Kéeliikenaariit ku ésuk i bite bu nu múniyo
(Sud 4-13)
2
Kóŋkeyin,
abajabaj *Israyel bakan iŋi karito ni kajuus kaane boko kaamo *eyiŋana yite Atambatun.
Iyu yooŋ i bakaake kayak fu birito t'etutuun,
abe n'iŋi kajuus kaane boko kaamo émuse,
bare bi kaja fu kaliiken ésuk i bíteiit nu múniyo.
Boko kaliikenuun bite haajuus bite kátowutan ésuk i,
abe boko biteñeko yooŋ Ámuse u eejaame u wuhoofoor wooniin.
Iŋ'ite ho aamo fu bútowuto booniin káfufu,
abe n'aŋ'áami boko kaŋese bo.
2 Keehooje kasayiiin ti kiñaawu ti manoŋkar mooniin meejakut mu,
kéekinineŋ ésuk i ni kálafatin bítim bite múniyo mu.
3 Émuse yendu,
káfaŋi kooniin kite sírirem su káhinu ni kasokuun báhamin bi kanoŋke kéetuut,
kaanuku man ni kahoohuun.
Bare afiyee naane kajoonan kooniin kisiiŋee i,
abe at'ahul bútowuto booniin ni bireeŋ!
4 Múniyo Atambatun ayubiyenut emalaka i keehoofoore ku;
áfiiteniinfiiten ti kaayeen kéesulie-sulie ku ti kafaakee du t'ébaani i túruk bija tu hunak hite Kajoonan ku.
5 Atambatun ayubiyenut yooŋ énafuta yendu bakate ku kóŋkeyin;
áhinahin etiir yómbombokun yéenubin tu boko eyak eram etaam i.
Bare afakanafakan *Nowe aa awaare ésuk i beejake bu,
ni bakan yooŋ kaamo hutok ni bákasubaa.
6 Atambatun ajoonanajoonan yooŋ bakate ku *Sodom nu *Gomoor;
ásufasuf búsuk bondu ni sineemak ayak abin aŋeñen hábumba.
Diyu báaluwenum ti bakan keejakut ku,
bite káwufooriin beenahan bu nu bokob.
7 Bare afakanafakan *Lot eeemo u ániine eejake.
Lot aŋ'ajuk ti manoŋkar meejakut mu mite énafuta i bakate ti kikinu kondu,
eholo fe eŋ'ehabanoc.
8 Ábuki hunak heenee hunak,
ániine ondu eejake ii,
abe n'akin yooŋ nu boko t'afeeneŋ aŋ'ajuk naane ii kanoŋk,
aŋ'ajam yooŋ kirim kooniin keejakut ku,
asooñen n'átaañian dómbokun ti manoŋkar mooniin.
9 Bondu búwufoorawufoor kaanuku Atemit áyinooni kafakan ti sílaam su kéejeŋgino ku,
abe n'afin awas keejakut ku kaanuku eebin eenij tu boko hunak hite Kajoonan ku.
10 O kahaŋu kaniju ti kiŋki kanaban wúfaŋi weejakut wute siniiin,
abe n'iŋi kahuuf hiseefaate hu.
Bokondu kiŋki kaliiken ésuk i bite haajuus hu kákoleyiit Atambatun,
abe yooŋ iŋi kayitooro.
Kájeŋginaariit bakate ku t'etiir kéenike ku,
bare iŋi kátumb kálafatiniin.
11 Humuum emalaka i kásiiŋaariit tu buhooŋu Anahaan u iŋi kálafatiniin;
abe bare kahaŋahaŋ kiŋki kaliiken ésuk i bite haajuus hu sembe fuf.
12 Bare bokondu iŋi kanoŋkooro kéehin naane bíndakakureŋ béemuusut,
bite bibin kajokiee abe nu buyoolee,
ábuki iŋi kálafatin bi kámeyiit bu.
Boko kayooliee naane bíndakakureŋ bu.
13 Kunoŋk keejakut ki káhine ku bakaaku,
boko kabatikanee ko.
Katoofu kooniin fe keemo fu ni káhin wúfaŋi wooniin weejakut wu mijiniŋga raŋgaw.
Ifi káyemi tu buñoofo n'aruun t'afeeneŋ,
iŋi kajuusuun kep kikawiin keetoof;
abe bondu bútumbatumba búfuñinani t'aruund.
14 Kikawiin fe kondu ti haare hu,
kaanuku man ni kaŋot nu boko.
Kálaamaariit hikee ti káhinu kite wuhoofoor wu,
abe iŋi kabuut bakan keejokut ku alitee ti bítim bite *Kiris.
Kabaju sírirem taŋ keemo fu ti kikawiin.
Bokondu Atambatun áwuumiinwuum!
15 Kawasawas bítim beejoŋoore bu,
abe ni kátowuto.
Iŋi kasa ti hiñaawu Balam ayiŋana u,
añi ite Bosoor,
akina éemaŋie u ajaamee sírirem éehin meejakut.
16 Bare abinabina awatanee ti beejakut bondu:
ambam eeyinaat u báhamin áhamino fu ni kaaji kite húŋgowulan,
eefito ti beeñunut bondu b'ámaŋie bu yéeni káhinue.
17 Bokondu kiŋki kaliiken ésuk i bite haajuus hu kámoomi naane bísaabun beesaye;
kámoomi yooŋ naane bufor b'eyam i eyisaloole.
Atambatun afareiinfare báakinum t'ábaanie-baanie du.
18 Iŋi káhamin báhamin beeñunut bite jímak taŋ,
abe n'iŋi kafurukato yooŋ kaanuku man ni kabuut bakan keeemo ku ti kánuutinaiin ti bakaaku keeroŋe ku t'ébaani.
19 Iŋi kaaniin karoŋut káyemi búsukateen bite eluwa i,
abe bare boko kumuumiin búsukateen bite wúfaŋi wu wuwu wútowutaniin.
Ábuki huruw-ruw fe ásukateen ite doon deehaŋo.
20 Ésuk i kafakafak tu wúfaŋi weejakut weeemo wu t'etaam ye aŋarkeyi naane kámoomi Anahaan ite úne Yesu Kiris,
*n'Afakana u yooŋ toko.
Bare ifi kasooñ kawas wo weehaŋiin sembe,
bihabanooro booniin kahaŋu kajakaate naane kanokoore i hítiyar hu.
21 Ahaŋ yéeni kajaku tu boko itim kámeyi bítim beejoŋoore bu,
bala kámeyi bo,
abe ni káwuŋg kiñaawu eluwa yeenabe i yi kaliikenee i.
22 Beebajiin bu búwufoorawufoor kaanuku bonde beesokee bu bite nu múniyo:
«Ékuruk aŋ'asooñ ateŋ doon d'asaje duf»;
nu bonde yooŋ:
«Efuruka aŋ'añawee nu móhujo ahaban,
n'aŋ'asooñ ahuruso ti hatef hu.»