Faaf úne Atambatun
12
Eseede keehooje-hooj kaŋoloolaŋolool úne.
Náami úne yooŋ útuyinooro doon fe deekolene bija bite b'úne,
ni kaahoofoor ku kuŋku kukolen yooŋ úne ti meehile jab,
abe n'úñiŋkaan núutey kateyi k'úsokee ku.
2 Úsik ñíkin úne únaŋ ti Yesu éefeŋgine u úne bítim bu núubaj káyilen,
abe o aja fu káhinu ko keehaŋ kayanu.
Ámuñamuñ keeyoolo *t'ekuruwa i,
abe ajukerut yooŋ iŋ'ite ñufuñ ñeeemo ñu t'eket naane yendu,
ábuki aŋandanaŋandan katoofu keefaree ku bija te o.
Hahiyu ariikaa inde *baatos báariikeim bite Atambatun bite híyiaate hua.
3 Ariyinoor naane Yesu ámuñe i h'ehoofoora i kahuufo hu,
man siheluun itim sibin súbujo abe n'ariñako.
4 T'étuum yeenuun ni kaahoofoor ku,
aritandarisanoorut ayak abin áami ariketa.
5 Kame arifiilafiil kirim k'Atambatun asokuun ku kaanuku eeyaŋgananuun kikaw,
aruun bakañio?
Aanaan:
«Áñuumo,
Atemit af'ajoŋoorani,
atum'a̱jok bo doon déewiinie;
abe af'akamoor t'awe,
eheli etum'ébujo.
6 Ábuki Atemit aŋ'ajoŋooran an a ámaŋie u,
abe aŋ'ámiñ húŋgowulan fe h'ajoke naane añiob.»
7 B'ariware bu kámuñu beemo fu sílaam su,
ábuki Atambatun aŋ'ajoŋooranuun naane bakañio.
Abajeebaj fíya añi i faafo ájoŋooranaariit u?
8 Atambatun aŋ'ajoŋooran bakañio fe.
Afut'ajoŋooranuun,
n'aŋ'áami kame arinooto bakañio nu múniyo;
aruun bakañi keebukee tíyaŋ.
9 Úbaŋino sifaaf úne bakate ku t'etaam ye:
úne biñi bu,
iŋi kajoŋooran úne,
abe n'uŋ'újeŋginiin.
Náami úwarawar kahaŋu kájeŋgin Atambatun Faaf ite úne eeemo u t'etiir man n'úbaj buroŋ bu.
10 Sifaaf úne iŋi kajoŋooran úne simit iye kep kane kayinoor ni kaane bijakajak.
Bare Atambatun aŋ'ajoŋooran úne bija ti káasuumaay kite k'úne kaanuku man n'úbin únab hiraanu naane akina.
11 An af'áyemi ti kajoŋooran úne,
újokaariit bo toko-toko naane doon dite katoofu;
uŋ'útaañian.
Bare bibin bifiyo,
bakan keejoŋooranee kii kajuku éñjeriŋ yeeemo i toko:
boko kabaju káasuumaay,
nu buroŋ beejoŋoore.
Karimu ku, ni káyeegal ku
12 Iŋ'ite ho aamo fu aruun kéelaame ku ti kanaban kite ku *Kiris,
ariyit sumoŋuuun séelaame su,
abe n'arijoŋooran wújuunuun wéeŋuuhee wu!
13 Arija tu búhuhu beejoŋoore buc,
man wuwot wute kiŋki kajiŋk utum wuhabanooro,
bare nu wúkoyi.
14 Árihin wáhowah man káasuumaay ni kíyemi t'etutuun aruun ni bakaaku fe,
abe n'aribaj buroŋ beenabe.
An afut'anab,
at'ajuk Atemit.
15 Arinaŋ toko kikawuun,
kajaku kite Atambatun,
an atum'áwuŋg ko hiñaawu.
An t'aruun atum'áyemi naane nunukanuk nite miriyaay méetike;
n'aŋ'átifen bakan keehooje ni kátiku kooned.
16 An t'aruun atum'afurukato,
man yooŋ n'ahuuf buroon beenabe naane Esawu abine i áhin.
Ásikasik hifaafaate hoone ajoohen uŋu húñoofein hifeeneŋ taŋ.
17 Árimoomi kaanuku abinabina afiyo,
n'ámaŋi kaanuku faafo éesoniyano kásoniyan kite aneemak u,
bare faafo n'ateñeko.
Biyiy b'ayiye bu yooŋ biyinaat toko doon,
ábuki abajut efehe yite kanuutan b'aheeke bu éehine.
18 Arilohut hirij h'áriyinie kagoru nu sumoŋuuun,
naane *Israyel kóŋkeyin t'eramba i.
Kajukajuk toko ti hirij hite Sinayi sineemak sómbokun ti kátifu t'etiir ho,
ni káakumba,
n'ébaani,
n'eyam yómbokun.
19 Ni kajam yooŋ ti káabiinu kusoke,
ni kaaji kéelinde.
H'Israyel kajame hu kaaji kondu kite k'Atambatun,
kalawalaw kaane kiraan,
bike utum búwutiyeneef,
20 ábuki kámaŋiit kajoku báhamin bi kaaji ku kusoke bu.
Keenaan:
«An fe eeyak kagoru hirij hondu,
aruun kámiñio nu bujuju ayak aket,
hutoof yooŋ enukg.»
21 Bi kajuke bu hunak hondu bútumb búkolinani,
*Moyis asooñen n'aane:
«Iŋ'íbit ekoloowe taŋh!»
22 Aruun bare arilohaloh hirij hite *Siyoŋ,
ni hikinu hite Atambatun eeemo u buroŋ.
Ho heemo fu Serusalem yite i t'etiir,
t'emalaka k'an ayinaat kafinu kaamo du ti hiriy.
23 Arilohaloh ti biñi bite Atambatun keerahare ku kakuukanooree du,
boko ku kuruwu kooniin kikiñjee ku t'etiir bufor bu.
Arilohaloh Atambatun aa ajoonan kúŋgowulan ku kareyi fe,
nu ñúwejet ñite bakan keejoŋoore ku k'Atambatun áhine ku *keekuur but.
24 Arilohaloh Kiris eesiiŋee u t'etut Atambatun nu kúŋgowulan ku,
ti *kaajamoor kíyeni ku k'ajamoore ku nu boko.
Arilohaloh yooŋ halan hoone héeyuusee hu,
hihi híhamin hihaŋ hite hu *Abel héekandijene hu hunukani.
25 Náami arinaŋ toko kikawuun!
Atum'ariteñeko an eeemo ti báhamin n'aruun.
Bakate ku Israyel keebine ku kateñeko kajamatan an éeyemie u ti káyeegal kooniin t'etaam yej,
kafakut tu kúnuur ku.
Náami úne,
Atambatun af'anoŋk aŋ'áhaminn n'úne huta hu t'etiir bufor bu.
Buŋ b'úja fu kafaku tu kúnuur ku kane arko núuwuŋgo kiñaawu?
26 Kóŋkeyin,
kaaji koone kíhinahin etaam i yeeyoŋoŋanooro.
Bare hahiye,
asokasok úne báhamin bonde.
Aanaan:
«Íñje kasooñu íhin etaam i yeeyoŋoŋanooro,
nu bufor bu yooŋ fek.»
27 H'aane hu «kasooñu»,
áwufoorawufoor kaanuku buroon b'áwuwane bu fe buyoŋoŋanooro,
abe nu bútowuto,
man beeyinaatee bu kayoŋoŋan ni bisiiŋo hiraanu.