híyemayemi huta hu t'Atambatun áwuwanoorut doon areyi fea.
Irijamajam ho,
irijukajuk ho yooŋ féet,
íriheelinaheelin te ho,
abe irigoragor ho.
2 An u aa awun buroŋ bu áŋaasinoŋaasin,
abe irijukojuk.
Iŋ'iriseedoo t'aruun,
abe n'irisokuun an eeemo u buroŋ béehabanaariit bu.
Ámoomi ti Faaf u,
abe n'afeeñ t'unib.
3 B'irijame bu abe n'irijuk,
iriisokuun bo yooŋ kaanuku man n'árihin n'uni t'afeeneŋ,
naane írihine i t'afeeneŋ n'Atambatun Faaf u,
n'Añio Yesu *Kiris.
4 Uni bokondu ti kákiñjinuun bonde kaanuku man katoofu kite k'uni ni kireeŋ.
Úñaah ti meejaaŋe mu
5 Hirim h'irijame hu ti Yesu *Kiris,
uni kasokuuun ho;
ho heemo fu honde:
Atambatun akina meejaaŋe,
abe ébaani étumbut éyemi te o.
6 Uf'úene úhinahin ne o t'afeeneŋ,
abe n'úkin yooŋ t'ébaani,
újuusa,
abe úhinut naane múniyo mu musoke i.
7 Bare uf'úkin ti meejaaŋe mu,
naane Atambatun humuumo aamo i ti meejaaŋe mu,
n'aŋ'áami úne *kéeyilene ku úhinahin t'afeeneŋ,
abe halan hite Añio Yesu n'uŋu *hukuuran úne ti kaahoofoor kánokan.
8 Uf'úene úbajut mayet kaahoofoor,
úbuuta kikaw úne,
abe múniyo mu munooto t'úne.
9 Bare uf'úsok Atambatun wuhoofoor wute w'úne,
makamu ájubajub,
abe doon fe d'asoke aŋ'áhin do,
o kaboŋket úne wuhoofoor wu,
abe n'aŋ'akuuran úne ti meejakut mánomanc.
10 Uf'úene úbajut wuhoofoor,
újoka Atambatun ajuusa,
hirim hoone yooŋ hunooto t'úne.