Eleetar yeekiñjee i bija t'Esuwif i
Béekinineŋe bu kaawiit konde ni kikiñjee
Diye eleetar yeekiñjee i Esuwif i keejoke ku bítim bite *Kiris. An eekiñje u yo ámeyiitee, bare béewoore bu beemo fu ámoomi *Míkiñjin mu jak, ábuki te mo t'af'aliik éewufooriin múniyo mu.
Ekarjen étiyar i kátumbatumba káhihinooree kasooñen ni kaŋes búnuuso. H'an u akiñjiin fu eleetar yende eeeniin kajok alitee, itim kawas bítim bu.
Kóyin sifaaf, Atambatun ajamoorajamoor n'Esuwif i hifeeneŋ. Aaniinyen an af'áhin kaahoofoor, n'iŋi kámiñ enuk *keesarah, abe n'aŋ'aboŋket an u. Eleetar yende n'efin esok kaanuku *kaajamoor kíyeni ku k'Atambatun asiiŋane ku ni bakan kéeyilene ku t'Añi oone kihaŋahaŋ kítiyar ku. Ábuki bi Yesu Kiris áhine bu bija tu kúŋgowulan ku bihaŋahaŋ b'emalaka i, nu *Moyis, *n'Aaron, nu Sosuwe káhine bu. Yesu aamo fu Ametek ite Atambatun eesarahee u bija tu wuhoofoor wute ésuk i fe. An fe éeyilene te o aŋkut asawulo kasarah enuk bija tu wuhoofoor woone. Atambatun kaboŋketo wuhoofoor woone.
Iye i kaawiit konde kije fu:
1) Añi ite Atambatun an ómbokun (1.1-3)
2) Yesu ahaŋahaŋ emalaka i (1.4-2.18)
3) Yesu ahaŋahaŋ Moyis nu Sosuwe (3.1-4.13)
4) Yesu aamo fu asaraha ómbokun u (4.14-7.28)
5) Yesu abinabin ni kaajamoor keehaŋe kítiyar ku (8.1-9.22)
6) Kaasarah kite Yesu kifeeneŋ abe kiraanu (9.23-10.31)
7) Bakaake ti bakate ku kóŋkeyin keehaŋe ku káyilen (11.1-40)
8) Úneefan ti Yesu (12.1-13.19)
9) Kalawu ku, ni kasaafu kiraanu ku (13.20-25)