Yesu ahaŋahaŋ Moyis
3
Kújakuwe,
iŋ'ite ho aamo fu aruun keenabe ku,
aruun k'Atambatun aruwe ku,
arijondoman ti Yesu.
Akina a Atambatun aboñe fu éeyemi *asaraha ómbokun u.
Íriyilenayilen bondu,
abe bo b'if'iriwaare.
2 Múniyo ájubajub t'Atambatun eejifano u bija tu burok bondu,
naane i *Moyis yooŋ ájube i t'enuuf ite Atambatun ereyi fea.
3 Bare Yesu awarawar kánikanee ahaŋ Moyis,
naane yooŋ anuta aa ajokee ahaŋ enuuf y'anute i.
4 Enuuf-nuuf fe,
abajeebaj an eenute u yo;
bare an éewuwane u doon areyi fe aamo fu Atambatun.
5 N'afin áami Moyis ájubajub tu burok bu t'enuuf ite Atambatun ereyi fe,
abe n'asok ésuk i b'Atambatun aja bu bibin kasoku hágila.
6 Bare *Kiris ájubajub naane Añi i Faafo asaane enuuf yeene aano áyemi hikaw hu.
Abe enuuf yeene yeemo fu úne,
kane arko kikaw úne keeyaŋg,
abe n'únaŋ sihel site s'úne yooŋ tu doon d'úyakare du.
Atambatun káyihinan bakan koone
7 Iŋ'ite ho hu Búwejet Beenabe bu busoke fu bonde.
Beenaan:
«Úmiye,
af'arijam kaaji kite Atambatun,
8 atum'arifeŋk ñúwejet ñoonuun
naane sifaafuun kóŋkeyin t'eramba i,
hi kárahanna hu te o,
ti hiŋes hoone
kaanuku keejuk naane aja i nu boko.»
9 Atambatun aane:
«Sifaafuun kálaamanamlaaman aa t'eramba i;
iŋi kaŋesam kep,
kaanuku keejuk naane ija i nu boko,
abe kajukajuk buroon b'íhine bu fe simit bakan bákasuba.
10 Iŋ'ite ho h'iyiŋate fu ti bakan kondu
abe n'eene:
“Ñúwejet ñooniin ñondu ti kahiilu kep,
kámaŋiit kámeyi bítim búuma.”
11 Náami ti kayiŋat ku,
iwaatawaat eene:
“Iti kayooso hikee t'ifaree du kaanuku yéeni keebin keeyih tokob!”»
12 Kújakuwe,
arinaŋ toko kikawuun,
an t'aruun atum'abaj búwejet béebaanie,
abe ni biyaŋg biyak bíhino éewuŋg hiñaawu Atambatun eeemo u buroŋ.
13 Atambatun ámaŋamaŋi káhamin n'úne úmiye yende yeesokee i ti *Míkiñjin mu.
Náami ariyaŋgananoor kikaw húnakonak fe,
man kaahoofoor ku itim kibin kubuut ake t'aruun,
eefeŋk Atambatun búwejeto.
14 Uf'újok alit tip t'eyakar y'úbaje i huta h'újabe hu káyilen ku bija yooŋ tu hunak hiraanu hu,
n'uŋ'úbaj húrub ti *Kiris.
15 Míkiñjin mu meenaan:
«Úmiye,
af'arijam kaaji kite Atambatun,
atum'arifeŋk ñúwejet ñoonuun
naane sifaafuun kóŋkeyin t'eramba i,
hi kárahanna hu te oc.»
16 Aañiin kaamo fu keejame ku kaaji kite Atambatun abe ni kaweteko kéerahan te o?
Boko kaamo fu bakan ki *Moyis ánuutanna ku *Esipt kareyi fe.
17 T'aañiin t'Atambatun ayiŋate fu simit bakan bákasuba?
Tu bokondu keehoofoore ku,
abe ni kaket t'eramba i.
18 H'Atambatun awaate hu aane:
«Iti kayooso hikee t'ifaree du kaanuku yéeni keebin keeyih tokod»,
aañiin k'asoke fu?
Bokondu kéejeŋginuto ku. e
19 Abe újukajuk kaanuku kabinut káyini buyooso t'afaree du kaanuku keebin keeyih toko aŋarkeyi naane káyilenut.