Melkisedek, áyi n'asaraha yooŋ toko
7
Melkisedek ondu áyemie fu áyi ite Salem,
*n'asaraha yooŋ toko ite Atambatun eeemo u t'etiir-t'etiir.
*H'Aburaham áyemie hu ti bíbatikeina bu bite hitiik hu kóyin k'ariiŋane ku bákayi ku,
Melkisedek n'aja kéefimboor,
abe n'ásoniyano.
2 Aburaham n'áruboor buroon b'ábajina bu kúrub sumoŋu,
abe n'ásik hifeeneŋ awuno.
Huruwu hite Melkisedek aamo fu «áyi ite bifeeneŋ».
Akina yooŋ «áyi ite káasuumaay»,
ábuki Salem aamo fu «káasuumaaya».
3 *Míkiñjin mu musokut aañ aamo fu faafo,
n'aañ yooŋ aamo fu íñaayo,
nu noota noone.
Naane abukee i,
ni naane akete i fe busokutee.
Akina asaraha hiraanu naane Añi ite Atambatun.
4 Arijuk naane Melkisedek aamo i an ómbokun ariike!
Humuum Aburaham faaf úne,
úne Israyel,
árubooraruboor buroon b'ábajina bu ti hitiik hu kúrub sumoŋu,
abe n'awuno hifeeneŋ.
5 *Eluwa yite Moyis ewunawun esaraha i ti bakañi *Lefi bítim,
iŋi kasa ti bakate ku *Israyel húrub hifeeneŋ tu buroon booniin kane káruboor bo kúrub sumoŋub.
Iŋi kasa kúrub kondu ti bakaniin,
abe bare boko yooŋ bakañi Aburaham.
6 Melkisedek,
akina íteiit ti bakañi Lefi,
bare Aburaham asaanosaan húrub hifeeneŋ ti keemo sumoŋu ku.
Hunuut toko,
n'ásoniyan Aburaham a Atambatun aane u o kawunio bike.
7 Abe an eehaŋe u af'ásoniyan áwiyo,
bo bibajut síjeeŋoor.
8 Bakañi Lefi kiŋki kasa húrub hifeeneŋ ti keeemo sumoŋu tu buroon bite bakaniin,
iŋi kaket naane húŋgowulan fe.
Bare Melkisedek eese u húrub hondu hifeeneŋ hu t'Aburaham ahaŋiinhaŋ,
ábuki ondu tu buroŋ naane Míkiñjin mu musoke i.
9 Bakañi Lefi ifi kasa kúrub ku,
butum hifeeneŋ tu kúrub keemo sumoŋu t'an fe ite Israyel.
Náami b'úyinie bu kasoku beemo fu Lefi asaanasaan yooŋ Melkisedek húrub hifeeneŋ,
ábuki faafo Aburaham asaanasaan.
10 Ábuki naane aamo i Lefi t'abukoorutee fe,
anokooreenokoor kite ámoomi t'eni yite Aburaham faaf ite faafo ómbokun h'áfimboore hu ni Melkisedek.
11 Eluwa yite Moyis eenaan esaraha i,
ti bakañi Lefi ti kaware fu kánuutina.
Bare burok booniin biyinaat *kakuuran an.
Náami ake asaraha naane Melkisedek aware fu kabaju,
eenooto naane bakate ku tu hubukandin hite *Aaron.
12 Abe arko kajifan kite esaraha i tu noota nondu kuwasawas,
Eluwa i yooŋ ewareewar kanuutan eke yeesiiŋanee.
13 Abe Anahaan ite úne i irisoke ee diye uŋu hoone hu,
akina ite ti bike butoŋ beewayee ni bite bu Lefi,
abe mayet afeeneŋ tu hubukandin hoone ámuse káyemi asaraha.
14 Úmoomi fe kaanuku tu hubukandin hite *Suda t'Anahaan ite úne ánuutina fuc,
abe *Moyis asokut doon fe tu butoŋ bondu h'áhamine hu iŋ'ite keeware ku káhinu wusarah wu.
Asaraha ómbokun naane Melkisedek
15 Beehaŋe bu kakuuran bondu beemo fu bonde:
ake *asaraha abinabin eeemo naane Melkisedek.
16 Áhinutee éeyemi asaraha naane Eluwa i esoke i ti bakañi *Lefi;
áhineehin éeyemi asaraha ti sembe site buroŋ beeyinaatee kábuju.
17 Múniyo *Míkiñjin mu meenaan:
«Awe káyemi asaraha hiraanu
naane Melkisedekd.»
18 Náami buluwa bítiyar bu bunuutaneenuutan aŋarkeyi naane bibajut sembe,
abe yooŋ bibajut éñjeriŋ.
19 Múniyo *Eluwa yite Moyis éhinut an fe *eekuur.
Bare Atambatun áhinahin úne núuyakar bike beehaŋe Eluwa i,
abe bo bíkinineŋe fu n'úloho.
20 Abe bondu bíhinutee t'Atambatun awaatut.
Bakaaku káyemayemi esaraha t'an awaatut.
21 Yesu bare áyemayemi asaraha h'Atambatun awaate hu eeeno:
«Íñje Atemit iwaate fee,
abe it'iwas bo:
“Awe káyemi asaraha hiraanue.”»
22 Iŋ'ite ho aamo fu *kaajamoor ki Yesu áhine ku núujamoor n'Atambatun kihaŋahaŋ kítiyar ku.
23 N'abaj yooŋ bike:
esaraha i bakaaku káhoojaanahoojaani ábuki iŋi kaket,
bakaake ni kásein.
24 Bare Yesu abaa káyemi asaraha,
abe an at'asao,
ábuki ondu tu buroŋ hiraanu.
25 Iŋ'ite ho h'áyinie fu kafakan akuur but bakan ku kiŋki kaŋaas te o keeloh Atambatun,
ábuki ondu tu buroŋ hiraanu kaanuku aŋ'abin alaw Atambatun bija tu boko.
26 Náami Yesu aamo fu asaraha ómbokun u u úsawulee u.
Anabanab,
áhinaariit meejakut,
áhoofooraariit,
áhinaariitee t'afeeneŋ n'ehoofoora i,
abe Atambatun ayitoyit t'etiir bufor bu.
27 Yesu anooto naane bakaaku esaraha kómbokun ku keesawulee ku káhinu húnakonak fe wusarah.
Iŋi káhin wo bija tu wuhoofoor wooniin boko kumuumiin,
kahaban ni káhin wo yooŋ bija tu wute ésuk if.
Yesu áhinahin kaasarah kifeeneŋ h'ásike hu eni yeene asaan,
abe hondu hifamafam hiraanu.
28 Eluwa yite Moyis,
kúŋgowulan k'ewune fu iŋi kabin káyemi esaraha kómbokun,
abe bare kakuurut.
Bare Eluwa i esiiŋaneesiiŋan ehaban,
Atambatun n'áhamin abe n'awaat,
abe n'ásik Añi oone eekuuranee u hiraanu éeyemi asaraha ómbokun.