Eleetar étiyar i yi Pool akiñje i bakate ku Tesalonik
Béekinineŋe bu kaawiit konde ni kikiñjee
Diye eleetar étiyar i yi Pool akiñje i bakate ku Tesalonik *kéeyilene ku. Pool abinabina aja bo, abe n'awaareiin Hirim Heetoofe hite hu Yesu *Kiris (a̱juk Epotor i 17.1-10). Bakate ku bo ni kajok bítim bite Kiris. Bare diŋgilis kep, bakaake t'Esuwif i keeemo ku bo ni katiŋg ésuk i kaanuku kéerahan tu Pool n'áwiyo i kariboore u. Ekarjen i ni kánuusiin. Káajiim ku, ni kánuutin hikinu hu nu boko, abe Pool n'áwiyo ni kaja bija Bere.
Abaj simit súsuba, Pool n'abin aboñ Timote eeja éejukin naane Ekarjen i bakate ku Tesalonik kaamo i ariike. Hi Timote aje hu abin ábatikein, n'asok Pool aano karoŋa ni kajok bítim bu, bare bakaake tu boko iŋi kateñeko karoku kéekuumanooro. Iŋi kaane memee Yesu n'aŋ'ábatikein, abe ifi karok, n'aŋ'áami káfiiten. Bakaaku siheliin sibebut, ábuki keehooje t'ebuke yeeniin ni bákawiyiin kaketa, abe Yesu anooto ti bibin. Ho hi Pool akiñjiin fu kaanuku eeyaŋgananiin kikaw, abe n'asokiin yooŋ buŋ bi bíbatikeina bite Kiris bija fu káyemi, nu buŋ b'aja fu ni kéeyilene ku te o. Iyu, n'iŋi káyini kayakar kaanuku kabaa káyemi n'Anahaan u.
Iye i kaawiit konde kije fu:
1) Kasaafu ku (1.1)
2) Buŋ bi bakate ku Tesalonik káyilene fu ariike (1.2-3.13)
3) Buroŋ beetoofe Atambatun (4.1-12)
4) Eyakar i ti bíbatikeina bite Kiris (4.13-5.11)
5) Karimu ku, ni kasaafu kiraanu ku (5.12-28)