Kikaw kite kéeyilene ku
3
Hirim h'ija hee kasoku héewoore:
ake af'ámaŋi káyemi hikaw hite bakan *kéeyilene,
burok beejake b'ámaŋie fii.
2 Hikaw hite bakan kéeyilene awarawar káyemi an eeyinaatee kawatan tu doon.
Anaare afeeneŋ taŋ a aware fu kabajua,
abaj hikaw,
ájokumooro,
abe buroŋ boone nu bújub.
Awarawar kajoku áwariee kiŋki kaja te o,
abe n'áyini kaliiken ésuk i bite b'Atambatun.
3 Awarut káyemi áhujaa ómbokun,
awarut yooŋ káyemi aloba,
bare awarawar káneeni,
abe n'áyemi an ite káasuumaay.
Awarut kanaŋu hikawo ti sírirem.
4 Awarawar káyini káyeki butoŋ boone,
abe n'áhin yooŋ bakañio kéejeŋgino káhabanein.
5 Ábuki an afut'áyini káyeki butoŋo,
buŋ b'aja fu káyini káyeki bakate ku Atambatun kéeyilene ku?
6 Hikaw hite bakan kéeyilene awarut káyemi an eefiyeit ti bítim bite *Kiris;
n'aŋ'ajendan biyitooro,
abe Atambatun n'aŋ'ajoonano naane ajoonane i Setani.
7 Awarawar kabaju huruwu heejake ti kéeyilenut ku,
kaanuku man itim kabin kasok te o beejakut,
abe Setani n'ajoko t'éfiir yeeneb.
Ejokoora yite kikaw kite sijaŋgu su
8 Ejokoora yite kikaw kite sijaŋgu su kawarawar yooŋ káyemi bakan keejoŋoore,
ni káyemi yooŋ bakate bifeeneŋ.
Kawarut uŋu búhujo kahahan,
kawarut yooŋ kaŋesu kabaju sírirem si kásuwatut.
9 Kawarawar kajoku nu suhol seekuure but múniyo m'Atambatun áwufoore mu.
10 Kajab kajukeree tu boko jak,
abe af'arko kayinaatee kawatan tu doon,
n'iŋi káyini káyemi ejokoora t'ejaŋgu i.
11 Haare hu yooŋ kiŋki kajokoor kikaw kite sijaŋgu suc kawarawar káyemi keejoŋoore,
abe kawarut yooŋ kasoku t'an.
Kájokumooro,
abe kájub tu buroon bu fe.
12 Háyine hu kiŋki kajokoor kikaw kite sijaŋgu su,
huruw fe anaare afeeneŋ taŋ a aware fu kabajud.
Kawarawar kajoŋooran bakañiiin jak,
ni bakate ku t'enuuf tu boko fe.
13 Kiŋki kajokoor kikaw kite sijaŋgu su,
abe n'iŋi káhin burok beejake,
boko kasokorooree,
abe boko kawaare bite bu káyilen kooniin ti Yesu *Kiris ni kikaw keeyaŋge piŋ.
Beekoofe b'Atambatun áwufoore bu úne
14 Iyakarayakar bibin kajukii memee.
Bare íñj'endu ti kákiñjini bonde kaanuku
15 bibin búuma ufu búkuri,
n'á̱meyi buŋ bu buroŋ bite an buware fu káyemi tu butoŋ bite Atambatun.
Butoŋ bondu beemo fu bakate ku Atambatun eeemo u buroŋ *kéeyilene ku,
keeemo ku naane hiñaan hítiyar hite enuuf tu múniyo mu miyaajee du.
16 Béekoofaanie bu bite bítim bite b'úne bihahahah,
abe an ayinaat kajeeŋan bo.
Bo beemo fu bonde:
Abinabin éehinooro naane húŋgowulan,
Búwejet Beenabe bu nu búwufoor kaanuku ájubajube.
Emalaka i kajukojuk,
abe ésuk i ni kawaare uŋu hoone hu
ti keenooto ku Esuwif.
Bakate ku t'etaam i ni káyilen te o,
abe Atambatun n'ayito t'etiir t'ánike du.