3
Hireeŋareeŋ toko iŋkut íriyini kanahan;
n'iriene kame iririiko Aten unoon unia,
2 abe n'íriboñinuun ati úne Timote aa arok n'uni bija t'Atambatun ti kawaare kite Hirim Heetoofe hu,
heesoke hu iŋ'ite hu Kiris.
Íriboñinuunboñino kaanuku eeyaŋgananuun kikaw ti bítim bu,
abe n'ahaŋ yooŋ kalitan káyilen koonuun.
3 Káhinu iyu,
an t'aruun man awas bítim bu iŋ'ite sílaam site su hahiye.
Árimoomi aruun kumuumuun kaanuku sílaam naane sondu,
so káreeŋina úne.
4 H'íriyemie hu t'aruun,
irisoŋkuun busok kaanuku úne káhihinooree.
Abe árimoomi kaanuku bo yooŋ bibaje fu.
5 Ho híkinineŋe fu naane aamo i iŋkut íyini kanahan,
n'íboñin Timote eebin eejuk buŋ bi káyilen koonuun keemo fu.
Íkolakoleyi iŋ'eene yéeni man Setani n'abuutuun,
butum burok b'iriroke bu fe bite fuufu.
6 Bare Timote ábatikeino afiyeiteeb,
abe asokasok uni beejake ti káyilen koonuun,
ni kámaŋioori koonuun.
Asokasok uni yooŋ kaanuku siheluun fe sondu t'uni kep,
abe árimaŋamaŋi kajuku uni naane írimaŋie i yooŋ kasooñu irijukuun.
7 Náami kújakuwe,
naane irijuke i kúnuur ni sílaam fe,
káyilen koonuun ni kiyaŋganan uni kikaw.
8 Ábuki hahiye buroŋ bu busooña butoof t'uni aŋarkeyi naane arijokajok alitee t'Anahaan u.
9 Kaanu yooŋ Atambatun eyeehen uŋu hoonuun hu,
ti katoofu k'árihine ku uni hágilao,
at'afamee hikee.
10 Kaajiŋgan ni káajiim,
iŋ'irilawo ni sembe man n'asooñ áhin uni íriheelin t'aruun,
abe n'irihabanooruun beeŋeñene bu ti káyilen koonuun.
11 Yala Atambatun Faaf úne humuumo,
n'Anahaan ite úne Yesu ni káhin bítim bite b'uni beeŋaas kaanuku man n'íriyini bibin t'aruun!
12 Anahaan u áhin ariihaŋ kámaŋioori,
abe n'arihaŋ yooŋ kámaŋi ésuk i fe;
árimaŋi bakaaku naane írimaŋiuun i.
13 Káhinu iyu,
o káwutiyenuun sembe kaanuku man hunak h'ábatikein hu te ho,
akina Anahaan ite úne Yesu ni bakan k'akino ku fe,
n'aŋ'áriyemi bakan keenabe hágila Atambatun Faaf úne,
abe an at'áyiniuun kawatan tu doon areyi fe.